Mbeni zo so ayeke découragé ape tongana lo tingbi na akpale ayeke zo so ayeke kiri na peko ape tongana mbeni ye ason bê ti lo. A yeke mbeni sarango ye so zo ayeke wara ni tongana ngoi ahon. Tongana mbeni molenge angbâ ti manda ti tambela, ngoi na ngoi lo yeke tï, legeoko nga na ngoi so molenge ni ayeke manda tongana nyen la lo peut ti réussir na yâ ti gigi ti lo, ngoi na ngoi lo yeke wara akpale.

Ambeni molenge ayeke découragé tongana ala sara mbeni ye nzoni ape, ala tingbi na mbeni ngangu kpale wala tongana azo afa na ala faute so ala sara. Ti ambeni, ala zia lege ti sara ye so ala ye ti sara. Me, a yeke nzoni a fa na ala so:

• A yeke lakue lakue la zo ayeke sara ka gï ye na lege ni ape.​—Jacques 3:2.

• Zo kue ayeke tingbi ka na angangu kpale.​—Zo-ti-fa-tene 9:11.

• E bezoin ti tene mbeni zo afa na e afaute ti e tongaso si ti peko e sara ye nzoni.​—aProverbe 9:9.

Tongana molenge ti mo adécouragé ape tongana lo tingbi na akpale ayeke aidé lo ti bâ so lo peut ti hon ndö ti akpale so lo yeke tingbi na ni na yâ ti gigi ti lo.

Tongana lo sara mbeni ye nzoni ape.

MAMA-NDIA TI BIBLE: “Zo ti mbilimbili apeut ti tï fani mbasambala, me lo yeke kiri ti londo.”​—aProverbe 24:16.

Fa na lo ti bâ wala kpale ni ayeke kota wala ayeke kota ape. Na tapande, nyen la lo yeke sara tongana lo sara mbeni devoir na ekole nzoni ape? Lo peut ti découragé lo tene: “Mbi peut ti sara mbeni ye ti nzoni lâ oko ape!”

Aidé lo ti bâ ye so lo peut ti sara si ti peko lo sara ye nzoni. Tongana mo sara tongaso, lo yeke tara ande ti leke kpale ni, na bê ti lo ayeke dë.

Me, leke kpale ni na place ti lo ape, fa na lo ti tene lo wani lo wara solution na kpale ni. Mo peut ti hunda lo: “Nyen la mo peut ti sara si mo comprendre mbeti so a fa na mo so?”

Tongana mbeni ngangu kpale asi.

MAMA-NDIA TI BIBLE: “Ala hinga ye so ayeke si na gigi ti ala kekereke pëpe.”​—Jacques 4:14.

Gigi ayeke kirikiri mingi. Mbeni zo so ayeke na mosoro laso apeut ti tï na yâ ti yere kekereke; zo so ayeke na  nzoni seni laso, kekereke lo peut ti tï kobela. Bible atene: “Azo so akpe loro mingi la ayeke sö benda lakue pëpe, wala awangangu la ayeke sö benda lakue na yâ ti bira pëpe, . . . ndali ti so ye so ala ku terê ti ala na ni pëpe alingbi ti si na ala kue na ngoi kue.”​—Zo-ti-fa-tene 9:11.

So mo yeke babâ wala mama, mo yeke sara ye kue so mo peut ti sara si sioni asi na molenge ti mo ape. Me ti vrai ni, a yeke ngangu ti tene mo bata lo si sioni oko asi na lo ape.

Me, tongana ambeni kpale asi na lo na tapande mbeni kamarade ti lo wala mbeni fami ti ala akui, mo yeke aidé lo ti hon ndö ni. Na lege ti ye ni so, mo yeke fa na lo comment lo peut ti leke ambeni kpale tongana lo kono ande, na tapande tongana lo perdre kua ti lo wala lo wara kpale ti nginza. *

Tongana a mû na lo wango ndali ti mbeni faute so lo sara.

MAMA-NDIA TI BIBLE: “Mä wango . . . tongaso si kekereke mo ga zo ti ndara.”​—aProverbe 19:20.

Tongana mbeni zo amû wango na molenge ti mo ndali ti mbeni faute so lo sara, a ye ti fa ape so zo ni aye ti zia mbeto na yâ ti lo wala lo ye ti zia vundu na bê ti lo. Me zo ni asara tongaso ti aidé lo ti corrigé mbeni faute so lo sara.

Tongana mo fa na lo ti mä awango so a mû na lo, mo na lo kue ayeke bâ nzoni dä. John, so ayeke mbeni babâ ti molenge atene: “Tongana amolenge acorrigé pëpe afaute so ala sara, na ngoi so ala kono ala yeke wara gbâ ti akpale na yâ ti gigi ti ala, na teti so mo yeke babâ wala mama ti ala mo yeke ngbâ ande lakue lakue ti leke akpale ti ala ti gue na ni. Ye so ayeke sara si gigi ayeke nzere na mo babâ na mama ni ape me nga na molenge ni kue.”

Tongana nyen la mo peut ti aidé molenge ti mo ti yeda na awango so a mû na lo? Tongana a mû wango ndali ti mbeni faute so lo sara atâa na ekole wala na ndo wa, tene pëpe so a doit fade ti mû na lo wango ni ape. Me, mo peut ti hunda lo:

• “Mo pensé so a mû na mo wango so ngbanga ti nyen?”

• “Tongana nyen la mo peut ti kiri ti sara ye bien ahon ti kozo?”

• “Ti peko tongana mara ti ye tongaso asi, mo yeke sara nyen?”

Grisa ape so, so a mû na lo wango ndali ti faute so lo sara so, a yeke aidé lo laso, me nga kekereke tongana lo kono.