Pe na Teʻi Lava ua Iai?

Se ʻAuiʻa Tele

● E silia i le miliona tagata e maliliu ma pe tusa ma le 50 miliona e manunuʻa i tausaga taʻitasi, ona o faalavelave tau taavale. Peitaʻi, e faitau miliona iʻa e mafai ona feʻausi faatasi o se ʻauiʻa e aunoa ma le fetoʻai. E faapefea ona faia faapea e iʻa, ma o le ā e tatou te aʻoaʻoina mai ai i le auala e faaitiitia ai le lavevea o taavale?

Seʻi Iloilo: E iloa e se ʻauiʻa mea o loo siʻomia ai i latou e ala i o latou mata, ma se sela faapitoa e lagona ai le aave e sau mai i leo. E latou te faaaogā nei sela ina ia iloa ai le itu o loo iai isi iʻa, ona gaoioi lea e pei ona taʻua i lalo:

1. Feʻausi faatasi. E latou te faatutusa le saoasaoa e aau ai e fua i isi iʻa o loo i autafa, ma taumafai e faatumau lo latou va mai i na iʻa.

2. Felataʻi. E latou te faalatalata atu i iʻa ua amata ona mamao ese atu.

3. Aua neʻi fetoʻai. E latou te fesuiaʻi itu e aau agaʻi i ai ina ia ʻalofia ai le fetoʻai ma isi iʻa.

E faavae i na masaniga e tolu a se ʻauiʻa, ua faia ai e se kamupani gaosi taavale i Iapani ni tamaʻi taavale e faatonutonuina, e mafai ona malaga solo e aunoa ma le fetoʻai. Nai lo o ni mata, e faaaogā e nei taavale ia tekinolosi tau fesootaʻiga, ma e nai lo o se sela e lagona ai le aave e sau mai i leo, e faaaogā e nei taavale se laser e iloa ai le saoasaoa. E ioe le kamupani o lenei tomai faaonapōnei, o le a fesoasoani iā i latou e gaosia ai taavale e mafai ona faimalaga “e aunoa ma le lavevea,” ma “saosaolaumea i se siʻomaga e sologa lelei le feoaʻiga a taavale.”

Ua taʻua e Toshiyuki Andou, o le inisinia sinia e faia taavale ua faapolokalameina: “Ua matou faataʻitaʻia le amioga a se ʻauiʻa [e ala] i le faaaogāina o tekinolosi fou faaonapōnei. I lenei vaitaimi ua tele ai masini faaonapōnei, e anoanoaʻi mea e tatou te aʻoaʻoina mai i le masaniga a se ʻauiʻa tele.”

O le ā sou manatu? Pe na teʻi lava ua iai se ʻauiʻa tele? Pe na foafoaina?

[Ata i le itulau 19]

Fish: © Ralf Kiefner/age fotostock