A o feʻausi le ituaiga o fai lea e taʻua o le manta, e faamaga lona gutu ma puʻea ai le tele o meaola ninii ma le suāsami. Pe a oo atu nei mea i le faamamā o loo i le gutu o le fai, ona faamamā ese lea o meaola ninii e fai ma ana meaʻai, ae toe sau i fafo le suāsami e ui mai i ona filauvi. E mafai e lenei fai ona faamamā ese meaola e sili atu ona ninii, nai lo o mea valavala o loo i le faamamā i lona gutu. Ua faapea mai Ed Yong, o se tusitala o mataupu faasaienisi, “o lenei faiga e manatu i ai o se mea e lē mafai ona tupu.”

 Ia Mātau: O le faamamā o loo i lenei ituaiga o fai, e pei o ni ʻaso faaofuofu se lima, ma o na ʻaso taʻitasi e foliga e pei o se selu e lua ona itu. E faasasaga nifo i luma po o tua. Pe a alu atu le suāsami, e alu i luga po o le vā o nei nifo, ma māfua ai ona vivili le suāsami ma maua ai ni mea e pei o ni tamaʻi vili.

 Pe a oo atu meaola ninii po o isi meaʻai i pito o le faamamā, ona toe fiti mai lea ma tafe atu i le faaʻī o le fai, ma faigofie ai ona folo. E oo lava i meaola e matuā ninii lea e mafai ona ofi i mea valavala o le faamamā, e tafe atu i le faaʻī ma avea ma meaʻai a le fai. E māfua ona tupu lenā mea, ona e fesoasoani tamaʻi vili o loo iai i le faamamā e unaʻi mai i luga nei meaola ninii ma tafe saʻo atu ai i le faaʻī. O lenei faamamā, ua mafai ai e le fai ona puʻea ma ai meaola ninii, lea na ono mafai ona sao mai i mea valavala o le faamamā ma toe foʻi atu i le sami.

 E lē gata i lea, o lenei auala e faamamā ma maua ai e le fai ana meaʻai, e ʻalofia ai le puni o lona faamamā ma faatumauina ai pea lona mamā, e tusa po o le ā le saoasaoa e feʻausi ai ma le tele o meaola ninii e na te ʻaia.

 Ua taumafai tagata suʻesuʻe e faataʻitaʻi i le faamamā o le fai, ma faia ni faamamā e faamamā ai le suāvai lafoaʻi ma uga ninii lea e faaleagaina ai le suāvai.

 O le ā sou manatu? Pe na teʻi lava ua iai le faamamā o le fai e taʻua o le manta? Pe na foafoaina?