O le ā le Uiga “o le Mata e Sui ai le Mata”?

PLAY

Le Tali a le Tusi Paia

O le tulafono “o le mata e sui ai le mata” o se vaega o le Tulafono a le Atua na avatu e Mose iā Isaraelu anamua, ma na toe sii mai e Iesu i lana Lauga i le Mauga. (Mataio 5:38; Esoto 21:24, 25; Teuteronome 19:21) O lona uiga pe a faamasinoina le tagata solitulafono, e tatau ona fetaui lelei le faasalaga ma lana solitulafono. a

Na faatatau lenei tulafono iā i latou na faia ma le loto i ai gaoioiga e faamanuʻalia ai le isi tagata. O loo taʻua i le Tulafono a Mose le faasalaga o se tagata e faia ma le loto i ai se solitulafono: “O le gau e sui ai le gau, o le mata e sui ai le mata, o le nifo e sui ai le nifo; o le mea na lavea ai lea tagata, o le mea foʻi lea ia faia iā te ia.”—Levitiko 24:20.

O le ā le fuafuaga o le tulafono “o le mata e sui ai le mata”?

O le tulafono “o le mata e sui ai le mata” e leʻi faatagaina ai se tasi e fai e ia lana lava tauimasui. Ae na fesoasoani i faamasino ia faia faasalaga e talafeagai, e lē mamafa tele pe māmā tele foʻi.

Na avea foʻi lenā tulafono ma lapataʻiga e taofia ai so o se tagata e fuafua ma le loto i ai e faamanuʻalia se isi. Ua faapea mai le Tulafono, “Ona fefefe ai lea o ē ua totoe [o i latou e tausia le faamasinoga a le Atua] o le a faalogo i ai, ma latou lē toe faia ai se mea leaga faapea i lou nuu.”—Teuteronome 19:20.

Po o ola Kerisiano i lalo o le tulafono “o le mata e sui ai le mata”?

E leai, e lē o toe ola Kerisiano i lalo o lenei tulafono. O se vaega o le Tulafono a Mose lea na faalēaogāina ina ua maliu faataulaga Iesu.—Roma 10:4.

Ae e ui i lea, o lenei tulafono ua tatou iloa ai le silafaga a le Atua i mea. O se faaaʻoaʻoga, o loo faaalia i lenā tulafono le tāua iā Ieova o le faamasinotonu. (Salamo 89:14) O loo faaalia ai foʻi ana tapulaa taufaamasinoga, o lona uiga, e aʻoaʻia le tagata faimea sesē i se auala talafeagai.—Ieremia 30:11.

Manatu sesē e faatatau i le tulafono “o le mata e sui ai le mata”

Manatu sesē: O le tulafono “o le mata e sui ai le mata” o se tulafono sauā.

Mea moni: E leʻi faatagaina i lenei tulafono ni faiga sauā. Ae pe a faatatau lelei lenei tulafono, o lona uiga e faatoʻā mafai ona faasalaina e faamasino se tasi na faia se solitulafono, pe a uma ona latou iloiloina tulaga na aofia ai, ma le tele na faia ma le loto i ai e se tagata se solitulafono. (Esoto 21:28-30; Numera 35:22-25) O lea la, o le tulafono “o le mata e sui ai le mata” na fesoasoani e ʻalofia ai le faia o ni faasalaga matuiā.

Manatu sesē: O le tulafono “o le mata e sui ai le mata” ua faaauilumaina ai le tauimasui.

Mea moni: Ua taʻua i le Tulafono a Mose: “Aua e te tauimasui pe ita faamoemoe i fanau a lou nuu.” (Levitiko 19:18) Nai lo o le faaauilumaina e lenā tulafono o le tauimasui, ae na uunaʻia ai tagata ina ia maufaatuatuaina le Atua ma le faatulagaga faaletulafono na ia faatagaina e faasaʻo ai mea sesē.—Teuteronome 32:35.

Faasaʻo e Iesu manatu sesē

Na silafia e Iesu na iai i latou na faauigasesē le tulafono “o le mata e sui ai le mata.” Na ia faasaʻoina i latou e ala i lona fetalai atu: “Ua outou faalogo ua faapea mai le upu, ʻO le mata e sui ai le mata, ma le nifo e sui ai le nifo.’ Ae ou te fai atu iā te outou: Aua le tetee atu i le tagata amioleaga; ae a pō mai e se tasi lou alafau taumatau ia liliu atu i ai le isi.”—Mataio 5:38, 39.

Ia mātau fetalaiga a Iesu “ua outou faalogo ua faapea mai le upu.” E manino mai, na faasino atu Iesu i nisi o taʻitaʻi lotu Iutaia na aʻoaʻoina le tauimasui. Ua faapea mai Adam Clarke o se tagata atamai i le Tusi Paia: “E foliga mai na fai e tagata Iutaia lenei tulafono [o le mata e sui ai le mata] . . . ma māfuaaga e faatagaina ai le faia e le tagata lava ia o le tauimasui, ma iʻuga matuiā uma o le loto fia tauimasui.” O le uunaʻia e na taʻitaʻi lotu o le loto fia tauimasui ua latou faauiga sesē ai le māfuaaga o le Tulafono a le Atua.—Mareko 7:13.

Ae na faamatilatila e Iesu, o le alofa o le faavae autū lenā o le tulafono a le Atua. Na fetalai o ia: “ʻ Ia e alofa atu iā Ieova lou Atua . . .’ O le poloaʻiga silisili ma le muamua lenā. E faapena foʻi le poloaʻiga lona lua, ʻIa e alofa atu i lou tuaoi e pei o oe lava iā te oe.’ O nei poloaʻiga e lua, ua faavae ai le Tulafono atoa.” (Mataio 22:37-40) Na aʻoaʻoina e Iesu o le alofa e iloa ai ona soo moni ae e lē o le fia tauimasui.—Ioane 13:34, 35.

a O lenei mataupu silisili faaletulafono lea e taʻua i nisi taimi i se faaupuga i le gagana Latina o le lex talionis, na faaaogā i faiga faaletulafono i nisi o atunuu anamua.