Chiili gobbara, mitte hige Osmaani minaamasinna qaaqqonsa ledo waammate bayichi qooxeessira borrote gaarenni sabbakanni no. Hakkiinni hedeweelcho, madaarsha fulinohu lowo manni muuziiqa luushshanni dayi. Hakkunni manni giddo mitootu, Osmaani qeesichansa lawinonsa daafira shiqqi yite rimmi assitusihu gedensaanni, “Qeesicha, agarre heeˈnoommohena, hawalle yannante dayitto!” yitusi.

 Osmaani qeesicha ikkinokkita kulansara woˈnaalinoha ikkirono, mannu kayinni koocanni noo daafira yiinori dileellinonsa. Mannu waammanniwa sae haˈrihunni shiima yanna gedensaanni, boodu manni galagale hige iso togo yiisi: “Qeesicha, waammanniwa marre agarre heeˈnoommohewe.”

 Mannu shiima geeshsha sammi yiita, Osmaani isi ayetironna hakko ma assanni nooro kulinsa. Insa qeesichinsa daa hooginotera giirante kaˈe, Osmaani togo yitusi: “Maahoyena, konni gamba yee noo mannira dagge Qullaawu Maxaafinni mitore dikulatto ballo?” Osmaanino tennera maahoyye yii.

 Isi insa ledo madaarshu bayichira haˈranni heeˈre, reyitino mancho daafira mitore xaˈminsa; qoleno kulannonsa qummeeshsha hedanni haˈrino. Osmaani waammanniwa iillihu gedensaanni, gamba yiino mannira isonooto egensiise kae, Yihowa Farciˈraasincho ikkino daafira dancha duduwo mannaho duduwate looso loosannota kulinsa.

 Hakkiinni, isi Yohaannisi Ajuuja 21:3, 4 nna Yohaannisi 5:28, 29 horoonsiˈre, Maganu hunda mannu reyara horonta hedinokkita kulinsa. Qoleno, Maganu reyitinore muli yannara kayisannotanna insano uullate aana hegerera heeˈrate faro afidhannota xawise kulinsa. Osmaani coyiˈre kaita, batinyu manni iso mare rimmi asse “Yihowa soyinoha dancha duduwo” kulinonsa daafira galattinosi. Hakkiinni isi borrote gaarewa higi.

 Madaarshu gedensaanni, wiˈlaanchu giddo mitootu borrote gaarewa dagge Osmaaninna maatesi Qullaawu Maxaafi xaˈmo xaˈmitino. Lowo saate hasaabbuhu gedensaanni, gaarete aana noota rooriidi borro adhite hadhino.