Qullaawa Maxaafa nabbawattora hedde kaˈe, aterano togoo hedo macciishshanteennahe agurte egennootto? Batinyu mannira Qullaawa Maxaafa nabbawa gooddo labbannonsa. Kayinni Qullaawu Maxaafi hagiirru noo heeshsho heeˈratto gede kaaˈlannoheta afittoro maa assatto? Qullaawu Maxaafi niwaawe baxissannota assiˈra dandiinanni doogga nootalla afitto? Qullaawu Maxaafi kulannore afate kakkaˈˈatto?

Hanni Qullaawa Maxaafa nabbawa hanafansa kaaˈlitinonsahu boodu manni coyiˈrinore laˈno.

Ezikeeli yinannihu 20 diri balla ikkannosi beetti togo yiino: “Alba ani, haˈrannowa afikkinni makeena kadanno manchi gedeeti. Qullaawa Maxaafa nabbawaˈya kayinni hagiirru noo heeshsho heeˈreemmo gede kaaˈlitinoe. Qullaawu Maxaafi barru baala kaaˈlitannoeta kaajja amaale amadino.”

Firieda yinanniti 20 diri balla ikkannosetino togo yitino: “Alba ani shiimu coyira hanqeemmate. Qullaawa Maxaafa nabbawummati kayinni, aneneeto qeeˈla rosoomma. Tini mannu ledo sumuu yee heeˈreemma gede assitinoe; konnira xa lowo jaalla nooe.”

Yunisi yinanniti 50 diri balla ikkannoseti Qullaawu Maxaafire coyidhanni togo yitino: “Qullaawu Maxaafi dancha mancho ikkeemma gedenna busha rosicho agureemma gede kaaˈlanni nooe.”

Kurinna wolu lowo miliyoone ikkanno manni huwatinonte gede, Qullaawa Maxaafa nabbawakki albinni roore hagiirru noo heeshsho heeˈratto gede kaaˈlitannohe. (Isayaasi 48:17, 18) Lawishshaho Qullaawu Maxaafi, danchare woy woyyinore doodhatto gede, dancha jaalla heedhannohe gede, yaachishannore dandiite heeˈratto gedenna duuchunkunni roore, Maganu daafira halaale ikkinore afatto gede kaaˈlannohe. Qullaawu Maxaafi giddo noo amaale Buicho Maganoho; konnira tenne amaale harunsakki horonta digawajjitannohe. Maganu busha amaale horo diamaalanno.

Qaru coyi Qullaawa Maxaafa nabbawa hanafate. Qullaawa Maxaafa baxisanno garinni nabbawa hanafate kaaˈlannori maati?