NYEN la mbeni koli alingbi ti sara ti bata wali ti lo nzoni? A fa na mingi ti azo a tene so kozo ye so mbeni koli adoit ti sara a yeke ti tene lo wara gbâ ti nginza ti bata na fami ti lo. Ye oko, ambeni wali so ayeke na gbâ ti aye ti sese abâ so siriri amanke ala, na même ala duti gi na mbeto. Na tapande, Rosa, mbeni wali ti kodoro ti Espagne, atene tënë so na ndo ti koli ti lo: “Na lê ti azo, lo yeke mbeni nzoni koli, me na yanga-da, lo ga sioni koli.” Joy, so ayeke na Nigéria, atene: “Tongana mbi na koli ti mbi e mä tere ape, lo yeke tene, ‘Mo doit ti sara ye kue so mbi tene na mo, ndali ti so mbi yeke koli ti mo.’”

Mbeni koli alingbi ti sara kua ti lo, ti koli ti wali, na lege ti ndoye tongana nyen? A hunda ti tene mbeni koli asara nyen ti tene yanga-da ti lo aduti mbeni ndo ‘ti wungo tere’ ndali ti wali ti lo?—Ruth 1:9.

Atâa so na lê ti Nzapa koli na wali ayeke gi oko, Bible atene so kungba ti ala, na yâ ti sewa, ayeke nde nde. A-Romain 7:2 atene so mbeni wali so asara mariage awe ayeke na gbe ti “ndia ti koli ti lo.” Legeoko tongana ti so andokua ayeke zia ka ambeni zo ti mû li ni na yâ ti andokua ni, Nzapa nga kue azia koli tongana mokonzi ti wali ti lo (1 aCorinthien 11:3). A yeke nzoni akoli amû li ni na yâ ti sewa ti ala.

Akoli, a yeke nzoni ala sara kua na komandema so Nzapa amû na ala so tongana nyen? Bible atene: “Ala ngbâ lakue ti ndoye awali ti ala gi tongana ti so Christ nga andoye congrégation.” (aÉphésien 5:25). Biani, atâa so Jésus Christ asara mariage lâ oko ape, tapande ti lo alingbi ti mû maboko na ala ti duti ambeni nzoni koli ti awali. Zia e bâ tongana nyen ti sara ni.

Jésus agi ti dë bê ti azo nga ti mû maboko na ala. Jésus amû zendo na azo kue so a sara ye ti ngangu na ala nga na ala so akpale ti ala ahon ndo ti ala, lo tene: “Ala ga na mbi, . . . na fade mbi dë bê ti ala.” (Matthieu 11:28, 29). Mingi ni, lo yapu yâ ti apasi ti ala nga lo mû maboko na ala ti ga nduru na Jéhovah. A yeke ye ti dongo bê pëpe ti bâ so azo mingi aga lani nduru na Jésus, ngbanga ti so ala hinga so lo yeke mû maboko na ala.

Ye so akoli alingbi ti sara ti mû tapande ti Jésus. Gi alege kue ti mû maboko na wali ti mo na yâ ti kua so lo yeke sara ni. Ambeni wali adema tere tongana ti Rosa, so lo tene: “Mbi yeke tâ gi zo ti kua ti koli ti mbi.” Nde na ti lo, mbeni koli so iri ti  lo ayeke Kweku, so asara mbeni nzoni mariage, atene: “Mingi ni, mbi yeke hunda ka na wali ti mbi ti fa na mbi ye so mbi lingbi ti sara ti mû maboko na lo. Teti so mbi ye lo, mbi yeke mû ka li ni ti mû maboko na lo na yâ ti akua ti yanga-da.”

Jésus ahinga ti bi bê na azo nga ti zia tere ti lo na place ti ala. Teti angu 12, mbeni wali, so ye ti lo ayeke dä ape, abâ pasi lani mingi na mbeni sioni kobela. Na mango tënë ti amiracle so Jésus asara, lo tene: “Tongana mbi ndu gi yanga ti abongo ti lo ti ndo ni, mbi yeke sava ande.” Lo yeke lani na raison! Na ngoi so lo ga nduru na Jésus na lo ndu yanga ti bongo ti Jésus ni, na lê ni lê ni, lo wara sava. Atâa so peut-être ambeni zo apensé so wali ni asara ye na baba, Jésus abâ ti lo so ye la ahon ndo ti wali ni so. * Lo tene na wali ni, lo tene: “Molenge ti mbi, . . . zia mo duti na nzoni seni na peko ti ngangu kobela ti mo so.” Lo gi ti zia kamene na lê ti lo ape nga ti suku na lo ape, me lo gi gi ti hinga kobela ti wali ni. Na sarango tongaso, lo fa so lo yeke mbeni zo so ahinga ti zia tere ti lo na place ti azo.—Marc 5:25-34.

 Ye so akoli alingbi ti sara ti mû tapande ti Jésus. Tongana mo bâ so wali ti mo aduti nzoni ape, fa na lo so mo bi bê ti mo na lo mingi nga kanga bê. Gi ti bâ aye ni tongana ti so lo yeke bâ, nga comprendre lo na yâ ti asarango ye ti lo. Na tapande, Ricardo atene: “Tongana mbi bâ so bê ti wali ti mbi ayeke son hio hio, mbi yeke sara kue ti kpe ti tene atënë so alingbi ti kiri ti son bê ti lo.”

Jésus ayeke sara ka lisoro lani na adisciple ti lo. Jésus ayeke sara ka lani lisoro mingi na adisciple ti lo nga lo yeke fa lani atënë ti bê ti lo na ala. Lo tene: “Aye kue so mbi mä na yanga ti Babâ ti mbi, mbi fa ni na ala.” (Jean 15:15). Tâ tënë, na ambeni ngoi, Jésus aye lani ti duti gi lo oko ti gbu li ti lo na ndo ti ambeni ye nga ti sambela. Me fani mingi, lo fa atënë ti gbe ti bê ti lo na adisciple ti lo. Na bï so na ndade ni a yeke fâ lo ndali ti so a tene lo yeke mbeni sioni zo, lo tene polele na ala so lo yeke lani na “vundu mingi”. (Matthieu 26:38). Même na angoi so asarango ye ti ala azia vundu na bê ti lo, Jésus ake lâ oko ape ti sara lisoro na adisciple ti lo.—Matthieu 26:40, 41.

Ye so akoli alingbi ti sara ti mû tapande ti Jésus. Fa apensé ti mo nga na atënë ti bê ti mo na wali ti mo. Mbeni wali alingbi ti dema tere ti lo ndali ti so, na lê ti azo, koli ti lo ayeke sara tënë mingi, me na yanga-da, lo yeke zi yanga ape. Me na mbeni mbage, bâ tënë so Ana atene tongana koli ti lo afa apensé ti lo wala atënë ti bê ti lo na lo, lo tene: “Mbi bâ so biani lo ye mbi, nga mbi bâ so mbi yeke nduru mingi na lo.”

Ti punir wali ti ala, ambeni koli ayeke ke ka ti sara tënë na ala; me mara ti bibe ni so ayeke nzoni ape. Mbeni wali atene: “Tongana koli ti mbi asara ngonzo na tere ti mbi, lo yeke ke ti sara tënë na mbi teti alango mingi. Lo sara si mbi bâ so tënë ayeke na li ti mbi nga mbi yeke ye oko ape.” Me, Edwin, so atara ti mû peko ti tapande ti Jésus, atene: “Tongana bê ti mbi ason, mbi yeke zi yanga hio ape, me mbi yeke gi mbeni nzoni ngoi ti tene e sara tënë na ndo ti ye ni so.”

Joy, so e sara fade tënë ti lo na tongo nda ni, abâ achangement na mbage ti koli ti lo ngbene ye so aTémoin ti Jéhovah akomanse ti manda Bible na lo. Joy atene: “Lo changé nga lo yeke sara kue ti sara ye tongana mbeni koli so aye wali ti lo, ti lingbi na tapande ti Jésus.” Akoli na awali kutu mingi, so asara mariage awe, ayeke wara ye ti nzoni na lege ti afango ye ti Bible. Mo nga kue mo ye ti wara ye ti nzoni na lege ti afango ye ni so? Mo lingbi ti hunda na mbeni Témoin ti Jéhovah ti ga ti manda Bible na mo senge senge.