Sa oʻu fanau ma ola aʻe i se nuu maotua i le aai o Roma lea e toʻatele ai tagata matitiva. Sa matuā faigatā le olaga i inā. Ou te leʻi mafuta i loʻu tinā moni, ma sa leaga foʻi la ma faiā ma loʻu tamā. O lea, sa ou ola aʻe ai i le auala e ola ai tagata i lenā nofoaga.

E sefulu ane oʻu tausaga ua ou masani i le gaoi. O le 12 o oʻu tausaga na ou sola ese ai mai loʻu aiga mo le taimi muamua. E tele taimi e aumai ai aʻu e loʻu tamā mai i le ofisa o leoleo ma ave i le fale. E matou te finau soo ma tagata, ma na ou ita i so o se isi. I le 14 o oʻu tausaga, na ou alu ese ai ma lē toe foʻi i lo matou aiga. Na amata ai loa ona ou faaaogāina fualaau faasāina ma nofonofo solo i le auala. I le pō ou te talepeina ai se faitotoʻa o se taavale ou te moe ai, ma pe a oo i le vaveao ona saʻili lea o se nofoaga e iai se vai ou te tāʻele ai.

Sa matuā lelei lava laʻu gaoi, e aofia ai le seʻi ato ma le talepe fale i le pō. O le leaga tele o loʻu talaaga, na valaaulia ai aʻu e se kegi leaga e auai atu i le latou vaega ma o i inā na maua ai loʻu “avanoa” e gaoia ai faletupe. O loʻu uiga fia malosi, sa vave ai ona avea aʻu ma sui faaaloalogia o le kegi. Ou te alu ma ave laʻu fana i taimi uma, ma ou te tuuina i lalo o loʻu aluga pe a ou moe i le pō. O le faaaogāina o fualaau faasāina, gaoi, gagana masoā, amioga lē māmā ma faiga sauā, sa avea ma aʻu vaisū. Na suʻe solo ma taofia aʻu e leoleo, ma e tele taimi na lokaina ma toe tatala ai aʻu mai i le falepuipui.

Ina ua tatala aʻu mai i le fale puipui i se tasi taimi, na ou manaʻo ai e asia se tasi o uso o loʻu tinā. Sa lilo i oʻu manatu, ua avea o ia ma lana fanau e toʻalua ma Molimau a Ieova. Na latou valaaulia aʻu matou te ō i le sauniga, ma ona o loʻu naunau fia iloa, na ou manaʻo ai e ō ma i latou. Ina ua matou taunuu i le Maota mo Sauniga, na ou manaʻo ai e nofo latalata i le faitotoʻa  ina ia ou mataʻia tagata eseese e fegasoloaʻi i fafo ma totonu. Sa taga pea laʻu fana i loʻu ofu.

O le sauniga lenā na suia ai loʻu olaga. Sa pei lava e ese se isi lalolagi o loo oʻu iai. O tagata laufofoga fiafia ma o latou uiga faaleuō na faafeiloaʻia aʻu ma le māfana. Ou te manatua pea le foliga agalelei ma le faamaoni o Molimau a Ieova. O le mea moni, e mātua eseese mamao mai i le olaga lea ou te ola ai.

Na amata ai loa ona ou suʻesuʻeina le Tusi Paia ma Molimau a Ieova. O le tele o mea na ou aʻoaʻoina, na ou iloa ai e tele ni suiga e tatau ona faia i loʻu olaga. Na pāʻia loʻu loto i le manatu o loo i le Faataoto 13:20 e faapea: “O lē e savali ma tagata atamamai, e atamai ai o ia, a o lē e faifaimea faatasi ma tagata vālea, e leaga ai lava o ia.” Na fesoasoani lenā manatu iā te aʻu e faamamao mai ai mai i le kegi. Sa lē faigofie, ae ona o le fesoasoani a Ieova na mafai ai ona ou taulau.

Na ou taumafai foʻi e teuteu oʻu foliga vaaia ma faaleleia laʻu amio. Na tele aʻu taumafaiga ina ia taofia ai laʻu ulaula tapaa, faaaogāina o fualaau faasāina, ʻoti loʻu lauulu uumi, aveese oʻu tautaliga, ma lē toe tautala i gagana masoā. O le taimi muamua lea i loʻu olaga ua mafai ai ona ou pulea aʻu gaoioiga.

Ou te lē fiafia e faitau ma suʻesuʻe, ma o se luʻi le uaʻi atu i mea na ou suʻesuʻeina mai i le Tusi Paia ma taumafai e faatatau i loʻu olaga. A o faaauau ona fai aʻu taumafaiga, sa faasolosolo mālie foʻi ona oʻu alofa iā Ieova. Peitaʻi, sa iai foʻi se isi faalogona na mapuna aʻe, o le faasalaina lea o aʻu e loʻu lotofuatiaifo. Ua iai ou lagona nofosala, ma ua ou lē mautonu pe e moni e faamagaloina e Ieova aʻu mai i mea leaga uma na ou faia. I lenā taimi faigatā, na faamalosia ai aʻu i le faitauina o le tala e faatatau i le faamagaloina e Ieova o agasala matuiā, na faia e le Tupu o Tavita.​—2 Samuelu 11:1–12:13.

O le isi luʻi sa ou fesagaʻia o le faailoa atu lea i tagata o loʻu talitonuga e ala i le galuega talaʻi. (Mataio 28:19, 20) Na ou popole neʻi oʻu fetaui i se tagata na ou faatigā i ai i le taimi ua teʻa. Peitaʻi, na faasolosolo mālie ona ou faafetaiaʻia lenā lagona. Na faamalieina aʻu i le fesoasoani i isi e iloa le Tamā alofa i le lagi, o lē e matuā faamagaloina agasala.

Ua faasaoina loʻu ola ona o le aʻoaʻoina o ala o Ieova. O le toʻatele o aʻu uō sa iai ua maliliu po o lokaina foʻi i le falepuipui, peitaʻi o lea ua ou ola i se olaga faamalieina ma tulimataʻi se lumanaʻi matagofie. Ua aʻoaʻoina aʻu ia lotomaulalo, usitaʻi ma pulea loʻu ita. O le iʻuga, ua ou olioli ai i se faiā lelei ma tagata. Ua ou faaipoipo atu iā Carmen o se avā lelei, ma o loo ma olioli faatasi e aʻoaʻo isi e faatatau i le Tusi Paia.

O lea ua maua laʻu galuega totogi, ma o nisi taimi e aofia ai le faamāmāina o faletupe ae ua ou lē toe gaoia.