Yihowa Farciˈraasine Qullaawa Maxaafa xiinxallate addi addita Qullaawu Maxaafi tiro horoonsidhanni keeshshitino. Ikkollana, Qullaawa Borroti Haaro Alame Tiro ninke afiinni heedhunkero ise horoonsiˈra doodhineemmo; mayira yiniro tini tiro Maganu suˈma amaddino, taalo sokka kultanno, hattono xabbe leeltannote.

•   Maganu suˈma kula. Qullaawa Maxaafa qixxeessinohu mitu manni, Qullaawu Maxaafi Annira hasiisannosi ayirrinye uyikkinni gatino. Lawishshaho, mitte Qullaawu Maxaafi tiro qixxeessini woyite mitore asse looso kaaˈlinoha 70 saˈˈanno manni suˈma kulloonni. Ikkollana, tenne tirora Qullaawu Maxaafi Anna ikkinohu Maganu Yihowa suˈma mitto bayichono diworroonni!

   Haaro Alame Tirora kayinni Maganu suˈma hunda Qullaawa Maxaafa borreessini woyite noo basera qolloonni; hundi borrora Maganu suˈmi lowo kume ikkitanno basera no; kayinni tenne tiro qixxeessi manni suˈma dikulloonni.

•   Taalo sokka. Hundite Qullaawa Borro giddo noo hedo garunni sayissannoti baalanta tiro diˈˈikkitino. Lawishshu gedera, mitte tiro Yesuusi Maatewoosi 16:24 coyiˈrinore togo yite tirtino: “Ane hoode haˈra hasiˈrannohu umosi kaado; masiqalasino duqqe hoodeˈya dayo!” Kiristoosira albaanni lowo xibbe diro, Magano affinokki daga masqala ammaˈnonsa malaate assidhe horoonsidhanno. Sayikki sani mereero Maarote Diro, beetekiristaanna konne malaate adhite Kiristoosi masqalaati yite horoonsiˈra hanaffino. Qullaawa Maxaafa tirturi Maganu Qaali giddo “masqala” yaanno qaale horoonsidhinohu, Yesuusa suntoonnihu masqalu aanaati yite ammantanno daafira ikkara dandaanno. Kayinni Qullaawa Maxaafa umo borreessinoonni afiinni “masqala” yaanno qaale ikkikkinni “haqqa” yaanno qaale horoonsiˈnoonni. Hakko daafira, Haaro Alame Tirora konne qummeeshsha togo yine taashshine tirroonni: “Hoodeˈya haˈra hasiˈrannohu heeˈriro umosi kaado; qarru haqqasino duqqe agurikkinni hoodeˈya dayo.”

•   Xabbe leeltanno tiro. Dancha tirooti yinanniti taalo sokka amaddinota calla ikkitukkinni xabbe leeltannotano ikka hasiissannose. Hanni mitto lawishsha laˈno. Yesuusi Maatewoosi 5:3 coyiˈrino qaale noo gedeenni tirriro “Ayyaanunni buxxinori baˈraadhinoreeti” yitanno tiro afiˈrino. Hatto yaa yannankera xabbe leeltannota diˈˈikkitino; hakko daafira, Haaro Alame Tirora huwatate qarrisannokki garinni togo yine tirroonni: “Ayyaanaamittete coye goodhinori hagiirraammaho.”

 Haaro Alame Tiro Maganu suˈma amaddinota, taalo sokka kultannotanna xabbe leeltannota ikkitinotano agurranna, baxxitinota assannoseri wolurino no: Konne Maxaafa mannu woxe baaxxikkinni afiˈra dandaanno. Hakko daafira, lowo miliyoone ikkanno manni wole agurina Qullaawa Maxaafa hidhate woxu noonsakki manni nafa konne Maxaafa afoo dadhino qaalinni nabbawa dandiino.