Wodiidi Afirikira heedhannoti Daaniyeli yinanniti mitte Yihowa Farciˈraasincho, bunu mine mittu manchi hawe haˈrino borsa affu. Borsu giddo, woxu noohu kiisete borsinna kiredit-kaarde no. Daaniyeli konne borsa annaho qoltara hasidhe, borsu giddo manchu teesso woy silkete kiiro afiˈrate woˈnaaltu; kayi suˈmasi calla afa dandiitino. Ise konni manchinni loosanno baanke widoonni xaadate woˈnaalturono, didandiitino. Ikkollana ise hexxo mudhite diagurtino. Hakko daafira, dokterichu hakko manchira uyino woraqata borsu giddo affe woraqatu aana noo silke bilbiltu. Dokterichu biirora silke kayissino mancho, Daaniyeli silke manchoho aate sumuu yitu.

 Borsu anni, dokterichu biironni silke bilbille Daaniyeli borsasi affinotanna qoltasira hasidhannota kullisita lowo geeshsha dhagge assiˈrino. Adhara maranno woyite, Daaniyelinna annise agare noosi. Hakkiinni insa keere haaˈre kae, isinni xaadate kageeshsha daafurinohu mayiraatiro kulisi. Qoleno insa, Yihowa Farciˈraasine ikkino daafira Qullaawu Maxaafi biddishshi garinni heeˈrate sharramannota xawisisi. Woˈmanka woyite ammanaminore ikkate sharramannohu iseraati.—Ibiraawoota 13:18.

 Shiima saate gedensaanni, hakku manchi Daaniyelinna annise borsasinna woxesi qolinosi daafira, silkete sokka borreesse lede galatinonsa. Togo yee borreessino: “Anenni xaadate togo murcidhinoonni daafira, lowo geeshsha galaxxeemmoˈne. Kiˈne ledo egennamoommo daafira tashshi yiinoe; qoleno leellishshinoonnie baxille horo dihaweemmo. Galataˈya leellishate, mitore aammoˈnera hasiˈroommo. Maganoho soqqamate yitine umiˈne qiniite agurtinanni manna ikkitinoonnita afoommo. Daaniyeli togo ammanantinota ikkase, kiˈne dancha manna ikkitinoonnita leellishshanno. Hakko daafira, xaano lowo geeshsha galateemmoˈne; soqqanshoˈneno Maganu maassiˈroˈne.”

 Boodu agani gedensaanni, Daaniyeli anni hakkonne mancho wirro hasaawisinosi; isino muli yannara tuncu yiinosiha mitto coye kulisi. Kuni manchi hira hidhanni heeˈre, uulla borsu uwinoha afino. Isi borsu ama afe borsase qolisehu gedensaanni, konne assate kakkayisinosiri maatiro kulise. Borsase qolate kainohu, muli yannara isirano wolootu ammanante borsasi qoltino daafira ikkinota kulinose. Togo yiino: “Mittu manchi ammaname assannohu danchu coyi, wolu mannino ammanamanno gede kakkayisanno. Tini dagooma woˈmaho kaaˈlitanno.”