Mitte hige, Armeeniyaho, Arteri yinannihu woradu aliidi laˈˈaanchi mitte Yihowa Farciˈraasine songo towaatanni no. Kuni rodii hatti songo borrote gaare horoonsidhe gudumaaleho sabbaka hanaffinokkita afi. Songo konni garinni soqqantanno gede jawaachishate, Arterinna minaamasi Aana, Jireeri yinannihu wolu Yihowa Farciˈraasinchi ledo mittu shiimu katamira borrote gaare uurrissu. Insa gaare uurrissinohu lowo manni lekkatenni haˈrannowaati.

 Doogo saˈˈanno manni bayichonko hagiidhe borro adha hanafi. Ikkollana, ninke gibbannorino hakkawoyintenni tenne affu. Lamu qeesooti gaarenniwa kaˈe daggu; insa giddo mittu gaare lekkatenni gane tugi. Hakkiinni kuni qeesichi Arterira baqqaalla qawaadeenna maxanxaresi uulla ubbu. Arteri, Aananna Jireeri qeesoota hayi yitu; insa kayinni dimacciishshitino. Lamunku qeesooti gaare kakkaddu, borrono uulla billaallissu. Qeesootu roduuwa xontuhunna waajjishiishshuhu gedensaanni, agurte hadhu.

 Arteri, Aananna Jireeri qeesootu assitinore kuˈlate polisete xaawa martu. Insa ikkinore kultuhu gedensaanni, polisootahonna hakko loossannorira wolootaho haransite Qullaawu Maxaafire kultunsa. Hakkiinni sasenka polisete hajajaanchi biiro massininsa. Isi umo mayi ikkinoro calla afa hasiˈrino. Ikkollana, polisete hajajaanchi Arteri forsanna jawaata ikke heeˈrenni qawaandannasi sammi yee agurinota afiti, wolere agure Yihowa Farciˈraasine ammana daafira xaˈma hanafi. Konni garinni insa ledo shoole saate woˈma hasaawino! Polisichu macciishshinori lowo geeshsha dhagge ikkinosi daafira togo yiino: “Ammanate yaa tenneeti! Eˈniro kiˈnewa eate!”

 Layinki barra, Arteri xaano gudumaaleho sabbakanni heeˈreenna, beˈro ikkinore lainohu mittu jawu manchi isiwa kae dayi. Kuni manchi, Arteri cincino daafiranna rabbisiˈrinokki daafira galatisi. Qoleno beˈro lainori qeesootaho noosi ayirrinyi baalu baˈˈanno gede assinosita coyiˈrino.

 Hakko barra hawarro polisete hajajaanchi Arteri wirro polisete xaawa daanno gede woshshi. Isi xaano qeesootu assitinore agure, Qullaawu Maxaafi daafira wole xaˈmuwa xaˈmisi. Wolu lamu polisootino hasaawa macciishshitino.

 Aane noo barra, Arteri wirro polisete hajajaanchiwa mare Qullaawu Maxaafi aana xintantino viidiyubbanke leellishisi. Polisichu wolootu polisootino dagge viidiyo laˈanno gede woshshino.

 Qeesootu leellishshinohu bushu akati, batinyu polisooti mite yite Qullaawu Maxaafire rossanno gede faro fanino. Tini, polisootu Yihowa Farciˈraasine dancha illenni laˈanno gede assitino.