A dü mbi na mbeni kete gbata ti Pologne, so ayeke nduru na frontière ti Allemagne. Ayaka nga na agbako la angoro e, a sara si e duti nzoni mingi. Babâ na mama ti mbi aye mbi mingi, nga ala encouragé mbi ti gi ti duti mbeni nzoni zo, ti manda mbeti nzoni nga ti gi ti wara mbeni nzoni kua ti nginza.

Gigi ti mbi akomanse ti ga kirikiri na ngoi so mbi gue ti manda droit na université ti Wrocław. Teti so mbi yo na babâ na mama ti mbi, mbi komanse ti sara kamarade na asioni zo. Mbi ye ka ballon mingi, me asioni kamarade ni so ague na mbi ngbii juska mbi ga mbeni zo so aye ballon ahon ndo ni. Équipe so mbi ye tënë ni mingi ayeke équipe ti Varsovie, na lakue na anda-yenga, même si ala pika ballon ni na ndo wa, mbi yeke gue ti bâ ni. Na angoi ni so, e yeke nyon sämba ahon ndo ni, e yeke nyon mbangi nga même sioni tiri ayeke londo na popo ti e na asupporteur ti mbeni équipe ni. Na mbi, guengo na ando ni so ayeke aidé mbi ti girisa na ndo ti akpale ti mbi ti lango ni so, atâa so mbi hinga mbi tene tongana lapolice agbu mbi, gigi ti mbi ayeke buba.

Mbi na akamarade ti mbi e ye ka ti gue na aclub nga na aboîte de nuit mingi. Na ngoi so e si kâ, fani mingi e yeke yô ka tiri na azo. Lapolice agbu mbi lege mingi, me ti tene tënë ni ague ayo ape, mbi yeke pete goro na ala. Ti vrai ni, mbi bâ mbi tene gigi ni kue lani awe la. Me atâa so kue, mbi hinga lani mbi tene aye so mbi yeke sara so ayeke nzoni ape. Lakue na adimanche, mbi yeke gue lani na eglize ti tene conscience ti mbi adérangé mbi mingi ape.

Na ngu 2004, aTémoin ti Jéhovah use aga na yanga-da ti mbi, na mbi yeda ti tene mbi na ala e sara lisoro na ndo ti Bible. Teti so mbi manda aye mingi na ndo ti asarango ye ti aChrétien, conscience ti mbi akomanse ti dérangé mbi. Mbi hinga so a lingbi mbi zia lege ti nyongo sämba ahon ndo ni, ti nyongo mbangi nga ti zia lege ti sarango kamarade na azo so ayeke sara ye alingbi na andia ti Bible ape. Mbi bâ nga so mbi doit ti zia lege ti sarango ye ti ngangu na zo. Me atâa so mbi hinga mbi tene mbi doit ti changé, mbi ngbâ gi na yâ ti asioni sarango ye ni so.

Mbeni changement ni aga na ngoi so, na mbeni bï, mbi yô tiri na ambeni koli miombe. Mo bâ mbi na lê ti sese, na ndo ti lege, ala yeke boxé mbi nga ala yeke botté yâ ti li ti mbi kirikiri. Teti so mbi bâ so mbi yeke na yanga ti kuâ, mbi komanse ti sambela, mbi tene: “Jéhovah, pardonné mbi so mbi bâ Tënë ti mo tongana ye ti ngia so. Tongana mo sö mbi, mbi yeke yeda ti manda Bible, mbi na aTémoin ti Jéhovah,  nga mbi yeke changé asarango ye ti mbi.” Mo ye ti bâ, mbi ngbâ na fini. Na pekoni, mbi sara ye alingbi na zendo so mbi mû na Nzapa, mbi manda Bible.

A si na ngu 2006, mbi gue na Angleterre. Mbi gue lani kâ ti tene mbi wara gbâ ti nginza, ti tene na pekoni mbi kiri na Pologne ti gi mbeni kota diplôme ti droit. Na ngoi so mandango Bible ti mbi ayeke gue na li ni, mbeni versê apika bê ti mbi ngangu. Bazengele Paul atene: “Ndali ti hingango ye na ndo ti Christ Jésus Seigneur ti mbi so mbeni ye ti hon ni ayeke dä pëpe, mbi dö aye kue mbi zia. Ndali ti lo, mbi dö aye kue mbi zia, na mbi bâ aye ni tongana gbâ ti azende si mbi lingbi ti wara Christ.” (aPhilippien 3:8). Legeoko tongana mbi, bazengele Paul nga kue amanda lani droit, nga lo kue lo sara lani aye ti ngangu na azo mingi (Kusala 8:3). Me, lo ga ti bâ so nzoni ye ti tene zo asara na yâ ti gigi ti lo ayeke ti sara kua ti Nzapa nga ti gi ti sara ye tongana ti Jésus. Na ngoi so mbi gbu li na ndo ti tapande ti Paul so, mbi ga ti bâ so nzoni kua ti nginza nga na sarango ye ti ngangu na zo la ayeke ga na zo ngia ape. Mbi tene so, so Paul awara lege ti changé lani so, mbi kue mbi peut ti changé. Tongaso, mbi décidé ti ngbâ na Angleterre nga mbi dö lege ti gingo kota diplôme ti droit ni mbi zia.

So mbi yeke manda ye mingi na ndo ti Jéhovah, mbi bâ so mbi kiri mbi ga nduru mingi na lo. Zendo so lo mû, so ayeke ti pardonné azo so aye tâ ti changé bê ti ala, andu lani bê ti mbi mingi (Kusala 2:38). Nga, na ngoi so mbi gbu li ti mbi na ndo ti 1 Jean 4:16, so atene “Nzapa ayeke ndoye,” ge la mbi ga ti comprendre ndani so Nzapa ake sarango ye ti ngangu na zo.

Mbeni ye so apika lani bê ti mbi ayeke sarango ye ti tere ti aTémoin ti Jéhovah. Mbi bâ lani polele so ala yeke sara kue ti bata andia ti Nzapa, nga ala yeke na ngia. Mbi ye lani ti lï na yâ ti pendere sewa so ala yeke na yâ ni so. Na peko ti akota changement so mbi sara na yâ ti gigi ti mbi, atâa so ayeke lani kete ye ape, mbi wara batême, mbi ga Témoin ti Jéhovah, na ngu 2008.

Mbi so lani mbi yeke sara ye ti ngangu mingi na tere ti azo, mbi yeke nyon mbangi, mbi yeke nyon sämba ahon ndo ni, mbi ye ballon ahon ndo ni nga mbi ye lani gi ti wara nzoni kua ti nginza so, Bible asara si mbi changé mbi ga mbeni wakua ti Nzapa, so ayeke na ngia ti fa tënë ti Nzapa na amba ti lo. Mbi ngbâ lakue ti ye bango ballon, me mbi décidé ti zia bê ti mbi kue gi na ndo ni ape.

Mbi sara mariage na Esther, so ayeke mbeni wakua ti Jéhovah, na e yeke na ngia na yâ ti mariage ti e. E yeke na ngia mingi ti fa tënë ti Nzapa na aPolonais, so ayeke ge na nord-ouest ti Angleterre. Kozo ti tene, na yâ ti gigi ti mbi, mbi wara tâ ngia tongaso la. Conscience ti mbi adérangé mbi encore ape, nga mbi yeke na ngia mingi na yâ ti gigi ti mbi.