Na yâ ti sewa, tongana babâ na mama ni aye tere nga ala ne mba, a yeke sara nzoni mingi na molenge so ayeke kono na yâ ni (aColossien 3:14, 19). Anzoni babâ na mama ayeke ye amolenge ti ala nga ayeke gonda ala, tongana ti so Jéhovah Nzapa agonda lani Molenge ti lo.—Diko Matthieu 3:17.

Babâ ti e ti yayu ayeke dengi mê ti mä awakua ti lo, nga lo yeke gi ti hinga aye so agbu bê ti ala. A yeke nzoni ababâ na amama kue amû tapande ti lo so, ala dengi mê ti mä aye so amolenge ti ala ayeke tene na ala (Jacques 1:19). A lingbi ala gi ti hinga aye so agbu bê ti amolenge ti ala nga na vundu ti bê ti ala.—Diko Nombre 11:11, 15.

So mo yeke babâ wala mama, mo yeke na droit ti lu andia na yâ ti sewa ti mo (aÉphésien 6:1). Mû tapande ti Nzapa. Lo yeke fa ndoye na mbage ti amolenge ti lo na fango na ala polele andia ti lo nga na ye so ayeke si tongana ala kpe andia ni ape (Genèse 3:3). Me ahon ti gbu azo na ngangu ti mä yanga, lo yeke fa na ala aye ti nzoni so ala yeke wara tongana ala sara ye so ayeke na lege ni.—Diko Ésaïe 48:18, 19.

Sara kue ti mû maboko na amolenge ti mo ti ye Nzapa. Tongana mo sara tongaso, ala yeke sara ye na ndara même na ngoi so mo yeke na tere ti ala ape. Legeoko tongana ti so Nzapa ayeke fa ye na e na lege ti tapande ti lo, fa na amolenge ti mo ti ye Nzapa na lege ti tapande ti mo.—Diko Deutéronome 6:5-7; aÉphésien 4:32; 5:1.