O le Tusi Muamua i le Faapotopotoga i Korinito 16:1-24
16 O lenei, e tusa ai ma faaputugātupe mo le ʻaupaia,+ ia outou mulimuli i taʻiala na ou tuuina atu i faapotopotoga i Kalatia.
2 O aso muamua o vaiaso uma, ia taʻitoʻatasi outou ma tuu ese se mea e tusa ma mea ua ia maua, ina ia aua neʻi aoina ni tupe pe a ou taunuu atu.
3 Pe a ou oo atu i inā, o tane ua outou faamaonia i tusi+ na outou tusi mai ai, ou te aauina atu i latou e momoli i Ierusalema la outou meaalofa ua faia ma le agalelei.
4 Peitaʻi, afai e talafeagai ona ou alu atu foʻi i inā, ona matou ō faatasi lea ma i latou.
5 Ae ou te alu atu iā te outou pe a ou ui ane i Maketonia, auā ou te ui ane lava i Maketonia;+
6 atonu tatou te nonofo ma outou, po ou te nofo foʻi seʻia uma le tau mālūlū, ina ia outou momoli aʻu* i le mea ou te malaga i ai.
7 Auā ou te lē manaʻo e tau ina afe atu iā te outou i laʻu malaga, ae ou te faamoemoe e nonofo ma outou mo se taimi umi,+ pe afai e finagalo i ai Ieova.*
8 Peitaʻi, ou te nofo pea i Efeso+ seʻia oo i le Tausamiga o le Penetekoso,
9 auā ua faaavanoa mai iā te aʻu se faitotoʻa lautele e fai ai le galuega,+ ae e toʻatele foʻi tagata e tetee mai.
10 Afai e taunuu atu Timoteo,+ ia faamautinoa e leai se mea e fefe ai o ia a o faatasi ma outou, auā o loo faia e ia le galuega a Ieova,*+ e pei foʻi o aʻu.
11 O lea la, ia aua lava neʻi vaai maulalo se tasi iā te ia. Ia momoli mai o ia* ma le saogalemu ina ia oo mai iā te aʻu, auā o loo matou faatali atu ma le ʻauuso iā te ia.
12 A o Apolo+ lo tatou uso, na ou matuā ʻaiʻoi iā te ia ina ia ō atu faatasi ma uso iā te outou. E leʻi manaʻo o ia e alu atu i le taimi lenei, ae e alu atu pe a maua sona avanoa.
13 Ia mataala,+ ia tutū mausalī i le faatuatua,+ ia faatamatane,*+ ma ia faamalolosi.+
14 Ia faia a outou mea uma lava i le alofa.+
15 Ua ou ʻaiʻoi atu iā te outou le ʻauuso e: Ua outou iloa o le aiga o Setefana o i latou na o uluaʻi soo* i Akaia, ma na tuuina atu i latou lava e auauna i le ʻaupaia.
16 Ia outou gauaʻi atu pea i tagata faapena, atoa ma i latou uma e lagolagosua ma galulue mamafa.+
17 Peitaʻi, ua ou fiafia ona ua faatasi mai Setefana,+ ma Fotunato, ma Akaiko, auā e ui ina outou lē iai i inei, ae ua telē la latou fesoasoani iā te aʻu.
18 Auā ua latou faafouina aʻu atoa ma outou.* O le mea lea, ia outou talisapaia ai tane faapena.
19 O loo alolofa atu faapotopotoga o i Asia iā te outou. O loo alolofa tele atu foʻi Akula ma Piseka,* ma le faapotopotoga o loo i lo la fale+ iā te outou o soo o le Alii.
20 O loo alolofa atu foʻi uso uma iā te outou. Ia faafeiloaʻi e le tasi le isi i le sogi paia.
21 O aʻu o Paulo, ua ou tusia e aʻu lava oʻu alofaaga.
22 Pe afai e lē alofa faapelepele se tasi i le Alii, ia malaia o ia. Lo matou Alii e, ia e afio mai!
23 Tau ina ia iā te outou le agalelei faifua o le Alii o Iesu.
24 E momoli atu foʻi oʻu alofaaga iā te outou uma o ē o loo autasi ma Keriso Iesu.
Faamatalaga Pito i Lalo
^ Ele., “momoli aʻu i se vaega o le auala.”
^ Ele., “momoli mai o ia i se vaega o le auala.”
^ Po o le “ia lototetele.”
^ Ele., “o uluaʻi fua.”
^ Ele., “loʻu agaga ma o outou agaga.”
^ E igoa foʻi iā Pisila.