Iisiyaho heedhannoti Yaanme yinanniti mitte Yihowa Farciˈraasincho, mitto barra Mingije yinannita ille ballitino mancho doogo tayisse saˈanno gede kaaˈlituse. a Hakkiinni Mingije, “Galaxxeemmahe. Maganu maassiˈrohe!” yite galattuse. Hakkuyi gedensaanni Yaanme tenne mancho, ‘Xaande Qullaawu Maxaafire hasaambummoro ma lawannohe?’ yite xaˈmituse. Gedensoonni Mingije, halaalaancho songosiwa massannose gede Magano barru baala huuccidhanni keeshshitinota coyidhino. Ikkina ise hatto yite huuccidhanni keeshshitinohu mayiraati?

 Mingije, 2008nni jaalase koyisseennase mitte ballootu beetekiristaane hadhinota coyidhino. Ise hakko sabbankanna macciishshituhu gedensaanni, hiikko maxaafinni nabbawanni rosiisinoro qeesicha xaˈmitu. Hakkiinni qeesichu, halaalaanchu Maganu Qaalinni yaano Qullaawu Maxaafinni nabbawinota kulise. Mingije konne Maxaafa nabbawate lowo geeshsha halchitu. Hakko daafira, Chayinu bireelenni (ballootu borronni) qixxeessinoonniha 32 xiraaze afiˈrinoha Qullaawa Maxaafa afidhe mitu lewu agani giddo nabbabbe guddino. Mingije Qullaawa Maxaafa seekkite nabbabbanni hadhuti, beetekiristaanensara rosiinsannihu Sillaase rosi kapho ikkinotanna Maganoho Yihowa yinanni suˈmi noosita huwattu.

 Yanna lexxitanni hadhuta, Mingije beetekiristaanete noo manni ikkito giwissuse. Ise kuni manni Qullaawu Maxaafi yaannori ledo sumuu yee heeˈrannokkita wodanchitino. Lawishshaho, hakko ille afidhinorira haarote qinshoonni sagale uyine, ballootaho kayinni intanna gattino sagale uyinanni. Mingije togo mallaandanniti xissiissinose daafira, qooxeessaho wole beetekiristaane hasiˈra hanaffu. Ise addu Kiristaani songo noowa massannose gede Magano huuccidhinohu iseraati.

 Yaanme shaqqillunni kaaˈlitinose daafira, Mingije Qullaawa Maxaafa xiinxallate maahoyye yitu. Gedensoonni, Mingije mite yite Yihowa Farciˈraasine gambooshshe hadhu. Ise hakko barrita qaagge togo yitino: “Umo haˈroomma gambooshshe horo dihaweemma. Roduuwu baalunku faasiiqqe keere haadhue. Tini lowo geeshsha dhagge ikkitinoe. Ille balloommaha ikkirono, hakko mallaandannikkitanna baxillu woˈminota huwata dandoomma.”

 Mingije ayyaanaamittetenni lophanna gambooshshe ganyite daa hanaffu. Ise roorenkanni Maganu Mangiste faarso faarsiˈra baxxanno; kayinni ise nabbabbanno bireelenni faarso nookki daafira faarsa qarra ikkituse. Konni daafira, songote kaaˈlonni Mingije umiseha faarsote maxaafa qixxeessidhu. Ise xibbenna ontayina mittenta faarso 22 saate giddo bireelete qolte borreessidhino! Dotteessa 2018nni hanaffe Mingije fulte mannaho sabbaka hanaffino; hakkiinni mittu mittunku aganira 30 saate soqqantanno.

 Yaanme, ise cuuamate qixxaabbanno gede kaaˈlate, Yihowa Fajjo Assate Feeffatino Manna yaanno maxaafira noo xaˈmuwanna qummeeshshuwa qaddaˈe qixxeessituse. Konni garinni, Mingije Maaja 2018nni cuuantino. Ise togo yitino: “Hakko qoqqowu gambooshshiwa roduuwu leellishshinoe baxilli lowo geeshsha hagiirsiisinoe. Jeefote halaalaancho Maganu songo wido ikkaˈyanni baasa hagiidhoomma daafira, wiˈlumma.” (Yohaannisi 13:34, 35) Mingije roduuwu isera leellishshinose baxille iseno wolootaho leellishate murcidhino daafira, xa woˈma yanna soqqamaancho ikkite soqqantanni no.