O le Tusi Lona Lua i le Faapotopotoga i Korinito 9:1-15
9 O lenei, e lē manaʻomia ona ou tusi atu iā te outou e faatatau i le faiva i le ʻaupaia,+
2 auā ua ou iloa lo outou naunau e foaʻi, lea na ou mitamita ai i Kerisiano i Maketonia e uiga iā te outou e faapea ua atoa le tausaga o nofosauni Akaia, ma o lo outou maelega, na uunaʻia ai le toʻatele o i latou.
3 Ae ua ou aauina atu uso, ina neʻi lē aogā lo matou mitamita e uiga iā te outou i lenei mea, ma ina ia outou sauni, e pei ona ou fai atu ai e faatatau iā te outou.
4 Pe afai matou te ō atu ma nisi mai i Maketonia, ma iloa ai e tou te leʻi nofosauni, ona matou māsiasi ai lea faapea ma outou, talu ai ua matou soona faatuatuaina outou.
5 O le mea lea, ua ou manatu ai e manaʻomia ona faalaeiau uso e ō atu muamua iā te outou, ma ia muaʻi sauniuni la outou meaalofa tele lea na folafola mai, ina ia lava tapena lenei meaalofa tele, ae e lē o se mea na fai faamalosi.
6 E tusa ma lenei mea, o lē e itiiti ana fatu e lūlū, e itiiti foʻi ana mea e selesele mai; ma o lē e tele ana fatu e lūlū, e tele foʻi ana mea e selesele mai.+
7 Ia taʻitoʻatasi ma faia e tusa ma le mea ua filifili i lona loto, aua le faia ma le ōi,* aua foʻi le faia faamalosi,+ auā e alofa le Atua i lē e foaʻi ma le lotofiafia.+
8 E mafai foʻi e le Atua ona foaʻi atu iā te outou le anoanoaʻi o lona agalelei faifua, ina ia outou maua mea uma lava tou te manaʻomia, ma ia tele a outou mea mo galuega lelei uma lava.+
9 (E pei ona tusia: “Ua ia tufatufa atu le tele o mea; ua ia foaʻi atu i ē e matitiva. E tumau e faavavau lana amiotonu.”+
10 O lenei, o Lē e foaʻiina atu le tele o fatu i lē e lūlū ma falaoa e ʻai ai, e na te foaʻi mai pea ma faateleina fatu mo outou e lūlū, ma faateleina ai fua o la outou amiotonu.)
11 Ua faatamaoaigaina outou i mea uma lava, ina ia iʻu ai i le limafoaʻi, lea e tupu ai le faafetai i le Atua ona o i matou;
12 auā o le faatinoina* o lenei auaunaga i le lautele e lē na o le foaʻi atu o le tele o mea e manaʻomia e le ʻaupaia,+ ae ina ia tele ai le faafetai e avatu i le Atua.
13 O le faamaoniga ua tuuina mai e lenei faiva o le foaʻi atu, ua latou faamamaluina ai le Atua ona o lo outou gauaʻi i le tala lelei e uiga i le Keriso, a o outou faalauiloa atu lenā mea i tagata, ma ona o lo outou limafoaʻi i a outou meaalofa mo i latou atoa ma isi tagata uma.+
14 O a latou tatalo faatauanau foʻi mo outou, ua faaalia ai lo latou alolofa iā te outou, ona o le matuā tele o le agalelei faifua o le Atua iā te outou.
15 E faafetai i le Atua mo lana meaalofa foaʻifua e lē mafaamatalaina.
