“Auā e leʻi tuuina mai e le Atua iā i tatou le agaga e palaai ai, ae o le agaga e faamalosi ai, e alofa ai ma mafaufau lelei ai.”—2 Timoteo 1:7, Faaliliuga a le Lalolagi Fou.

 “Auā ua le foaiina mai e le Atua ia te i tatou le agaga e mataʻu ai, a o le agaga e faamalosi ai, ma alofa ai, ma pulea ai o tatou loto.”—2 Timoteo 1:7, Tusi Paia Samoa—Lomiga 1969.

 E mafai ona fesoasoani le Atua i se tagata ina ia maua le lototele e faia ai le mea saʻo. E lē finagalo le Atua ia oo i se tasi le uiga o le “palaai,” lea e mafai ona taofia ai le tagata mai i le faia o mea e faafiafiaina ai o Ia.

 Ia iloilo uiga e tolu o loo taʻua i le mau, ia e fesoasoani e aveesea ai le mataʻu po o le palaai.

 “Malosi.” Ua mafai e Kerisiano ona auauna ma le lototele i le Atua e ui i tulaga e ono lamatia ai. E latou te leʻi tuumuli ona o le mataʻu. (2 Korinito 11:23-27) Na faapefea ona tupu lenā mea? Na taʻua e Paulo, “O mea uma lava, ua ou maua le malosi mai iā te ia o lē na foaʻi maia iā te aʻu le mana.” (Filipi 4:13) E mafai e le Atua ona foaʻi mai i ana auauna le “mana lea e sili atu,” ina ia manumalo ai i so o se luʻi.—2 Korinito 4:7.

 “Alofa.” O le matuā alofa o se Kerisiano i le Atua, e fesoasoani iā te ia e lototele e faia ai le mea saʻo. I se tulaga talitutusa, o le alofa i tagata e uunaʻia ai se Kerisiano e faamuamua manaʻoga o isi nai lo o ia, e tusa pe e feagai ma teteega po o se tulaga e ono lamatia ai.—Ioane 13:34; 15:13.

 “Mafaufau lelei.” I le Tusi Paia, e masani ona faasino atu le mafaufau lelei i le tomai o se Kerisiano e faia ai filifiliga e faavae mai i le Tusi Paia. O le tagata e mafaufau lelei, e mafai ona fetuutuunaʻi e oo a i taimi e feagai ai ma faigatā. E mafai ona ia faia filifiliga ia e atagia ai le silafaga a le Atua, auā e na te iloa e sili atu ona tāua lana faiā ma le Atua, nai lo o manatu o isi.

 O le tusi lona Lua o Timoteo na tusia e Paulo, ma o lana tusi na avatu i lana uō pele ma lē na la galulue faatasi o Timoteo. I lenei tusi na ia faalaeiauina ai Timoteo ia galue mamafa pea i le faiva. (2 Timoteo 1:1, 2) Atonu na matamuli Timoteo ma na ono taofia ai o ia mai i le faia o galuega i le faapotopotoga Kerisiano. (1 Timoteo 4:12) Peitaʻi, na faamanatu atu e Paulo iā Timoteo, ua iā te ia se meaalofa po o se tofiga faapitoa i le auaunaga i le faapotopotoga. Na ia uunaʻia Timoteo e faaaogā lona tulaga o se ovasia i le faapotopotoga, pe a talaʻia le tala lelei ma pe a fesagaʻia tulaga faigatā ona o lona faatuatua.—2 Timoteo 1:​6-8.

 E ui na muaʻi tusia nei upu mo Timoteo, ae ua faamautinoa mai ai iā i latou uma e fia auauna i le Atua i aso nei, o le a Ia foaʻi mai le fesoasoani e latou te manaʻomia, ina ia taulau ai i le auaunaga iā te Ia e tusa lava po o ā luʻi.