Ên-ën. Bible atene polele so Nzapa acréé azo nga na “mara” ti anyama na akeke nde nde so ayeke na fini a (Genèse 1:12, 21, 25, 27; Apocalypse 4:11). A tene so azo kue alondo na lege ti Adam na Ève, so ayeke akozo babâ na mama ti e (Genèse 3:20; 4:1). Atënë so ayeke na yâ ti Bible ague oko pëpe na tënë so a tene Nzapa asara kua na évolution ti créé aye kue so ayeke na fini. Me Bible ake pëpe tënë ti awandara so atene ambeni changement ayeke passé na yâ ti terê ti acréature nde nde so ayeke na fini.

•  Nyen la ambeni zo amä na bê na ni?

•  Eskê tënë ti évolution amä terê na Bible?

•  So akeke na anyama ayeke changé ambeni ye na terê ti ala tongaso si ala vivre na ndo so ala yeke dä so, so tapande ti évolution la?

 Azo so amä na bê so Nzapa asara kua na évolution ti créé aye so ayeke na fini ayeke na apensé nde nde na ndö ti lege so lo sara na ni. Ambeni zo atene so Nzapa ayeke komande na ndö ti dunia na lege ti kode so a iri ni sélection naturelle, so ti tene anyama wala akeke so ayeke nzoni la angbâ na fini na ala so ayeke nzoni ape akui.

 Ambeni zo so atene Nzapa asara kua na évolution ti créé aye so ayeke na fini apensé nga so:

•   Anyama na akeke kue alondo gï na mbeni créature oko, so avivre asara angu mingi awe.

•   Mbeni mara ti nyama apeut ti changé aga mbeni mara ti nyama nde.

•   Nzapa la na mbeni lege ayeke na gunda ti achangement ni so.

 Tënë so a tene Nzapa asara kua na évolution ti créé aye so ayeke na fini aye ti fa so mbaï ti Bible so asara tënë na ndö ti création, so a wara ni na Genèse, ayeke tâ tënë kue ape. Me, Jésus asara tënë ti mbaï ni tongana mbeni ye so asi lani biani (Genèse 1:26, 27; 2:18-24; Matthieu 19:4-6). Bible atene so kozo si Jésus aga na sese, lo yeke lani na fini na yayu na terê ti Nzapa, na lo mû maboko na Nzapa ti sara si “aye kue” abâ gigi (Jean 1:3). Tongaso, tënë so a tene Nzapa asara kua na évolution ti créé mara ti acréature nde nde kue amä terê ape na aye so Bible afa.

 Bible afa pëpe juska na niveau wa la mbeni mara ti anyama wala akeke apeut ti changé aye na terê ti ala. Me lo ke ape so achangement apeut ti passé na terê ti mara ti anyama nga na akeke nde nde so Nzapa acréé, tongana ala yeke dü ti gue na ni wala tongana situation ti ndo so ala vivre dä achangé. Atâa so ambeni zo apeut ti bâ achangement ni so anyama nga na akeke ni asara so tongana mbeni lege ti évolution, achangement ni so asara pëpe si mbeni fini forme ti nyama wala ti keke abâ gigi.