AANIIDI QOOLIHA COYI UMO
Yihowa Farciˈraasine Hiittoo Mannaati?
“Mayiki ledo egennamummanku lowo dirooti. Isi Yihowa Farciˈraasinchooti. Ikkollana ammaˈnosi gari dileellannoe. Yihowa ayeti? Yihowa Farciˈraasine ayyaanna ayirrissannokkihu mayiraati? Mayiki hashshi-gedeno daggino ammaˈno widira higi yaate?”—Beekii, Kaalifoorniya, Ameerika.
“Qachiˈya manni Yihowa Farciˈraasine ledo Qullaawa Maxaafa xiinxalla hanafi yannara, ‘Yihowa Farciˈraasine yaa mayyaate?’ yee hedoommo. Togoo suˈma afidhino ammaˈno horo afe diegennoommo!”—Zeneni, Ontariyo, Kanaada.
“Aninna minaamaˈya beetekiristaane haˈra hoogankenni umonke bushiinsheemmo daafira, Yihowa Farciˈraasine ninketa daggannohu hattee faro horoonsidharaati yine hendoommo. Qoleno, qara qara beetekiristaanna nafa ninke hasiˈneemmore wonshitinokkiha, kaimansa anfoonnikkiri Yihowa Farciˈraasine yinannite gedee ammaˈno maa tirtannonke yine hendoommo.”—Kenti, Waashingiteni, Ameerika.
“Noore coyiˈrummaro, Yihowa Farciˈraasine hiittoo mannaatironna mayite ammantannoro diafoomma.”—Sesiiliya, Isbiya, Denimaarke.
Atino Yihowa Farciˈraasine minunni mine hadhe woy gudumaaleho sabbakkanna, Qullaawu Maxaafi aana xintantino borro mannaho uyitannanna Qullaawa Maxaafa mulla xiinxallisanna laittokki digatootto. Qoleno tenne metseete adhoottohu insawiinni ikkara dandaanno. Ikkirono, Yihowa Farciˈraasine ayimma seekkite afoottokkiha ikkara dandaanno. Aterano aleenni qummi assini mannite gedee hedo heedhahera dandiitanno.
Togoo xaˈmo huluullitannoheha ikkiro dawaro afiˈra dandaattohu hiikkiinniiti? Yihowa Farciˈraasine mayite ammantannoro, soqqanshonsaranna magansidhanno bayichira hasiisanno woxe mamiinni afidhannoro, minikkira daggannohu woy gudumaaleho hasaawissannohehu mayiraatiro afa dandaattohu hiittoonniiti?
Aleenni qummi assiniti Sesiiliya togo yitino: “Interneetete aana Yihowa Farciˈraasine daafira lowore nabbawoomma. Mannu insa daafira kaire yaanna, hattono insa suˈma hunannore lowo coye coyiˈranna macciishshoomma. Konninni kainohunni, Yihowa Farciˈraasine effire giwumma.” Gedensaanni kayinni, ise Yihowa Farciˈraasinewa marte noose xaˈmo insa umonsa xaˈmitino daafira duushshitanno dawaro afiˈra dandiitino.
Atina Yihowa Farciˈraasine daafira noohe xaˈmora gara ikkitino dawaro afiˈra hasiˈratto? Taaltino dawaro afiˈrate tenne metseete qixxeessitinore Yihowa Farciˈraasine umonsa xaˈmi ballo. (Lawishsha 14:15) Aante noo birxichuwa ninke hiittoo mannaatiro, mayine ammanneemmoronna loosonke huwatatto gede kaaˈlitannohe yine hendeemmo.
