NA NGU 1991, tere ti aTémoin ti Jéhovah ti Russie anzere mingi na ngoi so a mû lege na ala ti sara akua ti ala na peko ti so a kanga lege na ala aninga. Na ngoi ni so, mingi ti ala apensé ape so wungo ti aTémoin na Russie ayeke gue na li ni ti si laso 170000. Na popo ti awafango tënë ti Royaume so afa tënë mingi so, ambeni alondo na kodoro wande la aga na Russie ti mû maboko na kua ti fango le-kobe na lege ti yingo (Mat. 9:37, 38). Zia e mä tënë so ambeni na popo ti ala atene.

Na ngu so a zi kangango lege so, Matthew so ayeke na Grande-Bretagne ayeke lani na ngu 28. Na ngoi ti mbeni kota bungbi so a sara na ngu ni so, na yâ ti mbeni diskur, a fa so a yeke na bezoin ti aita mingi ti mû maboko na acongrégation so ayeke na Poto ti Tö. Wamungo diskur ni amû tapande ti mbeni congrégation so ayeke na Saint-Pétersbourg na Russie, so gi mbeni wakua ti mungo maboko oko la ayeke dä lani me ancien oko ayeke dä ape. Atâa so kue, awafango tënë so ayeke kâ amanda Bible na azo gbani gbani. Matthew atene: “Na peko ti diskur so, mbi yeke pensé lani ti gue gi na Russie, tongaso mbi sambela Jéhovah na mbi fa na lo so mbi ye mingi ti gue kâ.” Matthew abata nginza, lo ka mingi ti aye so lo yeke na ni, lo gue na Russie na ngu 1992. Aye wa la asi na lo kâ?

Matthew atene: “Teti so mbi hinga yanga ti kodoro ti azo ni ape, a yeke lani ngangu na mbi ti sara lisoro na ala nzoni na ndo ti Bible. Mbeni kpale ni ayeke kpale ti warango ndo ti lango. Lo tene: “Mbi hinga encore ape wala lege oke la gi hio tongaso mbi zia mbeni da mbi gue na yâ ti mbeni nde.” Atâa akpale so Matthew awara na tongo nda ni so, lo tene: “Desizion so mbi mû ti ga ge na Russie ayeke nzoni ahon adesizion kue so mbi mû na yâ ti fini ti mbi. Na yâ ti kua so mbi sara ge mbi manda ti zia bê ti mbi mingi na ndo ti Jéhovah na mbi bâ so lo fa lege na mbi na yâ ti aye mingi.” Na pekoni, Matthew aga ancien nga pionnier spécial, lo yeke sara kua fadeso na yâ ti mbeni filiale nduru na Saint-Pétersbourg.

Na ngu 1999, na ngoi so Hiroo ayeke na ngu 25 lo wara diplôme ti Ekole ti formation ministérielle na Japon. Mbeni ita so afa ye na lo na ngoi ti ekole ni awa  lo mingi ti gue na mbeni kodoro wande ti fa tënë. Hiroo amä so kota bezoin ayeke na Russie, tongaso lo komanse ti manda yanga ti Russe. Lo sara nga ambeni ye nde, lo tene: “Mbi gue mbi sara nze omene na Russie. Ndali ti so na hiver dë ayeke sara kâ mingi, mbi gue na nze ti novembre ti bâ wala mbi lingbi ti gbu lê ni.” Na peko ti so lo gbu ngangu na yâ ti ngoi ti dë so, lo kiri na Japon na lo gi ti duti na aye mingi ape tongaso si lo bata nginza ti kiri na Russie. Ti so ni so lo gue kâ biani biani.

Hiroo asara ngu 12 fadeso na Russie awe nga lo sara kua na yâ ti gbâ ti acongrégation. Na ambeni ngoi, lo oko la lo yeke ancien na lo yeke bâ ndo na ndo ti awafango tënë so wungo ti ala ahon 100. Na yâ ti mbeni congrégation, yenga oko oko lo yeke sara mingi ti ambage ti Bungbi ti Kusala, lo yeke mû li ni na Ekole ti Kusala ti aChrétien, mandango Tour ti Ba Ndo, nga lo mû li ni na Mandango Buku ti Congrégation na yâ ti agroupe oku. Lo sara nga gbâ ti avizite na aita ti kpengba ala na lege ti yingo. Na ngoi so Hiroo adabe ti lo na aye so lo sara na yâ ti angu ni so, lo tene: “Mbi yeke lani na ngia mingi ti mû maboko na aita nga ti kpengba ala.” Lo bâ mungo maboko na ndo so bezoin ayeke dä lani mingi so tongana nyen? Lo tene: “Kozo ti tene mbi ga lani ge na Russie, mbi yeke ancien nga pionnier spécial, me so mbi yeke ge so, mbi bâ so songo ti mbi na Jéhovah akiri akpengba ahon ti kozo. Mbi manda ti zia bê ti mbi na Jéhovah mingi na yâ ti aye kue.” Na ngu 2005, Hiroo asara mariage na Svetlana, ala use kue angbâ ti sara kua ti pionnier.

Matthew, so ayeke na ngu 34 na ita ti lo Michael, so ayeke na ngu 28, ayeke azo ti Canada. Ala use kue ague na Russie na bê ti ala adö ti bâ so gbâ ti azo so aye tâ tënë ayeke ga na abungbi me aita-koli ayeke mingi ape ti fa lege na ala. Matthew atene: “Na yâ ti congrégation so mbi sara bungbi dä, wungo ti azo so aga ayeke 200, me mbeni ancien so ngu ti lo ague na li ni mingi awe nga na mbeni wakua ti mungo maboko so ayeke maseka la ayeke mû li ni na ngoi ti abungbi ni. Ye so mbi bâ so apusu mbi ti gue kâ ti mû maboko na aita so.” Matthew ague na Russie na ngu 2002.

Ngu osio na pekoni, Michael ague na Russie na hio tongaso lo bâ so bezoin ti aita-koli ayeke mingi na yâ ti kodoro ni. Teti so lo yeke wakua ti mungo maboko, a zia lo ti bâ ndo na ndo ti compte, apériodique nga na territoire. A mû nga na lo ambeni kua so secrétaire ti congrégation la adoit fade ti sara ni, lo yeke mû adiskur, lo yeke mû maboko na kua ti lekengo aye ndali ti a-assemblée nga na lekengo aDa ti Royaume. Même juska laso, acongrégation so ayeke na Russie ayeke na bezoin ti mungo maboko mingi. Atâa so ti bâ lege ti gbâ ti aye ayeke ngangu kua, Michael, so ayeke ancien fadeso, atene: “Mungo maboko na aita azia ngia na bê ti mbi mingi. Nzoni ye so ahon tanga ni kue so mbi lingbi ti sara na yâ ti fini ti mbi la.”

Fadeso, Matthew asara mariage na Marina na Michael asara mariage na Olga. Ala na ambeni volontaire angbâ ti mû maboko na acongrégation ti gue na li ni.

Na ngu 1994, na ngoi so Tatyana ayeke lani na ngu 16, ambeni pionnier spécial omene alondo na République Tchèque, Pologne, nga na Slovaquie ala ga ti mû maboko na congrégation ti lo na Ukraine. Lo dabe ti lo na ala mingi, lo tene: “A yeke apionnier so ayapu, zo alingbi ti ga nduru na ala, ala yeke gentil nga ala hinga Bible nzoni.” Lo bâ tongana nyen la Jéhovah airi tënë nzoni na ndo ti bibe ti sacrifice so ala yeke na ni, lo tene: ‘Mbi ye ti sara ye tongana ala.’

Tapande ti apionnier ni amû maboko na Tatyana, na angoi so ekole akanga, lo na ambeni ita ague afa tënë na yâ ti aterritoire so ayo na Ukraine nga na Bélarus so ade a fa tënë dä kozo ape. Lo ye avoyage so lo sara ti fa tënë so mingi, tongaso lo leke ti gue na Russie ti fa tënë kâ mingi. Kozoni, lo gue kâ teti mbeni kete ngoi ti bâ mbeni ita-wali so alondo na kodoro  wande si ague kâ nga lo gi mbeni kua so alingbi ti mû maboko na lo ti sara kua ti lo ti pionnier. Na pekoni, na ngu 2000, Tatyana ague na Russie. A yeke lani ngangu na lo ti sara achangement?

Tatyana atene: “Teti so mbi yeke na nginza mingi ape ti wara da ti mbi wani, mbi loué mbeni chambre na yâ ti da ti ambeni zo. A yeke lani kete ye ape. A si na ambeni ngoi mbi ye lani ti kiri na kodoro ti mbi. Me Jéhovah amû maboko na mbi lakue ti bâ so mbi yeke wara ye ti nzoni tongana mbi ngbâ ti fa tënë ge.” Tatyana ayeke missionnaire laso na Russie. Lo tene: “Mbi wara anzoni ye mingi na yâ ti angu kue so mbi sara na kodoro wande, mbi wara nga gbâ ti akamarade. Kota ye ni ayeke so, mabe ti mbi akpengba.”

Masako, mbeni ita-wali so ayeke na ngu 50 tongaso, alondo na Japon. Lo yeke depuis na nzara ti ga missionnaire me kpale ti seni asara si mo bâ mo tene lo lingbi ti sara ni ape. Ye oko, na peko ti so lo wara santé kete, lo soro ti gue na Russie ti mû maboko na kua ti fango lê ti kobe. Atâa so a yeke ngangu lani na lo ti wara nzoni ndo ti lango nga na kua, lo yeke fa lani yanga ti Japonais na azo nga lo yeke sara kua na yanga-da ti mbeni zo ti mû maboko na lo ti sara kua ti lo ti pionnier. Nyen la amû maboko na lo ti ngbâ ti fa tënë?

Na ngoi so Masako adabe ti lo na aye so lo sara na yâ ti angu 14 so lo sara na yâ ti kua ti fango tënë na Russie, lo tene: “Ngia so mbi wara na yâ ti fango tënë asara si mbi girisa akpale kue so mbi wara. Ti fa tënë na ndo so bezoin ti gbâ ti awafango tënë ti Royaume ayeke dä a sara si mbi wara ngangu nga mbi yeke na ngia. Ti mbi, mbi bâ so ayeke mbeni miracle ti bâ tongana nyen Jéhovah amû na mbi kobe, bongo nga na ndo ti lango na yâ ti angu ni so kue.” Nde na Russie, Masako amû nga maboko na kua ti fango lê ti kobe na Kirghizistan. Na ndo ni, lo mû maboko na agroupe so ayeke tene Anglais, Chinois na Ouïgour. Ita-wali so ayeke sara kua ti pionnier fadeso na Saint-Pétersbourg.

Ndali ti kpale ti nginza, asewa ayeke zia kodoro ti ala ti gue na akodoro wande ti gi mosoro. Me legeoko  tongana Abraham na Sara, ambeni sewa ague na akodoro wande ndali ti aye ti yingo (Gen. 12:1-9). Bâ tapande ti ita Mikhail na wali ti lo Inga, so alondo na Ukraine, ala gue na Russie na ngu 2003. A ninga ape, ala wara azo so ayeke gi ti hinga ye na ndo ti Bible.

Mikhail atene: “Mbeni lâ e fa tënë na mbeni ndo so adë aTémoin afa tënë dä ape. Mbeni koli so ngu ti lo ague na li ni mingi azi yanga-da na e lo hunda ndo, lo tene: ‘Ala yeke azo ti fango tënë?’ Na ngoi so e yeda, lo tene: ‘Mbi hinga mbi tene gbanda gba ala yeke si ande. Tënë so Jésus atene lani so alingbi ti ngbâ gi tongaso ape.’ Na pekoni, lo fa peko ti tënë so ayeke na Matthieu 24:14.” Mikhail atene: “Na oko ndo ni so, e wara ambeni wali bale-oko tongaso, ala sara Églize Baptiste. Ala ye mingi ti hinga ye na ndo ti Bible. Ala yeke na buku Mo lingbi, nga lakue na anda-yenga ala mû ni ala manda na Bible. E mû angbonga mingi ti kiri tënë na ahunda ti ala, e he abia ti Royaume na ala nga e te kobe place oko. Vizite so ayeke mbeni oko ti apendere ye so mbi yeke dabe ti mbi na ni.” Mikhail na Inga ayeda biani so ti sara kua na ando so bezoin ti awafango tënë ayeke dä mingi asara si ala ga nduru mingi na Jéhovah, ala ye azo mingi nga ala wara ngia na yâ ti fini ti ala mingi. Laso, ala yeke sara kua ti surveillant ti circonscription.

Ita Yury na wali ti lo Oksana ayeke na ngu 35 tongaso nga molenge ti ala ti koli Aleksey ayeke fadeso na ngu 13. Ala londo na Ukraine. Na ngu 2007, ala sara vizite na filiale ti Russie. Kâ, ala bâ carte ti kodoro ti Russie nga ala bâ so gbâ ti aterritoire ayeke dä so ade a tokua mbeni zo dä ape. Oksana atene: “Na peko ti so e bâ carte ni, e bâ so a yeke na bezoin ti awafango tënë ti Royaume ahon ti so e pensé na ni kozo. Ye so amû maboko na e ti leke na yâ ti li ti e ti gue na Russie.” Nyen la amû maboko na ala mingi? Yury atene: “Dikongo a-article so ayeke na yâ ti ambeti ti e tongana ‘Pouvez-vous vous rendre utile à l’étranger ?’ amû maboko na e mingi. * E gue na Russie e bâ ndo so filiale asara tënë ni na e, e gi da nga e gi kua ti sarango ni.” Na pekoni, na ngu 2008, ala gue na Russie.

Na tongo nda ni, a yeke lani ngangu na ala ti wara kua, fani mingi ala changé ada na peko ti tere. Yury atene: “E sambela Jéhovah lakue ti mû ngangu na e ti tene bê ti e anze pëpe, e ngbâ ti fa tënë nga e zia bê ti e kue na Jéhovah ti mû maboko na e. E bâ tongana nyen la Jéhovah abâ lege ti e na ngoi so e zia aye so andu Royaume na kozo ndo. Kua ti fango tënë asara si sewa ti e akpengba.” (Mat. 6:22, 33). Fango tënë na ando so bezoin ayeke dä mingi amû maboko na Aleksey tongana nyen? Oksana atene: “A mû maboko na lo mingi. Lo mû tere ti lo na Jéhovah nga lo wara batême na ngu gumbaya. So lo bâ so bezoin ti awafango tënë ti Royaume ayeke mingi, apusu lo ti sara kua ti pionnier auxiliaire na angoi so ekole akanga. Tere ti e anzere mingi ti bâ so lo yapu na fango tënë nga lo ye ni mingi.” Fadeso, Yury na Oksana ayeke apionnier spécial.

Aye so asi na awafango tënë so afa polele so, ti gue na ambeni ndo ti fa tënë mingi a hunda ti tene e zia bê ti e kue na Jéhovah. Biani, aita so ayeke fa tënë na ando so bezoin ayeke dä mingi ayeke tingbi na akpale na yâ ti fini territoire ti ala me ala yeke wara ngia mingi tongana azo ayeda na nzoni tënë ti Royaume so ala yeke fa ni. Mo lingbi ti gue na ndo so bezoin ti awafango tënë ayeke dä mingi ti mû maboko na kua ti fango tënë? Tongana mo yeda ti gue, mo lingbi ande ti tene oko tënë so Yury, so ayeda ti gue na ndo so bezoin ayeke dä mingi, a tene: “Ye so mbi regretté ayeke so mbi mû desizion ni hio ape.”