A o oʻu laʻitiiti, sa nonofo lo matou aiga e lata i Leipzig, i Siamani i Sasaʻe, e lē mamao mai le tuaoi o Czech ma Polani. O le 6 o oʻu tausaga, na matou siitia ai i Pasili ma ō atu ai i Ekutoa ona o le galuega a loʻu tamā.

Sa ou aʻoga ma nofo tumau i se aʻoga i Siamani i le 14 o oʻu tausaga. Talu ai na nonofo oʻu mātua i Amerika i Saute, na tatau ai la ona ou tausia aʻu lava ma na iʻu ai ina iai oʻu uiga fia tutoʻatasi. Ou te leʻi popole po o le ā le aafiaga o isi i aʻu gaoioiga.

O le 17 o oʻu tausaga na toe foʻi mai ai oʻu mātua i Siamani, ma matou nonofo faatasi i lo la fale. Ae o oʻu uiga fia tutoʻatasi na faigatā ai ona ou ola i lalo o le pule a oʻu mātua, ma ou alu ese ai loa i le 18 o oʻu tausaga.

Na amata ona ou lē mautonu ma ou saʻili ai mo se olaga e aogā. Na ou mātauina auala eseese sa ola ai tagata, ma na ou manatu o le auala sili e faaaogā tatau ai loʻu olaga, o le faimalaga solo e matamata i le matagofie o lenei lalolagi a o leʻi faaleagaina e tagata.

O lea na ou tuua ai Siamani, faatau laʻu pasika ma ou alu loa i Aferika. Peitaʻi, na tatau ona ou toe foʻi i Europa ina ia toe faaleleia laʻu pasika. E leʻi umi, a o ou iai i se matafaga i se tasi aso i Potukali, na ou mafaufau ai loa e tuu le pasika ae ou folau i se vaa.

Na ou faatasi atu i se vaega o talavou o ē na fuafua e folau i le Sami Atalani. O i inā na ou feiloaʻi ai iā Laurie, o lē na avea ma aʻu avā mulimuli ane. Na matou folau atu i motu o le atu Karipiane, ma ina ua mavae sina taimi o matou nonofo i Puerto Rico, ona matou toe foʻi loa lea i Europa. Na ma mananaʻo ma Laurie e suʻe se ʻalia failā e mafai ona ma folau ma nonofo ai. Ae na suia faafuaseʻi la ma fuafuaga ina ua valaaulia aʻu e auai i le vaegaʻau a Siamani, ae faatoʻā tolu masina o la ma saʻiliga.

A o toetoe lava oʻu alu i le vaegaʻau, ae ma faataua loa se atigi vaa faasaoola. A o faagasolo le 15 masina o laʻu auaunaga i le vaegaʻau, na ma faaipoipo ai ma Laurie ma fausia  le atigi vaa ina ia avea o se ʻalia. Na ma fuafua e nonofo ai ma faaauau ona ma matamata i le matagofie o le lalolagi. Peitaʻi, ina ua māeʻa mai laʻu auaunaga i le vaegaʻau a o leʻi uma lava ona fausia le vaa, ae matou feiloaʻi loa ma Molimau a Ieova ma amata ai ona matou suʻesuʻe le Tusi Paia.

I le taimi muamua, na ou mafaufau e lē manaʻomia ona faia ni suiga i loʻu olaga. O lea ua uma ona ma faaipoipo ma laʻu avā, ma ua ou lē toe ulaula foʻi. (Efeso 5:5) Na ou manatu o se mea tāua tele le faimalaga solo i le lalolagi, ma matamata i foafoaga ofoofogia a le Atua.

Ae o le mea moni, sa manaʻomia ona ou faia ni suiga aemaise lava i oʻu uiga. O loʻu faamaualuga ma le fia tutoʻatasi na alu uma ai loʻu taimi ma le malosi, e faaleleia ai oʻu tomai ma mea na ou faia. Na ou manatu ifo lava na o loʻu lava lelei.

I se tasi aso, na ou faitau ai i le Lauga taʻutaʻua a Iesu i le Mauga. (Mataio mataupu 5-7) Muamua lava, ou te leʻi malamalama i le fetalaiga a Iesu e faatatau i le mauaina o le fiafia. O se faaaʻoaʻoga, na ia fetalai e fiafia i latou o ē fia aai ma fia inu. (Mataio 5:6) Na ou tomānatu pe faapefea i se tasi o loo fia ʻai ma fia inu ona maua le fiafia. A o faaauau laʻu suʻesuʻega, na ou iloa ai e iai o tatou manaʻoga faaleagaga, peitaʻi e manaʻomia ona tatou lotomaulalo e faailoa atu lenā manaʻoga ina ia mafai ona faamalieina. Na fetalai Iesu: “E fiafia o ē e naunau i mea faaleagaga.”—Mataio 5:3.

Na amata ona faia a ma suʻesuʻega faale-Tusi Paia ma Laurie a o ma iai i Siamani, a o ma leʻi siitia atu i Falani ma ō atu ai i Italia. Ae o so o se mea lava e ma te ō i ai e matou te feiloaʻi ai lava ma Molimau a Ieova. Na ou maofa i lo latou alolofa ma le autasi, ma o i latou o se ʻauuso moni i le lalolagi aoao. (Ioane 13:34, 35) Mulimuli ane, na ma papatiso ma Laurie o ni Molimau a Ieova.

Na faaauau ona ou faia ni suiga i oʻu uiga ina ua māeʻa loʻu papatisoga. Na ma filifili ma Laurie e folau i talafatai o Aferika, ma agaʻi atu i le Vasa Atalani e oo atu i Amerika. A o ma iai i si o ma tamaʻi vaa i le vasaloloa, na ou iloa ai loʻu faatauvaa pe a faatusatusa atu i Lē na foafoaina mea. Talu ai na tau leai ni aʻu mea sa fai i luga o le vaa, o le ala lea na tele ai loʻu taimi e faitau ai le Tusi Paia. Na sili ona ou maofa i tala o le soifuaga o Iesu a o iai i le lalolagi. E ui o ia o se tagata lelei atoatoa ma e lē mafaatusalia ona tomai, ae e leʻi uaʻi atu o ia iā te ia lava. E leʻi manatu Iesu mo lona lava lelei, ae na manatu mo le lelei o lona Tamā i le lagi.

A o oʻu mafaufau loloto i le faaaʻoaʻoga a Iesu, na ou iloa ai e tatau ona ou faamuamua le Malo o le Atua i loʻu olaga, ae e lē na o le tau ina faaaofia i mea ou te manaʻo e fai. (Mataio 6:33) Ina ua ma taunuu ma Laurie i Amerika, na ma filifili ai loa ma te nonofo i inā ma uaʻi atu i la ma tapuaʻiga.

I le taimi muamua a o ou faalagolago iā te aʻu lava, ou te leʻi mautonu i aʻu filifiliga. Peitaʻi i le taimi lenei, ua ou maua le puna o le atamai moni e taʻitaʻia ai aʻu. (Isaia 48:17, 18) Ua sili atu ona aogā loʻu olaga i le taimi lenei, auā ua ou tapuaʻi iā Ieova ma aʻoaʻo isi ina ia iloa o ia.

O lo ma faatatauina ma Laurie o taʻiala o le Tusi Paia, ua faamalosia ai la maʻua faaipoipoga. Ua faamanuiaina foʻi i maʻua i sa ma tama teine aulelei, o lē ua tuputupu aʻe ma iloa Ieova ma alofa iā te Ia.

E ui i lea, e lē faapea na sologa lelei ai pea mea uma i o ma olaga. Peitaʻi, o le fesoasoani a Ieova ua ma maumauaʻi ai e ma te lē faavaivai i la ma auaunaga ma maufaatuatuaina pea o ia.​—Faataoto 3:5, 6.