Zariina cuuante Yihowa Farciˈraasincho ikkituhu gedensaanni, lame seennese ammaˈnose garinni lossiˈrate Ruusiyunni gobbase Mereerima Iisiya higgino. Angate anje noose daafira, annisenna amase, hattono rodiisenna minaamasi ledo mitto mine heeˈra hanaffu. Annisenna amase ise qaaqquullisera Qullaawu Maxaafi halaale rosiissannokki gede hajajise. Qoleno insa qaaqquullese ise ledo Qullaawu Maxaafire hasaabbinoonte yiino.

 Zariina qaaqquullisera Yihoware ma garinni rosiissannoro seekkite heddu. (Lawishsha 1:8) Konni daafira, Yihowa biddishshanna hayyo aannose gede eeggifatte huuccidhu. Hakkiinni, huuccattose ledo sumuu yaannore assitino; ise qaaqquullise ledo gobbara fulte milli yitanno woyite dhagge ikkitannote Maganu kalaqo daafira kultannonsa. Togoohu haranchu hasaawi seennise Kalaqaanchu daafira lede afa hasiˈranno gede assino.

 Hakkiinni, Zariina Qullaawu Maxaafi Addinta Mayyee Rosiisanno? a yaanno maxaafinni qaaqquullisera ledde rosiissanno hayyo maˈlitu. Ise maxaafu aaninni guffanna xaˈmuwa noo gedeenni shiima woraqattara galchitu. Qoleno qaaqquullu borrote hedo roore huwata dandaanno gede kaaˈlate, wole shiima hedono ledde borreessitino. Hakkiinni hattenne woraqatta irsaasete ledo, biso hayishshiˈnanni kifilera noote uduunne hayishshiˈnanni maashine hunda maaxxu. Seennise hatte kifile eanno woyite, borro nabbawe kae xaˈmuwate dawaronsa borreesse woranno.

 Zariina wolewa mine afidhe qaaqquullese adhite fultara albaanni, Qullaawu Maxaafi Roso yaanno maxaafita lame fooliishsho insa ledo konni garinni xiinxalla dandiitino. Fulte martinowa kayinni qarrisannohu nookkiha qaaqquullese lossiˈra dandiitino. Birra 2016nni lamenti seennise cuuamino; insa amansa hayyotenninna wodanchatenni Maganu Qaale rosiissinonsa daafira hagiirraammaho.