Calla qaaqqo lossidhannoti Desikaari yinanni mancho woˈma yanna suwisaancho ikkite soqqanshose halashshiˈrate heddu. Ise heedhannohu duucha manna angate anje qarrissannowa Venizuweelu gobbaraati. Ikkollana, ise suwisaancho ikkate mixidhino daafira, halchitino gede suwisaancho ikkitu. Ise tennenni baasa hagiidhite heedheenna, Koroonu fayya ubbu.

 Umo Koroonu fayya ubbu taaera, alba sabbakke egentinokki doogganni sabbaka Desikaarira lowo geeshsha qarra ikkitinose. Mannaho borrote sokkanni farciˈra gooddo ikkitinose. Qoleno insa qooxeessira interneetete waagi giira kaxxinoha ikkino daafira, ise viidiyote widoonnino soqqama didandiitino. Ise “Hexxo mudhoomma” yitino. Qoleno togo yitino: “Hedeweelcho soqqanshote guficho ikkannori tuncu yiie. Worba suwisaancho ikka didandeemma yaate hedoomma.”

 Hakkiinni, Arfaasa 2021, Venizuweelaho nooti Yihowa Farciˈraasine biiro addiha soqqanshote gaado qixxeessitu. Hakko aganira ontenta Qidaamenna Sambata mitu 60 raadoonetenna 7 televizhiinete xaawi widoonni doorantinota Qullaawu Maxaafi lallawo bubbete aana hosiinsoonni. Yihowa Farciˈraasine hasatto noonsa manni raadoonenna televizhiine faˈne hattee pirogiraame macciishshara koyissanno gede jawaachinshoonni. Sinu biiro, mittente lallawo ledo xaadooshshe afidhino xaˈmuwanna qummeeshshuwa qixxeessite, roduuwu manna silketenninna sokka borreessite hasaawissanno woyite horoonsidhanno gede assitino. Hakkiino saˈe, soqqanshote silkete sokka horoonsiˈnanni gede jawaachishshino; Venizuweelaho konni garinni soqqama batinyu Yihowa Farciˈraasinera wosincho coyeeti.

 Desikaari konni gaadira beeqqate lowo geeshsha quqquxantino. Ise hakkuyira albaanni borrote sokkanni farcidhe egentinokkiha ikkirono, woˈnaalte laˈˈate heddino. Ikkirono isera kaaˈlo hasiissinose. Desikaari, “Tekinooloje horoonsiˈnanni gara hakkey geya diafoomma” yite noore maaxxukki coyidhino. Hakko daafira, ise beettose rosiisie yitino; hakkii mulenni soqqanshote gaadira qixxaabbino.

 Desikaari raadoonetenninna televizhiinetenni sayinsanni lallawo macciishshanno gede egentinoha lowo manna silkete sokka borreessite koyissino. Hakkiinni afidhino gumi dhagge ikkinose. Koyissinohu batinyu manni lallawo macciishshino hattono xaˈmo xaˈminose. Lallawo faˈne macciishsha dandiinokkihu wolu manni kayinni mayi daafira rosiinsoonniro Desikaari xaˈmino. Desikaari togo yitino: “Lallawote yannara borreessiˈroomma qaagiishsha horoonsiˈre insara farciˈroommansa. Konni albaanni aganu giddo 5 manna sae wirro hasaawise diegennoomma; gaadu goofita kayinni, wirro hasaawisoomma manni 112 ikkino!” a

 Desikaari raadoonete lallawo macciishshitanno gede qachisera heedhannota Yihowa Farciˈraasincho ikkitinokki rodooseno koyissino. Ise togo yitino: “Rodooˈya maahoyye yite macciishshase dhagge ikkitinoe. Lamalate kiiro Sambatu barra, soodo 2:00 saatenni ise minira haˈreemma; hakkiinni lallawo hakko mitteenni macciishshineemmo. Ise pirogiraamete yannarano gedensaannino duucha xaˈmo xaˈmitanno.” Desikaari rodoo viidiyote widoonni Yesuusi Reyo Qaagooshsheno ayirrissino; qoleno ise interneetese Desikaari soqqanshote horoonsidhanno gede fajjitino.

 Desikaari togo yitino: “Yihowa lowo geeshsha galaxxeemmasi. Lowo geeshsha jawaachishshinoe daafira songote cimeeyyeno galaxxeemmansa. Insa soqqanshotenni wirro hagiirre afiˈreemma gede kaaˈlitinoe.” (Ermiyaasi 15:16) Desikaari xaano suwisaancho ikkite soqqantanni no; qoleno silkete sokkanni hasaawissino manna faana gante kaaˈlitanni no.