MATAUPU SILISILI O LE TUSI PAIA: ʻIa faaauau ona fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou faia.’—Kolose 3:13.

Le uiga. I le Tusi Paia, ua faatusaina le agasala i se aitalafu, a o le faamagalo ua faatusaina i le faalēaogāina o se aitalafu. (Luka 11:4) Ua taʻua i se tusi e faapea, i le Tusi Paia, o le upu Eleni ua faaliliuina i le “faamagalo,” e uiga atu i le “faamamulu ese pe faagalo se aitalafu, e ala i le lē toe tapāina.” O lea, pe a tatou faamagalo atu i sē na sesē mai, e tatou te lē toe faatalitalia se mea mai iā te ia. O le lotomalilie e faamagalo atu, e lē faapea ai ua tatou lagolagoina le mea sesē na fai, pe faaitiitia ai le tigā ua oo iā i tatou ona o le mea sesē na fai. Nai lo o lea, ua tatou filifili e faagalo le mea sesē na fai mai, e ui lava e iai se māfuaaga tatau e tatou te “tigā ai.”

Po o aogā i aso nei? O i tatou uma lava e agasala auā o i tatou o tagata e lē lelei atoatoa. (Roma 3:23) O lea, o se mea atamai lo tatou lotomalilie e faamagalo atu i isi, auā e iai foʻi se taimi o le a tatou mananaʻo ai i isi e faamagalo i tatou. E lē gata i lea, e iai aogā e tatou te maua pe afai e tatou te filifili e faamagalo atu. E faapefea?

Pe a tatou teuloto le ita ma mea sesē na fai mai, e aunoa ma le faamagalo atu, ua tatou faatigā iā i tatou lava. O na faalogona lē lelei e mafai ona mou atu ai lo tatou fiafia, puupuu ai o tatou ola, ma lagona ai le mafatia. E mafai foʻi ona aafia ai lo tatou soifua mālōlōina. I se lipoti o loo i le Journal of the American College of Cardiology, na taʻua ai e Dr. Yoichi Chida ma le polofesa e suʻesuʻeina le mafaufau o Andrew Steptoe: ʻUa maua i suʻesuʻega lata mai nei, e telē le aafiaga o le ita ma le teuloto o le ita, ona e maua ai i le maʻi fatu.’

I le isi itu, pe a tatou faamagalo isi ma le lotoatoa, e tatou te faatumauina ai le autasi ma le filemu, faapea a tatou faiā lelei ma isi. A o le itu e sili ona tāua, ua faamaonia atu ai o loo tatou faaaʻoaʻo i le Atua, o lē e faamagalo ma le lotoatoa i tagata agasala e salamō, ma e na te faatalitalia i tatou e faia foʻi faapea.—Mareko 11:25; Efeso 4:32; 5:1.