Teti ambeni ngoi, Nzapa azia lani lege na koli ti mû awali mingi (Genèse 4:19; 16:1-4; 29:18-29). Me na tongo nda ni Nzapa aleke pëpe ti tene koli amû awali use wala mingi. Lo mû lani na Adam gï wali oko.

 Nzapa amû lege na Jésus Christ ti kiri ti zia na sese ye so Lo leke lani na tongo nda ni, so a hunda ti tene koli amû gï wali oko (Jean 8:28). Na ngoi so a hunda tënë na Jésus lani na ndö ti mariage, lo tene: “Na komansema ni, lo so asara ala, lo sara ala koli na wali, na lo tene: ‘Ndani la, koli ayeke zia ande babâ na mama ti lo, lo yeke ngbâ ande na terê ti wali ti lo na ala use kue ayeke ga terê oko.’”—Matthieu 19:4, 5.

 Na pekoni, yingo ti Nzapa apusu mbeni disciple ti Jésus oko ti sû tënë so na mbeti: “Zia koli oko oko ayeke na wali ti lo wani, na zia wali oko oko ayeke na koli ti lo wani.” (1 aCorinthien 7:2). Bible atene nga so alingbi mbeni koli Chrétien so asara mariage awe na so ayeke sara mbeni kota kua na yâ ti congrégation aduti gï “koli ti wali oko”.—1 Timothée 3:2, 12.