Maʻi Suka—Pe e Mafai Ona E ʻAlofia Lou Aafia Ai?
UA MATUĀ faatupulaʻia le aafia o tagata i le maʻi suka, ma o se faamaʻi ua aafia ai le lalolagi atoa. E lua ituaiga o maʻi suka. O le ituaiga 1 e amata mai i le taimi a o laʻitiiti, ma e leʻi maua e fomaʻi se vaifofō. Peitaʻi, o lenei mataupu e uaʻi atu i le maʻi suka ituaiga 2, lea ua maua ai le pe ā ma le 90 pasene o tagata maʻi suka i le lalolagi.
I le taimi muamua, na manatu e na o tagata matutua e aafia i le maʻi suka ituaiga 2, peitaʻi talu ai nei na iloa ai ua aafia ai foʻi ma tamaiti. Ua taʻua e nisi tagata atamamai, e mafai ona e ʻalofia lou aafia i le maʻi suka ituaiga 2. O lea, o le iai o sina malamalamaga i lenei faamaʻi mataʻutia, e mafai ona fesoasoani iā te oe. *
O le ā le Maʻi Suka?
E māfua lenei faamaʻi pe a maualuga le suka i le toto. O lenei faamaʻi e faaleagaina ai le faagasologa masani o le suka mai i alātoto agaʻi i sela. O le iʻuga, e faaleagaina ai totoga tāua o le tino, lē sologa lelei ai le faataamilosaga o le toto, ma o nisi taimi e iʻu ai i le tipi ese o tamatamaʻivae po o le vae, tauaso, po o le aafia foʻi o fatugaʻo. O le toʻatele o tagata maʻi suka ua maliliu, e māfua mai ona ua pē faafuaseʻi le fatu po o se vaega o le tino.
O le tino puta, o se tasi lea o māfuaaga autū o le maʻi suka ituaiga 2. E talitonu nisi tagata atamamai, o le tele o le gaʻo i le manava ma suilapalapa e iloa ai e telē se avanoa e aafia ai se tasi i le maʻi suka. E lē gata i lea, o le tele o le gaʻo i le atealii ma le ate e ono faalavelavea ai le faagasologa masani o le suka i le tino. O lea, o ā mea e tatau ona e faia ina ia ʻalofia ai lou aafia i lenei faamaʻi?
Tolu Auala e Ono ʻAlofia ai le Aafia i le Maʻi Suka
1. Ia siaki lou suka pe afai ua i se tulaga lamatia. O le sili teisi o lou suka mai i le tulaga sa tatau ona iai lea e taʻua o le prediabetes, e masani lava ona iʻu atu i le maʻi suka ituaiga 2. O nei tulaga uma e lē lelei, ae e iai le eseesega. E ui lava e iai fesoasoani e faaitiitia ai aafiaga o le maʻi suka ituaiga 2, ae e lē o maua lava se vaifofō e foʻia atoatoa ai. I le isi itu, ua mafai ona toe foʻi le suka o nisi sa aafia i le prediabetes i le tulaga e tatau ona iai. O le prediabetes e lē faigofie ona iloa ni ona āuga, ma e ono maua ai se tasi e aunoa ma lona iloa. Ua taʻua i ni lipoti e faapea, e tusa ma le 316 miliona tagata i le lalolagi aoao ua maua i le prediabetes, ae o le toʻatele o i latou e lē o iloaina. O se faataʻitaʻiga, e tusa ma le 90 pasene i latou i le Iunaite Setete lava ia e lē o iloaina ua maua i le prediabetes.
E lē tatau ona e manatu māmā i le prediabetes ona e lē gata e maua ai i le maʻi suka ituaiga 2, ae e ono iʻu atu foʻi i le maʻi o le mafaufau. Pe afai e te tino puta, e te lē toʻaga e faamalositino, pe e te tupuga mai foʻi i se aiga e maʻi suka, atonu la ua e maua i le prediabetes. Ae e mafai ona e iloa le mea moni pe a siaki lou toto.
2. Filifili meataumafa paleni. Pe a talafeagai ma lou tulaga, e mafai ona e maua aogā mai i le faatatauina o manatu o loo mulimuli mai: Ia faaitiitia au meataumafa, ʻai i le falaoa enaena, araisa, pasta, aano o manufasi e lē tele le gaʻo, iʻa, beans, ma isi fualaau ʻaina. Nai lo o le inu o vai suamalie ma meainu aava, ia inu le vai auli, lautī, po o le kofe.
3. Toʻaga e faamalositino. O le faagaoioi o le tino e mafai ona faaitiitia ai le suka i lou toto faapea le tino puta. Na fautua mai se tagata atamai, ia faaitiitia le taimi e matamata ai le TV ae fai ai sina faamalositino.
E lē mafai ona e suia lou tupuaga, ae e mafai ona e suia le auala e te ola ai. E mautinoa o le a tauia a tatou taumafaiga pe a faia le mea sili mo lo tatou soifua mālōlōina.
^ pala. 3 E lē o fautuaina e lenei lomiga o le Ala Mai! ni meataumafa po o ni faamalositino patino. E ao i le tagata lava ia ona talanoa ma lana fomaʻi, a o leʻi faia se filifiliga e tusa ai ma auala e faaleleia ai lona soifua mālōlōina.
