“Lo yeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe. Angbene ye ni ahon ti ala awe.”—Apocalypse 21:4, Mbeti ti Nzapa ti fini dunia.

 “Lo yeke mbô ande ngu ti lê ti ala kue. Fade kuâ, wala mawa ti kuâ, wala toto ti kuâ, wala pasi ayeke duti dä mbeni pëpe. Angbene aye kue ahon awe.”—Apocalypse 21:4, Buku ti Nzapa, Fini Mbuki

 Nzapa amû zendo ti zi ande vundu nga na aye kue so ayeke sara si azo ayeke bâ pasi laso, lo yeke zi ande nga aye so ayeke na gunda ti akpale so.

 “Lo yeke mbô ande ngu ti lê kue na lê ti ala.” Atënë ti zendo ti Jéhovah a so prophète Ésaïe asara tënë ni afa so Nzapa ayeke “mbô ngu ti lê na lê ti azo kue.” (Ésaïe 25:8; Apocalypse 7:17). Tënë so afa so Nzapa ayeke pensé biani na azo so ayeke toto ndali ti mbeni zo so ala ye lo so akui wala lo yeke zi aye so asara si azo ayeke bâ pasi.

 “Kuâ ayeke duti ande dä mbeni pëpe.” A peut ti kiri nga na peko ti tënë so na “kuâ ayeke duti ande dä encore ape” wala “kuâ ayeke duti ande dä oko ape.” Nzapa amû zendo ti zi aye so ayeke sara si azo ayeke kui nga na aye so asara si ala yeke bâ pasi. Na ndö ni, a yeke zingo ande akuâ (1 aCorinthien 15:21, 22). Nga, a yeke futi ande kuâ “biaku biaku.”—1 aCorinthien 15:26.

 “Mua, wala toto, wala pasi ayeke duti dä mbeni pëpe.” Zendo ti Nzapa so aye ti fa so azo ayeke bâ ande pasi encore ape, na tapande, songo yâ ti terê ndali ti mbeni kobela wala ndali ti mbeni kota kä. Me, zendo so afa so akpale ti kobela ti li, vundu nga na songo terê so aga na lege ti siokpari b ayeke duti ande dä encore ape.—aRomain 8:21, 22.

 “Angbene ye ni ahon ti ala awe.” Ndangba tënë so afa achangement so azo ayeke vivre ni ande. Mbeni mbeti atene: “Aye so ayeke si na azo, na tapande, kuâ, mua, toto nga na pasi so azo apeut ti kpe ni ape ayeke ga ande angbene ye na afini ye la ayeke mû place ni.” Azo ayeke duti ande na ngia lakue lakue na ndö ti sese nga ala yeke vivre nzoni tongana ti so Nzapa aleke lani na tongo nda ni.—Genèse 1:27, 28.

 Na début ti chapitre 21, bazengele Jean afa ye so lo bâ lani na yâ ti vision, lo tene: “Mbi bâ mbeni fini yayu na mbeni fini sese.” (Apocalypse 21:1). Lo sara kua na atënë so ti fa akota changement so ambeni versê ti Bible asara tënë ni (Ésaïe 65:17; 66:22; 2 Pierre 3:13). Gouvernement ti Nzapa so ayeke na yayu, wala “fini yayu” ayeke mû ande place ti gouvernement ti azo nga ayeke komande ande na ndö ti “fini sese”, so ayeke mbeni fini bungbi ti azo so ayeke vivre ande na ndö ti sese.—Ésaïe 65:21-23.

 Eskê vision so aye ti sara tënë ti fini na ndö ti sese? Kozoni, zendo ti Nzapa so akomanse na atënë so: “Tente ti Nzapa ayeke na azo.” (Apocalypse 21:3). A mû zendo so na a-ange na yayu ape, me na azo so ayeke na ndö ti sese. Use ni, vision ni asara tënë ti mbeni dunia so “kuâ ayeke duti ande dä mbeni pëpe.” (Apocalypse 21:4). Kuâ ayeke na yayu ape, me a yeke gï na ndö ti sese (aRomain 5:14). Tongaso, a yeke na lege ni ti tene na fin ni so, versê so aye ti sara tënë ti aye so ayeke si ande na ndö ti sese.

 Bâ nduru vidéo so ti bâ ambeni ye so ayeke na yâ ti mbeti ti Apocalypse.