Biraazilete heedhannoti Dayeni Yihowa Farciˈraasinchootinna woˈma yanna Maganu Qaale sabbakkannote. Mitto barra silketenni Qullaawu Maxaafi sokka mannaho kultanni heedhe, mitto minaannanna minaama hasaawissino; insano lede afa hasiˈrino. Hakkii insa wole xeertiˈre noo qooxeessa doye haˈrara kainotanna marannowa korreenteno Interneeteno nookkita kulise. Qoleno hadhanno qarqarira mittuno Yihowa Farciˈraasinchi dino. Kuni minaanninna minaama Qullaawu Maxaafi hasaawansa sufate, maranno qachira noota dagate silke kiiro Dayenira uyi; hakkii mamoote mamoote hasaawannoronna ma yannara hasaawannoro hasaawe xaadisiˈri.

 Hasaawe wodhino saatera Dayeni bilbiltuta, minaanninna minaama silke kayisi! Hakkii lame lamala geeshsha, insa Dayeni ledo sase hige silketenni xaade Qullaawu Maxaafi hasaawa hasaawino.

 Hakkuyi gedensaanni kay, kuni minaanninna minaama silke dikayisino. Dayeni kayinni hexxo mudhantenni, lamalate giddo sase higge hattee dagate silke bilbiltanni kayisanno manni ledo Qullaawu Maxaafi hasaawa hasaabbanno. Konni garinni, Dayeni hakko qachira heeˈrannoha haammata manna Qullaawa Maxaafa xiinxallisa hanaffu.

 Mitto barra, Dayeninna minaannise silketenni mitto aja beetto Qullaawa Maxaafa xiinxallisanni heeˈreenna, mittu beetekiristaanete murrichira konne hasaawa macca gantannosi. Isi hasaawa seekke macciishsha hasiˈrino daafira, daye Qullaawu Maxaafi rosaanchira mule ofolli. Hakkii kuni murrichi Dayeninna minaannase hasaawiseemmo yii. Isi macciishshinore lowo geeshsha baxino daafira, isono xiinxallinsannisi gede xaˈmiˈri!

 Dayeninna minaannise, hakkuyi xeertiˈre noo qachira silketenni Qullaawa Maxaafa xiinxallisanno manni kiiro lexxite lee ikkitino; hakkuri giddo mittu aleenni kulliho beetekiristaanete murrichaati. Xiinxallanno manni giddo mitu isinni hattee dagate silkenni songote gambooshshe macciishsha hanafino. Mittu isinni Qullaawa Maxaafa xiinxallara daanno manni ofollara yee xarapheessa seekkino.

 Dayeninna minaannise Maganu Gashshooti sokka konni xeertote noo qachira duduwate faro afiˈrino daafira lowo geeshsha hagiidhino. Dayeni togo yitino: “Mittu manchi aye geeshsha xeertote heeˈrannoha ikkiro nafa, Yihowa hakku manchi dancha duduwo macciishshanno gede assa dandaanno.”