Mitto qorru barra, Kanaadaho Alberta gashshooti giddo, Boobi yinanni manchi makeenunni qaera haˈranni no. Kuni manchi mitte saatenni mite 100 kiilomeetire haˈranni heeˈreenna, makeenisira badhiidi gommi hedeweelcho dhoohi. Boobi gommu dhoohinota diafino; hakko daafira gattinosita onte kiilomeetire (3 mayile) haˈre gudate hedino.

 Boobi qooxeessaho nootera Yihowa Farciˈraasinete Gambooshshu Addaraashera soyino sokka, hakkiinni aane ikkinore kultanno. Isi togo yee borreessino: “Ontu wedellooti makeenunni dagge ani noommowa iillituti maskootensa heeshshi assite, makeeniˈyara gommu dhoohinota kultue. Hakkiinni insano anino makeenna doogote qacce fushshineenna gomma soorritaera kaˈu. Hakkawote, wolu gomminna makeena gotti assitanno kiriike nooero nafa diafoommo. Ani doogote qaccera gaareˈyara (bisu xeˈne noonsari ofoltanno gaarera) ofolleenna, insa makeeniˈyara woroonni saˈe, wolu gomminna kiriike noota affu; hakkiinni gomma soorritue. Hakkawote qorru lexxanni no; kaadeno ubbanni no. Kuri wedellooti dancha uduunne uddidhinoha ikkirono, gomma soorriteennae doogoˈya haˈra dandoommo. Wonaatiro konne umiˈyanni asse diafeemmo.

 “Kaaˈlitinoere kore onte wedelloota Yihowa Farciˈraasine galaxxeemmonsa. Insa hakkawote minunni mine hadhe sabbakkara hadhanni no. Kuri wedellooti wolu mannira rosiissannore uminsa assitannoreeti. Insa lowo qarrinni gatissinoe; konnira lowo geeshsha galaxxeemmonsa. Insa Maganu iima heeˈre soyinoe sokkaasine gede ikkitinoe!”