Levitiko 20:1-27
20 Ua fetalai mai foʻi Ieova iā Mose e faapea:
2 “Ia e fai atu i le fanauga a Isaraelu, ‘O so o se tasi o le fanauga a Isaraelu, ma so o se tagata ese o lē e aumau i Isaraelu, e avatu se tasi o lana fanau iā Moloka, ia fasiotia lava o ia.+ E ao i tagata o le atunuu ona fetogi o ia i maa ia oti ai.
3 Ou te teena lenā tagata, ma ou te fasiotia o ia auā ua ia avatu nisi o lana fanau iā Moloka, ma faaleagaina loʻu faleʻie paia+ ma faalumaina ai loʻu igoa paia.
4 Afai ua loto i ai tagata o le atunuu e liliuese o latou mata mai i le mea ua faia e lenā tagata a o ia avatu lana fanau iā Moloka, ma latou lē fasiotia o ia,+
5 ona ou teena lea o lenā tagata ma lona aiga.+ Ou te fasiotia lava o ia ma i latou uma ua lē faamaoni faatasi ma ia, i le faia o faiga faatalitane ma Moloka.
6 “‘A o lē e liliu atu i ē e saʻili i agaga+ ma ē e vavalo i mea e tutupu+ ina ia faia faiga faatalitane faaleagaga ma i latou, ou te teena lea tagata ma fasiotia o ia.+
7 “‘Ia outou faapaiaina outou ma ia paia outou,+ auā o aʻu o Ieova lo outou Atua.
8 Ia outou tausia aʻu tulafono ma faia.+ O aʻu o Ieova o lē e faapaiaina outou.+
9 “‘Afai e iai se tagata e faamalaia* i lona tamā po o lona tinā, e ao ona fasiotia lava o ia.+ Talu ai ua ia faamalaia i lona tamā po o lona tinā, ua i ona lava luga lona toto.
10 “‘O le faasalaga lenei mo le tamāloa e faia le mulilua ma le avā a se isi tamāloa: O lē e faia le mulilua ma le avā a lona uso a tagata, e ao ona fasiotia lava o ia, o le tane mulilua atoa ma le fafine mulilua.+
11 O le tane e momoe ma le avā a lona tamā, ua ia faalumaina ai lona tamā.*+ E ao ona fasiotia lava i laʻua. Ua i o laʻua lava luga o la toto.
12 Afai e momoe se tane ma le avā a lona atalii, e ao ona fasiotia lava i laʻua. Ua la solia le tū e masani ai. Ua i o laʻua lava luga o la toto.+
13 “‘Afai e momoe se tane ma se isi tane e pei ona momoe ma le fafine, ua la faia le mea e inosia.+ E ao ona fasiotia lava i laʻua. Ua i o laʻua lava luga o la toto.
14 “‘Afai e faiavā se tane i se fafine, ae e feusuaʻi foʻi ma le tinā o le fafine, o se amioga matagā tele lea.*+ E ao ona fasiotia o ia ma i laʻua ma susunu i le afi,+ ina ia lē faaauau ai pea ona iai amioga matagā iā te outou.
15 “‘Afai e feusua‘i se tane ma se manu, e ao ona fasiotia lava o ia, ma e ao foʻi ona outou fasimate le manu.+
16 Afai e alu atu se fafine i se manu ina ia la feusuaʻi,+ e ao ona fasiotia le fafine ma fasimate le manu. E ao ona fasiotia lava i laʻua. Ua i o laʻua lava luga o la toto.
17 “‘Afai e feusua‘i se tane ma lona tuafafine, o le afafine o lona tamā po o le tama teine a lona tinā, ma vaai i lona telenoa ma vaai foʻi le fafine i lona telenoa, o se mea e māsiasi ai.+ E ao ona fasiotia i laʻua i luma o tagata o lo latou nuu. Ua ia faalumaina lona tuafafine.* E tatau ona ia tali atu mo lana agasala.
18 “‘Afai e feusuaʻi se tane ma se fafine a o fai lona maʻi masina, ua lē amanaʻia e i laʻua le alu o lona palapala.+ E tatau ona fasiotia i laʻua uma.
19 “‘Aua e te feusua‘i ma le uso o lou tinā po o le tuafafine o lou tamā, auā o le faalumaina lea e le tagata o ona lava toto ma aano.+ E tatau ona la tali atu mo la laʻua agasala.
20 O le tane e feusuaʻi ma le avā a le uso o lona tamā, ua ia faalumaina le uso o lona tamā.*+ E ao ona la tali atu mo la laʻua agasala. E tatau ona fasiotia i laʻua ae leʻi maua ni fanau.
21 Afai e faaipoipo se tane i le avā a lona uso, o se mea e inosia lea.*+ Ua ia faalumaina lona uso.* Ia leai sa laʻua fanau.
22 “‘E ao ona outou tausia aʻu tulafono uma ma iʻuga o aʻu faamasinoga+ uma ma ia faia,+ neʻi luai mai outou e le laueleele lea ou te avatu i ai outou tou te nonofo ai.+
23 Aua tou te mulimuli i tulafono a nuu ia ou te tuliesea mai i o outou luma,+ auā ua latou faia ia mea uma ma ua ou ʻinoʻino i ai.+
24 O le mea lea ou te fai atu ai iā te outou: “E maua lava e outou lo latou laueleele, ma ou te avatu lenei laueleele iā te outou e fai mo outou, o le laueleele o loo tafe ai le suāsusu ma le meli.+ O aʻu o Ieova lo outou Atua, o lē ua vavaeeseina outou mai i isi nuu.”+
25 E ao ona outou faaeseese le manu e mamā mai i le manu e lē mamā, ia faaeseese foʻi le manulele e lē mamā mai i le manulele e mamā;+ aua neʻi avea outou ma ē ua inosia ona o se manu po o se manulele, po o so o se mea e fealuaʻi i luga o le laueleele, ia ua ou vavaeesea mai iā te outou o ni mea e lē mamā.+
26 E ao ona paia outou mo aʻu, auā o aʻu o Ieova, e paia lava aʻu,+ ma ua ou vavaeese outou mai i tagata e fai ma oʻu nuu.+
27 “‘O se tane po o se fafine ua iai le mana faataulāitu, po o lē e faia valovaloga,* ia fasiotia lava ia.+ E ao i tagata ona fetogia i latou i maa ina ia feoti ai. Ua i o latou lava luga o latou toto.’”
Faamatalaga Pito i Lalo
^ Po o le “fetuu.”
^ Epe., “faatelenoa i lona tamā.”
^ Po o le “amioga e faalumaina ai.”
^ Epe., “faatelenoa i lona tuafafine.”
^ Epe., “faatelenoa i le uso o lona tamā.”
^ E faasino atu lea pe afai o loo ola lona uso.
^ Epe., “faatelenoa i lona uso.”
^ Po o le “pe iai le mana e faia ai valovaloga.”
