Ilamoommohu Meksikote, Chiyapasi gashshooti giddo Sani Huwani Chankalayito yinannihu shiimu katamiraati. Ayiddiˈya, Maya sirchi giddo Choli yinanni gaˈre widooti. Anniˈyanna amaˈya 12 ooso ilino; insa giddo ani ontikkiho. Anje noommo woyite, aninna roduuwiˈya Yihowa Farciˈraasine ledo Qullaawa Maxaafa xiinxallinoommo. Ikkollana, wedellimmaˈya yannara Qullaawu Maxaafi amaale harunsa hoogaˈya gaabbissannoe.

 Tonaa sase diro ikkieta, jingilli assitanno xagga adhanna moora hanafummo. Hakko diriˈyanni, mininni fule bayichunni bayicho haˈreemmoha ikkummo. Tonaa lee diro ikkieta, maariwaanu irshi giddo loosa hanafummo. Hakkiicho mittu diri geeshsha loosoommo; mitto hashsha, lowo maariwaana yowolote hogombe haˈnanni heeˈneenna, jingilli assitanno xagga doyissitanoti wole gaamo massaara qodhite dagge siˈunke. Insa massaara tokkossuta lubboˈya gatisiˈrate kubbe wayi giddora eummo; hakkiinni waa daahe wayi giddonni fulummo. Gedensoonni, xooqe Ameerika haˈrummo.

 Ameerikahono jingilli assitanno xagga daddalanna jaddo loosa diaguroommo. Tonaa honse diro ikkieta, manna mulqiˈrootto hattono shaate woˈnaalootto yine kassanse usurrie. Usuru mine, jaddo loossanno gaamo ledo karsame jaddo lede looseemmoha ikkummo. Konni daafira, gashshaano Pensiliveeniyaho, Luwisibergi yinanniwa qorophine agarrannihu usuru minira massitue.

 Luwisibergi usuru mine, akatiˈya roore anganni fuli. Mitte jaddo loossanno gaamo malaate bisoho naqqasiˈroommo daafira, usuru mine hattee gaamo miilla ledo mulenni egennamummo. Roore shittanna mannu ledo xaa xaa ganameemmoha ikkummo. Mitto barra, usuru mini nafara gaamo baxxine ganammummo. Beeziboole godoˈlinanni dullinninna ispoorte loonsanni siwiillanni nafa ganammoommo. Ganansho uurrisate, usuru mini agaraasine hindiiddissanno gaaze horoonsiˈrate geeshsha iillitino. Hakkunni gedensaanni, usuru mini gashshaano lowo geeshsha qorophine agarranniwa horo bushino usuranyi heeˈranno kifile eessitue. Hanqe gobba gudeemmo; qoleno xonameemmo. Manna shiimu coyira nafa ganeemmo. Isinni manna gana hagiirsiissannoe. Hatte yannara, asseemmo coyira horo digaabbeemmo.

 Hattenne qorophine agarranni kifilera usurame noommo yannara, roore woyite kifileˈyanni difuleemmo. Hakko daafira, yanna sayisiˈrate Qullaawa Maxaafa nabbawa hanafummo. Gedensoonni, mitte usuru mini agaraasincho Uullate Aana Gannatete Hegerera Heeˈra Dandaatto yaanno maxaafa uyitue. a Qullaawa Maxaafa xiinxallate kaaˈlannoha konne maxaafa nabbawummoti, anje Yihowa Farciˈraasine ledo Qullaawa Maxaafa xiinxallummo waro rosoommoha lowo roso qaagummo. Hakkiinni, finqillete akatiˈyanni kainohunni heeshshoˈya mageeshshi geeshsha anganni fultinoro hedummo. Qoleno mininke mannire hedummo. Lame roduuwiˈya Yihowa Farciˈraasine ikkino daafira togo yee hedummo: ‘Insa hegere heeshsho afiˈraraati. Ane mayi hoolannoeyya?’ Heeshshoˈya biddi assiˈrate murciˈre kaoommohu hakka woyiteeti.

 Ikkollana, heeshshoˈya biddi assiˈrate kaaˈlo hasiissannoeta afoommo. Konni daafira, balaxe kaaˈlannoe gede Magano Yihowa eeggifate huucciˈrummo. Hakkiinni, Ameerikaho nootera Yihowa Farciˈraasinete sinu biirora sokka borreesse, Qullaawa Maxaafa xiinxallisseˈˈe yuummo. Sinu biiro, qooxeessaho noo songo kaaˈlitannoe gede assitu. Hatte yannara, fiixa ikkinokki manni daye laˈˈaera difajjinanni; hakko daafira, qooxeessaho noo songonni mittu rodii sokka borreesse Qullaawu Maxaafi aana xintantino borro soyie; tini heeshshoˈya biddi assiˈrate roore kakkayissinoe.

 Aantete, lowo diro miila ikke heeˈroommota jaddo loossanno gaamo agure fulummo; konne assa anera loworeeti. Hatte yannara gaamote murrichino qorophine agarranni kifilera no; hakko daafira, boohaarshu yannara isiwa mare, Yihowa Farciˈraasincho ikka hasiˈroommota kulummosi. Hakkiinni isi togo yiie: “Addinta Yihowa Farciˈraasincho ikka hasiˈroottoha ikkiro qarru dino. Maganu ledo noohe aantera mereero eˈˈe diafeemmo. Gaamote giddonni fula hasidhe calla yitanni noottoha ikkiro kayinni, iillannohe qarra afootto.”

 Hakkunni gedensaanni noote lame dirra giddo, usuru mini loosaasine akatiˈya biddi yaanni noota huwattu. Konni daafira, bashsho gede gadacha agurtue. Lawishshaho, usuru mini agaraasine hayishshiˈnanni kifile haadhe hadhannoe woyite anga kateenunni usura agurtue. Agaraasinete giddo mittu isinni, heeshshoˈya biddi assiˈraˈya agureemmokki gede jawaachishinoe. Usuru mininni fulammora albaanni noo diro, lowiidihu usuru minira mule noote hakkeeshshi geeshsha agarrannikki kaampe massinoonnie. Tonne diro usuramummo gedensaanni, 2004nni usuru mininni fulummo; hakkiinni usuranyu otobisenni Meksiko haaˈne haˈnie.

 Meksiko iillummo gedensaanni mulenni, Yihowa Farciˈraasineti Gambooshshu Addaraashe noowa hase afummo. Mite yee gambooshshe haˈroommohu usuru mini yuniforme uddiˈreeti; korkaatuno nooeti garu uddano hattee callaati. Suudiˈya hakkeeshsha baxisannoha ikka hoogirono, Yihowa Farciˈraasine faasiiqqe haadhinoe. Danchummansa laummoti, addu Kiristaani mereero noommota huwatummo. (Yohaannisi 13:35) Hakko barranni, songote cimeeyye Qullaawa Maxaafa biddiitto xiinxalleemmo gede qixxaawo assitue. Mittu diri gedensaanni, Wocawaaro 3, 2005nni cuuame Yihowa Farciˈraasincho ikkummo.

 Arfaasa 2007nni hanafe, aganu giddo 70 saate mannaho Qullaawa Maxaafa rosiiseemmoha woˈma yanna sawaakicha ikkummo. Hakkiinni 2011nni, Seenne Adhitinokki Roduuwira Qixxaawinohu Qullaawu Maxaafi Rosi Mine (xa Maganu Mangiste Sawaakooti Rosi Mine yinanni) rose maassamummo. Kuni rosu mini songote giddo uyinoonnie looso looseemmo gede lowo geeshsha kaaˈlinoe.

 Hakkiinni 2013nni, kaajja minaamaˈya Piilaari adhummo. Ise albi heeshshoˈya hiittootero kuleemmose woyite, haariintino gede assite ‘Ani tenne diammaneemma’ yitanno. Korkaatuno bashsho ikkeemmo gede ikke diegennoommo. Aninna minaamaˈya, ani techo soorrame togoo mancho ikkaˈya Qullaawu Maxaafi mannu heeshsho biddi assate wolqa afiˈrinota buuxissanno yine ammanneemmo.—Roomu Sokka 12:2.

 Yesuusi Luqaasi 19:10te “Manchi Beetti bainoha hasaranna gatisara dayino” yiino. Kuni qaali ane heeshsho giddo woˈmino. Xa ragu tunsinoe mancho diˈˈikkoommo. Qoleno bashsho gede manna digawajjeemmo. Qullaawu Maxaafi kaaˈlonni, heeshshoˈya hagiirru noota ikkitino, hattono mannu ledo dancha aante nooe; roorenkanni kayinni, Kalaqaanchiˈya Yihowa ledo dancha gede jaalooˈmoommo.