•  Hanafote Hedo 2

•  Maganu Qaali Giddo Noota Muxxe Jiro 3-5

  •  Lallawo 3

  •  Maganu Qaalinni Ronseemmore 4

  •  Qullaawu Maxaafi Niwaawe 5

•  Soqqanshote Dandookki Woyyeessiˈri 6-14

  •  Hasaawa Hanafa 7

  •  Faana Gana 8

  •  Rosaano Assa 9

  •  Ammanakki Xawisse Kuli 10

  •  Lallawo 11

  •  Amado 12

  •  Mamiwaro 13

  •  Viidiyonna Borro Horoonsiˈra 14

•  Kiristaanu Heeshsho 15-16

  •  Songonnita Qullaawu Maxaafi Xiinxallo 16

•  Jeefote Hedo 17

•  Galatanna Amaale 18

•  Yanna Agara 19

•  Woradu Aliidi Laˈˈaanchi Towaanyo 20

•  Woradu Woy Qoqqowu Gambooshshi Lamala 21

•  Qaagooshshu Ayyaani Lamala 22

•  Kiristaanu Heeshshonna Soqqansho Gambooshshi Aliidi Laˈˈaancho 23

•  Kiristaanu Heeshshonna Soqqansho Gambooshshi Liqambarticha 24

•  Kaaˈlaancho Amaalaancho 25

•  Layinki Addaraashera Shiqqanno Kifilla 26

•  Viidiyubba 27

1. Tenne borrora noo biddishshi, Kiristaanu Heeshshonna Soqqansho Gambooshshiwa kifile noonsarira baalaho kaaˈlannoho. Kifile noonsari baalunku kifilensa qixxaabbara albaanni, Kiristaanu Heeshshonna Soqqansho Xiinxallote Maxaafichoranna tenne borrora kifilensa daafira uyinoonni biddishsha laˈˈa hasiissannonsa. Baalanti halashshaano rosaanote kifile shiqishshanno gede koyisa hasiissanno. Songote ledo halantannori wolootuno, Qullaawu Maxaafi roso ammantannorenna heeshshonsa giddo Kiristaanu wodho harunsitannore ikkituro kifile shiqisha dandiitanno. Halashshaancho ikkinokkihu mittu manchi kifile shiqisha hasiˈrannota kuliro, tennera wonsha hasiissanno guunte lainohunni Kiristaanu Heeshshonna Soqqansho Gambooshshihu aliidi laˈˈaanchi hasaawisannosi. Hakkiinni kifile shiqishate ikkadohoronna teˈee kulannosi. Konne hasaawa hasaawa hasiissannohu kifile shiqisha hasiˈri mancho xiinxallisanno rodii (woy Kiristaancho ikkino anni woy ama) noowaati. Rosaanote kifile shiqishate wonsha hasiissanno guunte, cuuaminokki halashshaancho ikkate wonshinanni guunte ledo mittete.—od fool. 8 guf. 8.

2. Mitto daqiiqa. Lamalate kiiro, hanafote faarsonna huuccatto gedensaanni, Kiristaanu Heeshshonna Soqqansho Gambooshshi liqambartichi macciishshaano shiqanno roso quqquxante agadhitanno gede assanno. Liqambartichu songote roore kaaˈlanno rosi aana illachisha hasiissannosi.

 3. Lallawo: Tonne daqiiqa. Cuˈmonna lame woy sase qara hedo amadino fushshaati Kiristaanu Heeshshonna Soqqansho Xiinxallote Maxaaficho aana fulanno. Tenne kifile cimeessaho woy ikkadu songote soqqamaanchira aa hasiissanno. Lamalate giddo nabbambannite Qullaawu Maxaafi niwaawera haaro maxaafa hananfanniha ikkiro, hakko maxaafa egensiissanno viidiyo fannanni. Kifile shiqishanno rodii, hatti viidiyo cuˈmote ledo mayi xaadooshshe afidhinoro qummi assa dandaanno. Ikkirono, xiinxallote maxaafichora noo hedo shiqishe guda hasiissannosi. Qoleno yanna assitu deerrinni, hakkonne roso kaajjishate hende qixxeessinoonni misilla seekke horoonsiˈra hasiissannosi. Xiinxallote maxaafichora noo hedo roore xawisate kaaˈlitannota ikkitu geeshsha, wole borrora noo hedono horoonsiˈra dandaanno.

 4. Maganu Qaalinni Ronseemmore: Tonne daqiiqa. Tenne kifile cimeessaho woy ikkadu songote soqqamaanchira aa hasiissanno. Shiqishanno rodii bitimu woy gumulshu nookkiha xaˈmotenninna dawarotenni shiqishanno. Roduu lamenta xaˈmo macciishshaano xaˈma hasiissannosi. Qoleno, qummeeshsha nabbambiro woyyannoronna teˈee doora dandaanno. Macciishshaano dawaro qola hasiissannonsahu 30 sokondi woy hakkuyi woro ikkitanno yanna giddooti.

 5. Qullaawu Maxaafi Niwaawe: Shoole daqiiqa. Tenne rosaanote kifile labbaa rosaanchi niwaawetenni shiqishanno. Tenne kifile shiqishanno rosaanchi bitima woy gumulsha qixxeessiˈra dihasiissannosi. Gambooshshu liqambartichi roorenkanni rosaano mommodditukkinni, qarummatenni, hasiisanno bayicho duudhanni, qoonqonsa soorritanni, hasiisanno bayicho taxxi yitanni, hattono coyiˈne galloonni garinni nabbawa dandiitanno gede kaaˈlanno. Qullaawu Maxaafi niwaaweti mite kifilla seeda, mite kayinni harancho ikkitino daafira, Kiristaanu Heeshshonna Soqqansho Gambooshshihu aliidi laˈˈaanchi tenne kifilla aanno woyite rosaanote dandoo heda hasiissannosi.

6. Tonaa onte daqiiqa. Konne gafa qixxeessinoonnihu, baalanti halashshaano soqqanshote rosiisidhanno gede, hattono mannu ledo hasaawate, sabbakatenna rosiisate dandoonsa woyyeessidhanno gede kaaˈlate hendeeti. Hasiisanno woyite, cimeeyyeno rosaanote kifile shiqishshara dandiitanno. Mittu mittunku rosaanchi kifilesi shiqishanno woyite, Nabbawanna Rosiisa woy Manna Baxxe yitanno birosherera kulloonnita amaalete hedo harunsa hasiissannosi. Amaalete hedo Kiristaanu Heeshshonna Soqqansho Xiinxallote Maxaafichora kifiletenni aanchine gombote malaati giddo worranni. Mito woyite, macciishshaanote ledo hasaambanni kifileno heedhara dandiitanno. Togoo kifile cimeessaho woy ikkadu songote soqqamaanchira uyinanni.—Hasaawunni shiqqanno kifile shiqinshanni gara afate  gufo 15 lai.

 7. Hasaawa Hanafa: Tenne rosaanote kifile labbaa woy meya rosaanchora uyinanni. Labbaa rosaanchira uyinanni woyite, kaaˈlaanchisi labbaaha woy maatesi miila ikka hasiissannosi; meya rosaanchora uyinanni woyite kaaˈlaanchise maatese miila woy meya rosaancho ikka hasiissannose. Rosaanchunna kaa​​ˈlaanchisi ofolte woy uurrite shiqisha dandiitanno.—Tenne kifile amadonna mamiwaro daafira ledde afate,  gufo 12 nna  13 lai.

 8. Faana Gana: Tenne rosaanote kifile labbaa woy meya rosaanchora uyinanni. Tenne kifile shiqishanno rosaanchinna kaaˈlaanchisi lamunku labbaaha woy lamunku meyata ikka hasiissannonsa. (km 12/06 qool. 4) Rosaanchunna kaa​​ˈlaanchisi ofolla woy uurra dandiitanno. Rosaanchu konni albaanni hasaawinsoonni mancho galagalle hasaawinsanni woyite mayyaa dandiinanniro leellisha hasiissannosi.—Tenne kifile amadonna mamiwaro daafira ledde afate,  gufo 12 nna  13 lai.

 9. Rosaano Assa: Tenne rosaanote kifile labbaa rosaanchira woy meya rosaanchora aa dandiinanni. Tenne kifile shiqishanno rosaanchinna kaaˈlaanchisi lamunku labbaaha woy lamunku meyata ikka hasiissannonsa. (km 12/06 qool. 4) Rosaanchunna kaa​​ˈlaanchisi ofolla woy uurra dandiitanno. Tenne kifile Qullaawu Maxaafi rosaanchinna rosiisaanchisi wonanni hasaawa hanaffe noohu gede assine shiqisha hasiissanno. Shiqishanno rosaanchi bitima woy gumulo qixxeessiˈra dihasiissannosi; amaallannisi hedo tenne ikkituro kayinni konne assa dandaanno. Xiinxallisanno gede kulloonnisi gufo baalanta huuro gotti asse nabbawa hasiissannosi yaa diˈˈikkino; hasiˈriro kayinni hatto assa dandaanno.

 10. Ammanakki Xawisse Kuli: Tini kifile lallawo ikkituro, labbaa rosaanchira uyinanni. Loonse leellinshanni ikkito ikkituro kayinni, labbaa woy meya rosaanchora aa dandiinanni. Rosaanchu labbaaha ikkiro, kaaˈlaanchuno labbaaha woy maatesi miila ikka hasiissannosi; rosaancho meyata ikkituro, kaaˈlaanchono meyata woy maatese miila ikka hasiissannose. Rosaanchu worroonni borrora noo hedo horoonsiˈre cuˈmote xaˈmora xabbe leeltanno dawaro hayyotenni qola hasiissannosi. Kifilesi shiqishanno woyite, horoonsiˈrino borro qummi assa woy qummi assikki saˈˈa dandaanno.

 11. Lallawo: Tenne kifile labbaa rosaanchira uyineenna songote shiqinshanni lallawo gede asse shiqishanno. Tini kifile Manna Baxxe yitanno biroshere guwuursha A aana xintantinota ikkitanno woyite, rosaanchu qummeeshsha (qummeeshshuwa) soqqanshote horoonsiˈra dandiinanni gara seekke leellisha hasiissannosi. Lawishshaho, hakkoye qummeeshsha hiittoo woyite horoonsiˈra dandiinanniro, qummeeshshu tiro maatiro, hattono iso horoonsiˈne hasaawinseemmo manchi heeshshi gotti asse hedanno gede assa dandiinanni gara xawisa dandaanno. Lallawo Manna Baxxe yitanno birosherera noo rosi aana xintantinota ikkituro, rosaanchu hattee hedo soqqanshote horoonsiˈra dandiinanni gara seekke xawisa hasiissannosi. Shiqishanno woyite, rosu giddo umi hedora kulloonni lawishsha luphi assa woy roso guwuursate lendoonni qummeeshshuwa giddo hasiˈrinota horoonsiˈra dandaanno.

   12. Amado: Tennenna aantanno gufora noo biddishshi, “Hasaawa Hanafa” hattono “Faana Gana” yitanno kifillara kaaˈlannoho. Bande kulloonniri heeˈriro ikkinnina, rosaanchu mixo hasaawisanni noo manchira malinoha huwatate qarrisannokkiha Qullaawu Maxaafi halaale kulatenna wolu woyitira hasaawaho injeessate. Rosaanchu qooxeessaho maltinota yannate hasaambanni heeˈnoonni hajo doora hasiissannosi. Rosiisate Horoonsiˈneemmo Uduunni giddonni mitte borro woy viidiyo egensiisannoronna teˈee umisi doodha dandaanno. Rosaano mitto hasaawu bitima rosiisidhe hakkoye calla yaantenni, mannu ledo hasaambanni gara rosiisiˈra, lawishshaho mannaho baxille leellishanna rosamino garinni hasaawisa dandiinanni gara leellisha hasiissannonsa.

   13. Mamiwaro: Rosaanchu kifilete ledo xaphi assine kulloonni mamiwaro, qooxeessaho malino garinni horoonsiˈra hasiissannosi. Lawishshaho:

1.  (1) Minunni Mine: Tini mamiwaro, minunni mine marre, silketenni, woy sokka borreessine soqqammanni soqqansho, hattono alba minunni mine soqqammanni hasaawinsoonni mancho galagalle hasaawinsannita kultannote.

2.  (2) Sabbakate Fulloommokki Woyite: Tini mamiwaro mannu ledo hananfoommoha mulla hasaawa ayyaanaamittete hasaawira qolle soorrineemmota kultannote. Togoo yannara loosu basera, rosu mine, qachaho, dagate hodhishshi aana, woy uminke dilgo assiˈnanni heeˈne xaandeemmohu wolu mannira Qullaawa Borro hedo kula dandiineemmo.

3.  (3) Gudumaalu Soqqansho: Tini mamiwaro borrote gaarenni, dikkotenna daddalu basera, doogote, woy paarkete, makeenu uurrannowa, woy manna anfanniwa baalawa soqqammeemmo soqqansho kultannote.

 14. Viidiyonna Borro Horoonsiˈra: Kifile kifilete garinni, rosaanchu viidiyo woy borro horoonsiˈra doodha dandaanno. Rosaanote kifile viidiyo noota ikkituro, woy rosaanchu viidiyo horoonsiˈra doodhiro, hattee viidiyo egensiisanna hasaawaho horoonsiˈra hasiissannosi ikkinnina fana dihasiissannosi.

15. Konne gafa faarsotenni hananfi gedensaanni, aanannohu 15 daqiiqi giddo macciishshaano heeshshonsa giddo Maganu Qaale harunsitanno gede kaaˈlitannoti mitte woy lame kifile shiqqanno. Bande kulloonniri heeˈriro ikkinnina, tenne kifilla aa hasiissannohu cimeeyyete woy ikkadda songote soqqamaanoraati. Songote Hasiisannorira Horoonsidhe yitanno kifile kayinni cimeeyye calla shiqishshanno. Mitte kifile hasaawunni shiqqannote yiniro, shiqishanno rodii qixxeessinoonni xaˈmono agurranna wole xaˈmuwano lede xaˈma dandaanno. Qara qara hedo gudise shiqishatenna macciishshaanote ledo hasaawira yanna ikkitannosi gede, bitima (dadhote coyiˈrannore) haransa hasiissannosi. Kifile qaalu xaˈmo afidhinota ikkituro, qaalu xaˈmo xaˈminanni manchi ofollinowa heeˈre coyiˈrantenni, dandaamannoha ikkiro madirake daye coyiˈriro woyyate.

  16. Songonnita Qullaawu Maxaafi Xiinxallo: Sajjoo daqiiqa. Tenne kifile aa hasiissannohu ikkadu songote cimeessiraati. (Gari cimeeyye nookki songora, hasiisanno woyite, ikkaddu songote soqqamaasine tenne kifile shiqisha dandiitanno.) Cimeeyyete bisi, Songonnita Qullaawu Maxaafi Xiinxallo massagate ikkadda ikkitinore dooranno. Tenne kifile shiqishshanno roduuwi, xiinxallote gaammoonni yanna sayissukki, qara qara qummeeshshuwa luphi assite, hattono roso loosu aana hosiisa dandiinanni gara xawisse danchu garinni massaga hasiissannonsa. Tenne kifile shiqishshara fajjinoonni roduuwi, xaˈmotenninna dawarotenni shiqinshanni kifile massanganni gara kulanno biddishsha xiinxallansa kaaˈlitannonsa. (w23.04 qool. 24, saaxine) Mitte lamalara gaammoonniha xiinxallote gafa seekkine xiinxalline gundi gedensaanni, daqiiqu gate noo daafira calla xiinxallo seedisa dihasiissanno. Dandaamannoha ikkiro, lamalate kiiro addi addi roduuwi massagguronna nabbabburo woyyanno. Kiristaanu Heeshshonna Soqqansho Gambooshshi liqambartichi, tenne kifile shiqishanno rodiira xiinxallo haransanno gede kulisiro, kuni rodii tenne assanno gara heda hasiissannosi. Gama guffa nabbambikkinni xaˈmo calla xaˈma dandaanno.

17. Sase daqiiqa. Kiristaanu Heeshshonna Soqqansho Gambooshshi liqambartichi, gambooshshunnita qara qara hedo xaphi assanno. Aantanno lamalara shiqanno rosono haranse egensiisa hasiissannosi. Yanna ikkitannoha ikkiro, aantanno lamalara kifile noonsa rosaano suˈma kule qaagiissa dandaanno. Bande kulloonniri heeˈriro ikkinnina, gambooshshu liqambartichi hasiisanno egensiishshanna songote sonkoonni sokka nabbawa hasiissannosihu jeefote hedo yannaraati. Rosamino coye, lawishshaho qanchu soqqansho ledo xaado afiˈrinore, Addaraashe fiinanni pirogiraamenna woleno togoore saleedaho gannanni ikkinnina egensiishsha dikullanni. Liqambartichu jeefote hedo shiqishanno yanna egensiishsha kulate woy sokka nabbawate ikka hoogguro, Kiristaanu Heeshsho yaanno gafi hunda kifile noonsa roduuwi dandaamannoha ikkiro yanna gatissanno gede kula hasiissannosi. ( Gufo 16 nna  19 lai.) Gambooshshe faarsotenninna huuccattotenni jeefinsanni.

18. Mitte mittenti rosaanote kifile shiqqu kiiro, Kiristaanu Heeshshonna Soqqansho Gambooshshi liqambartichi mitto daqiiqa meddi yitanno yanna giddo amaalete uyinoonni hedo horoonsi​​ˈre rosaancho galatanno, hattono amaalanno. Liqambartichu rosaanote kifile egensiisanno woyite, rosaanchoho uyinoonnita amaalete hedo dikulanno. Ikkollana rosaanchu kifile shiqishe kaˈˈanno woyite, liqambartichu galatisihu gedensaanni uyinoonnita amaalete hedo egensiisanno; hattono rosaanchu dancha gede shiqishino yinanni gede assinore kulanno; woy hattee hedo roorse illachisha hasiissannosihu mayiraatironna hiittoonniitiro shaqqillunni xawise kulannosi. Gambooshshu liqambartichi rosaancho woy macciishshaano kaaˈlitanno yee hedannoha ikkiro, kifilete aana wole hedono coyiˈra dandaanno. Liqambartichu Manna Baxxe yitanno biroshere, Nabbawanna Rosiisa yitanno biroshere woy Soqqanshote Rosi Mini maxaafa horoonsiˈre, rosaanchoho uyinoonnite amaalete hedo ledo xaadooshshe afidhinota woy wole kaaˈlitannosi amaale, gambooshshu gedensaanni woy wole yannara callasi amaala dandaanno.—Kiristaanu Heeshshonna Soqqansho Gambooshshi liqambartichinna kaaˈlaanchu amaalaanchi loosi maatiro ledde afate,  gufo 19,  24 nna  25 lai.

19. Mitte mittente kifilera uyinoonni saate sayisa dihasiissanno; Kiristaanu Heeshshonna Soqqansho Gambooshshi liqambartichino yanna agara hasiissannosi. Mitte mittente kifilera uyinoonni yanna Kiristaanu Heeshshonna Soqqansho Xiinxallote Maxaaficho aana kulloonniha ikkirono, roso duushshanno garinni shiqinshoonniha ikkiro, uyinoonni daqiiqa wonshate yine calla hedo leda dihasiissanno. Kifile shiqishshannori yanna sayissuro, Kiristaanu Heeshshonna Soqqansho Gambooshshi liqambartichi woy kaaˈlaanchu amaalaanchi kore roduuwa calluwansa amaala hasiissannonsa. ( Gufo 24 nna  25 lai.) Faarsotenna huuccattote yannano mitteenni kiirreenna, woˈmu gambooshshi 1 saatenna 45 daqiiqi giddo goofa hasiissannosi.

20. Woradu aliidi laˈˈaanchi songo towaatanni nooha ikkiro, gambooshshu pirogiraame kawiinni aanchine kulloonnire agurranna Kiristaanu Heeshshonna Soqqansho Xiinxallote Maxaaficho aana noo biddishshi garinni massanganni: Kiristaanu Heeshsho yaanno gafira nooti Songonniti Qullaawu Maxaafi Xiinxallo gatteenna, woradu aliidi la​​ˈˈaanchi 30 daqiiqita soqqanshote lallawo shiqishanno. Soqqanshote lallawo shiqqara albaanni, Kiristaanu Heeshshonna Soqqansho Gambooshshi liqambartichi hakkuyira albaanni shiqqino pirogiraame xaphi assanno, aantanno lamala roso egensiisanno, hattono egensiishsha kulanno; hakkiinni woradu aliidi laˈˈaancho egensiisanno. Soqqanshote lallawo shiqquhu gedensaanni, woradu aliidi la​​ˈˈaanchi umisi doorino faarsonni gambooshshe jeefisanno. Jeefote huuccatto assanno gede wole rodoo koyisa dandaanno. Woradu aliidi la​​ˈˈaanchi towaanyo yannara, songo massanganni afiinni wole addaraashera shiqqanno kifilla diheedhanno. Woradu aliidi laˈˈaanchi wole gaamo ledo noo songo towaatanno woyite, hatti gaamo uminsa afiinni gambooshshe assiˈra dandiitanno. Woradu aliidi laˈˈaanchi soqqanshote lallawo shiqishanno woyite kayinni, tini gaamo lowiidi addaraashe dagge shiqqanno lallawo songote ledo macciishsha hasiissannonsa.

21. Woradu gambooshshi woy qoqqowu gambooshshi heeˈranno lamalara, songote gambooshshi diheeˈranno. Hatte lamalara shiqqanno kifilla annu annu woy maatete deerrinni xiinxalla hasiissannota songote qaagiissa hasiissanno.

22. Qaagooshshu Ayyaana ayirrinsanni barri Sanyotenni Arbete geeshsha nooha ikkiro, hatte lamalara Kiristaanu Heeshshonna Soqqansho Gambooshshi diheeˈranno.

23. Cimeeyyete bisi doorinohu mittu cimeessi Kiristaanu Heeshshonna Soqqansho Gambooshshi aliidi laˈˈaancho ikke soqqamanno. Kuni rodii gambooshshe dancha gede qinaawino garinni, hattono konni biddishshi garinni massanganni heeˈnoonnita laˈˈanno. Qoleno kaaˈlaanchu amaalaanchi ledo amaalamanni loosanno. Kiristaanu Heeshshonna Soqqansho Xiinxallote Maxaaficho iillitanni heedheenna, Kiristaanu Heeshshonna Soqqansho Gambooshshi aliidi laˈˈaanchi lamunku aganita Kiristaanu Heeshshonna Soqqansho gambooshshi kifilla baalanta pirogiraame fushshanno. Hatto yaa, rosaanote kifillano agurranna konni gambooshshiwa shiqqannota wole kifillano fushshanno, hattono cimeeyyete bisi fajjino roduuwi giddonni liqambarticha ikkitannore woranno yaate. ( Gufo 3-16 nna  24 lai.) Rosaanote kifile aanno woyite, rosaanchu diro, woˈnaalshanna shiqino roso afoo wonshe coyiˈrate wolapho noosihoronna teˈee heda hasiissannosi. Wole gambooshshu kifilla aanno woyiteno, konni garinni coye heeshshi gotti asse heda hasiissannosi. Mitte mittenta kifile shiqqara ajayi ajeenna sase lamala gatte heedheenna shiqishshannorira aa hasiissanno. Rosaanote kifile aate Kiristaanu Heeshshonna Soqqansho Gambooshshi Kifile Woraqata (S-89) horoonsiˈra hasiissanno. Kiristaanu Heeshshonna Soqqansho Gambooshshihu aliidi laˈˈaanchi woˈma gambooshshu pirogiraame egensiishshu saleedira gannanni gede assanno. Cimeeyyete bisi iso kaaˈlannoha wole cimeessa woy songote soqqamaancho wora dandaanno. Ikkollana, rosaanote kifilla agurranna wole kifilla shiqishshannore wortannori cimeeyye callate.

24. Mitte mittente lamalara, mittu cimeessi Kiristaanu Heeshshonna Soqqansho Gambooshshi liqambarticha ikke soqqamanno. (Gari cimeeyye nookki songora, ikkadda songote soqqamaano Kiristaanu Heeshshonna Soqqansho Gambooshshi liqambarticha ikkitara dandiitanno.) Kiristaanu Heeshshonna Soqqansho Gambooshshi liqambartichi hanafotenna jeefote hedo qixxaawa hasiissannosi. Qoleno mitte mittenta kifile egensiisanno; hattono cimeeyyete bisi shiima ikkiro, gambooshshu yannara wole kifillano, hakko iso hasaawu nookkiha viidiyo calla leellinshanni kifilla shiqishara dandaanno. Mitte kifilenni wolete saˈnanni woyite coyiˈranno hedo lowo geeshsha harancho ikka hasiissannose. Liqambaroota ikkitanno cimeeyye doorannohu cimeeyyete bisooti. Ikkadda cimeeyye bado badotenni liqambaroota ikkite soqqantanno. Songo songote garinni, Kiristaanu Heeshshonna Soqqansho Gambooshshiha aliidi laˈˈaancho wole ikkadda cimeeyyenni roore duucha hinge liqambarticha assa dandiinanni. Mittu cimeessi Songonnita Qullaawu Maxaafi Xiinxallo massagate ikkado ikkiro, gambooshshu liqambarticha ikkateno ikkado ikkara dandaanno. Ikkollana, liqambarticha ikke soqqamanno cimeessi rosaanote kifile shiqishshannore galatanna hasiisanno woyite insara kaa​​ˈlitanno amaale baxillunni aannoha ikka hasiissannositano deˈinoonte. Qoleno liqambartichu gambooshshu yannasira goofanno gede assannoha ikka hasiissannosi. ( Gufo 17 nna  19 lai.) Liqambartichu hasiˈrironna gari bayichi nooha ikkiro, madirakete wole mayikirafoone uurrinseenna hakko heeˈre, kifile shiqishshanno roduuwi dagge madirakete bayichonsa amadda geeshsha kifile egensiisa dandaanno. Hattonni, liqambartichu Qullaawu Maxaafi Niwaawe yinanniti rosaanote kifile shiqqanno yannarano ikko Soqqanshote Dandookki Woyyeessiˈri yaanno gafi hunda noo kifilla egensiisanno woyite madirakete ofolla dandaanno. Tini yanna gatissara dandiitanno.

25. Dandaamannoha ikkiro, konne loosu qeecha lallawo shiqishate danchu woˈnaalshi noosi cimeessira aa woyyitanno. Kaa​​ˈlaanchu amaalaanchi kifile shiqishshanno cimeeyyenna songote soqqamaanora, lawishshaho Kiristaanu Heeshshonna Soqqansho Gambooshshi kifillanna dagate lallawo shiqishshannorira, hattono Agarooshshu Shae Xiinxallo woy Songonnita Qullaawu Maxaafi Xiinxallo massaggannorira woy tenne xiinxallo yannara nabbabbanno roduuwira hasiisanno woyite calluwu heedheenna amaale aanno. ( Gufo 19 lai.) Lallawo shiqishatenna rosiisate ikkadda ikkitinori batinye cimeeyye heedhuro, diru dirunku addi addi cimeessi kaa​​ˈlaancho amaalaancho ikke soqqama dandaanno. Kaaˈlaanchu amaalaanchi roduuwu kifile shiqishshu kiiro amaala dihasiissannosi.

26. Rosaanote batinyi garinni, songo rosaanote kifilla layinki addaraasherano shiqqanno gede assa dandiitanno. Layinki addaraashera kifilla shiqishshanno rosaanora amaale aannoha ikkado rodoo (cimeessa ikkiro woyyanno) wora hasiissanno. Hasiisanno woyite, dancha dandoo noosiha songote soqqamaanchono wora dandiinanni. Cimeeyyete bisi konni loosu qeechira malino rodoo dooranno; qoleno mittu rodii calla ikkannoronna bado badotenni massaggannori hasiissannoro muranno. Kuni rodii  gufo 18te noo biddishsha harunsa hasiissannosi. Maganu Qaali Giddo Noota Muxxe Jiro yaanno gafi hunda nooti Maganu Qaalinni Ronseemmore yitanno kifile shiqquhu gedensaanni, layinki addaraashera kifile noonsa rosaano hadhanno gede kula hasiissanno. Kuri rosaano jeefonniti rosaanote kifile gooffuhu gedensaanni fulte dagganno.

27. Konni gambooshshi yannara, doorantino viidiyubba shiqqanno. Kuri viidiyubba JW Layibirere aana babbaxxinohu elekitiroonikisete uduunnichinni afiˈra dandiinanni.

© 2023 Watch Tower Bible and Tract Society of Pennsylvania

S-38-DM 11/23