Esoto 32:1-35
32 I lenā taimi, ua iloa e tagata ua tuai ona alu ifo Mose mai i le mauga.+ Ona faapotopoto mai lea o le nuu iā Arona ma faapea mai iā te ia: “Inā tulaʻi ia ma e faia se atua mo i tatou e taʻitaʻia i tatou,+ auā tatou te lē o iloa po o le ā le mea ua tupu i lenei tagata o Mose, o lē na aumaia i tatou mai i Aikupito.”
2 Ona fai atu lea o Arona iā i latou: “Ia aveese tautaliga auro+ mai i taliga o a outou avā, o o outou atalii ma o o outou afafine, ma aumai iā te aʻu.”
3 Ona aveese lea e tagata o tautaliga auro mai i o latou taliga ma avatu iā Arona.
4 Ua ia ave auro mai iā i latou, ma ua ia faaaogāina se tofi e faia ai se faatusa o se tamaʻi povi mai i le auro.*+ Ona faapea mai lea o nisi: “Isaraelu e, o lo outou atua lenei, o lē na taʻitaʻia outou mai i Aikupito.”+
5 Ua vaai Arona i lenei mea, ona ia fausia ai lea o se fata faitaulaga i luma o le tamaʻi povi. Ua valaau atu Arona: “O le a faia se tausamiga iā Ieova a taeao.”
6 Ua latou alapō i le aso e sosoo ai, ma ua latou fai taulaga i taulaga mū ma avatu foʻi taulaga faifaatasi. Ua mavae lea, ona nonofo lea i lalo o le nuu e aai ma inu. Ona latou tutū lea i luga ma fiafia.+
7 Ona fetalai mai lea o Ieova iā Mose: “Alu ifo ia i lalo, auā o lou nuu na e taʻitaʻia mai i Aikupito, ua leaga mea ua latou faia.+
8 Ua vave ona latou liliuese mai i le ala lea na ou poloaʻi atu ai iā i latou e savavali ai.+ Ua latou faia le faatusa o se tamaʻi povi mai i le auro,* ma ua latou ifo i ai ma fai taulaga i ai, ma faapea ane, ‘Isaraelu e, o lo outou Atua lenei, o lē na taʻitaʻia outou mai i Aikupito.’”
9 Ua fetalai atili mai Ieova iā Mose: “Ua ou vaai atu e faauamaaa lenei nuu.+
10 O lea, ia tuu mai aʻu, ou te faaumatia i latou i loʻu ita tele, ae ou te faia oe ma nuu tele.”+
11 Ua faatoga atu Mose iā Ieova* lona Atua+ ma faapea atu: “Ieova e, aiseā ua e toʻasā ai i lou nuu na e aumaia mai i le atunuu o Aikupito i lou mana tele ma lou aao malosi?+
12 O le a faapea mai tagata Aikupito, ‘Na ia aumaia i latou ona o se māfuaaga leaga. Na mana‘o o ia e fasiotia i latou i mauga ma fano ai i latou i le fogāeleele.’+ Ia e liliueseina lou toʻasā tele, ma toe iloilo lau faai‘uga* e faaoo lenei mala i lou nuu.
13 Ia e manatua au auauna o Aperaamo, o Isaako, ma Isaraelu, o ē na e tautō ai iā te oe lava ma faapea mai, ‘Ou te faatoʻateleina a outou fanau e pei o fetu o le lagi,+ ma o lenei laueleele uma na ou fai atu ai ou te foaʻiina atu i a outou fanau, ina ia fai ma o latou tofi tumau.’”+
14 Ona toe iloilo lea e Ieova o lana faai‘uga* i le mala na ia fetalai e faaoo mai i ona tagata.+
15 Ona alu ifo lea o Mose mai i le mauga ma papamaa e lua o le Molimau+ i ona lima.+ Ua tusia mea i itu uma e lua o papamaa; ua tusia i le pito i luma ma le pito i tua.
16 O papamaa o galuega ia a le Atua, ma o tusitusiga o tusitusiga ia a le Atua na vaneina i papamaa.+
17 Ina ua faalogo Iosua i le pisapisaō o tagata ona o lo latou alalaga, ona ia faapea ane lea iā Mose: “O loo iai se pisapisaō o le taua i le togālauapi.”
18 Ae ua faapea atu Mose:
“E lē o le leo o pesepesega ona o le manumalo,E lē o le leo foʻi o le tagiauē ona o le toʻilalo;O loo o‘u faalogo atu i le leo o isi pesepesega.”
19 Ina ua latalata atu Mose i le togālauapi ma iloa atu le tamaʻi povi+ ma faigāsiva, ona oso lea o lona ita, ua ia togi i lalo papamaa mai i ona lima, ma ua nutililii ai i le auvae mauga.+
20 Ona ia tago lea i le tamaʻi povi na latou faia, ua susunu i le afi ma olopalaina seʻia oo ina matuā ninii lava,+ ona ia sasaa lea i luga o le vai ma faafeinu ai le fanauga a Isaraelu.+
21 Ona fai atu lea o Mose iā Arona: “O le ā le mea ua faia e lenei nuu iā te oe, ua e faaoo ai lenei agasala tele iā i latou?”
22 Ua fai mai Arona: “Ia aua neʻi tupu tele le toʻasā o loʻu alii. Ua e silafia le nuu nei, ua leaga lava o latou faanaunauga.+
23 Ua latou faapea mai iā te aʻu, ‘Ia e faia se atua mo i tatou e taʻitaʻia i tatou, auā e tatou te lē iloa po o le ā le mea ua tupu i lenei tagata o Mose, o lē na aumaia i tatou mai i Aikupito.’+
24 Ona ou fai atu lea iā i latou, ‘O so o se tasi e iai ni ana auro, ia latou aveese mai iā i latou ma aumai iā te aʻu.’ Ona ou togi lea i le afi ma maua mai ai lenei tamaʻi povi.”
25 Ua iloa e Mose ua vaogatā tagata, ona ua tuufau i latou e Arona, ma ua faia ma mea e faalumaina ai i latou i luma o o latou fili.
26 Ona tū lea o Mose i le faitotoʻa o le togālauapi ma faapea atu: “O ai e ʻau ma Ieova? Inā sau ia iā te aʻu!”+ Ona faapotopoto ane lea o le fanauga uma a Levi iā te ia.
27 Ua ia fai atu iā i latou: “O le mea lenei ua fetalai mai ai Ieova le Atua o Isaraelu, ‘Ia taʻitasi ma sulu lana pelu, ma ui atu i le togālauapi atoa mai i lea faitotoʻa i lea faitotoʻa, ia fasioti i lona uso, i lona tuaoi, ma lana uō mamae.’”+
28 Ua faia e le fanauga a Levi e pei ona fai atu ai Mose. Pe tusa ma le 3,000 tane na fasiotia i lenā aso.
29 Ua faapea atu Mose: “Ia vavaeese outou* mo Ieova i le asō, auā na taʻitasi outou ma faasagatau i lona lava atalii ma lona lava uso;+ o le asō o le a ia tuuina mai ai iā te outou se faamanuiaga.”+
30 Ua oo i le aso e sosoo ai, ua faapea atu Mose i le nuu: “Ua outou agasala i le agasala telē lava, o lea o le a ou alu aʻe ai iā Ieova, e vaai pe e mafai ona ou faia se mea e magalo ai la outou agasala.”+
31 Ona toe foʻi atu lea o Mose iā Ieova ma faapea atu: “Pagā le telē o le agasala ua faia e lenei nuu! Ua latou faia se atua auro mo i latou lava!+
32 O lenei, afai e te finagalo i ai, ia faamagalo la latou agasala,+ ae a leai, faamolemole ia soloiesea aʻu mai i lau tusi ua e tusia.”+
33 Ae ua fetalai mai Ieova iā Mose: “O lē ua agasala mai iā te aʻu, ou te soloiesea o ia mai i laʻu tusi.
34 Inā alu ia, ia e taʻitaʻi le nuu i le laueleele na ou fai atu ai iā te oe. Faauta! e muamua atu laʻu agelu i ou luma,+ ma o le aso ou te asiasi atu ai, o le a ou faasalaina i latou ona o la latou agasala.”
35 Ona faaoo lea e Ieova o le mala i le nuu ona o le tamaʻi povi na latou faia, lea na faia e Arona.
Faamatalaga Pito i Lalo
^ Po o “le auro ua faaliusuāvai.”
^ Po o “le auro ua faaliusuāvai.”
^ Epe., “faamalū e Mose fofoga o Ieova.”
^ Po o le “ma ia faanoanoa i lau faaiʻuga.”
^ Po o le “Ona faanoanoa lea o Ieova.”
^ Epe., “Ia faatutumu o outou lima.”
