A dü mbi na kodro ti La Ceiba na Honduras. A dü e oku, mbi oko la mbi yeke molenge-koli na milieu ni, nga tanga ni. Na ndö ni, mbi yeke wabuburu. E lango lani na yâ ti mbeni sioni quartier, na e yeke pauvre mingi. Aye aga ngangu na e na peko ti so babâ ti mbi akui na yâ ti mbeni accident ti kua na temps so mbi yeke gï na ngu osio tongaso.

 Mama ti mbi asara lani ye kue so lo peut ti sara ti bâ lege ti mbi na aita ti mbi ti wali, me lo yeke lani na moyen ape ti vo na mbi bongo. Tongana ngu apika, dê ayeke sara ka mbi mingi ndali ti so mbi yeke na bongo ti dê ape.

 Na temps so mbi yeke kono, mbi manda lani yanga ti awabuburu ti Honduras (LESHO), ye so amû lege na mbi ti sara lisoro na amba ti mbi awabuburu. Me mama ti mbi na aita ti mbi ti wali ahinga ni ape, na ala yeke sara gï ageste ti ala wani ti causé na mbi. Ye oko, mama aye mbi mingi na lo gi ti sara kue si sioni asi na mbi ape. Lo yeke sara kua na akete signe so lo hinga so ti gboto mê ti mbi si mbi tï pëpe na yâ ti nyongo manga nga na nyongo sämba ahon ndö ni. Merci so mbi kono sân ti tï na yâ ti aye ni so.

 Na temps so mbi ngbâ kete, mama ayeke gue na mbi na Eglize Catholique, me mbi comprendre ye oko ape ndali ti so mbeni zo ti fa peko ni na mbi na yanga ti awabuburu ayeke dä ape. So mbi hinga ka ye ti sara ape na angoi ni so, mbi zia lege ti gue na eglize na temps so mbi yeke na ngu bale-oko. Me, mbi yeke lani na nzara ti hinga ye mingi na ndö ti Nzapa.

 Na ngu 1999, na temps so mbi yeke na ngu 23, mbi tingbi na mbeni wali so alondo na États-Unis so lo yeke na yâ ti mbeni eglize évangélique. Lo manda Bible na mbi nga lo fa na mbi yanga ti awabuburu ti Amerika (ASL). Ye so mbi manda na yâ ti Bible anzere na mbi mingi, a sara si mbi ye ti ga pasteur. Ndani la mbi gue na mbeni centre ti formation so azo ti mbeni eglize la ayeke na ndö ni, so a sara ni na awabuburu na Porto Rico. Na temps so mbi kiri na La Ceiba na ngu 2002, mbi na ambeni kamarade ti mbi e zi mbeni eglize ti awabuburu. Patricia, mbeni oko ti akamarade ti mbi ni, aga wali ti mbi na mbeni ngoi na pekoni.

 So mbi la mbi yeke pasteur ti eglize ti e ni, mbi sara akota fango tënë ti Nzapa na awabuburu na yanga ti awabuburu ti Honduras, mbi yeke fa na ala ambaï ti Bible na foto nga mbi yeke sara ni na scénette ti aidé ala ti mä yâ ni. Mbi sara nga vizite na awabuburu so ayeke na yâ ti agbata so ayeke nduru na ti so mbi yeke dä ti dë bê ti ala nga ti aidé ala na yâ ti akpale ti ala. Mbi gue lani même na États-Unis nga na Zambie ti fa tënë ti Nzapa. Me ti honde ape, mbi hinga ye mingi na ndö ti Bible ape. Mbi yeke fa gï na ala peko ti ye so a fa na mbi nga mbi yeke fa gï na ala aye so mbi comprendre na yâ ti afoto ni. Ti vrai ni, mbi yeke lani na gbâ ti ahundango tënë.

 Mbeni lâ, ambeni zo ti eglize ti mbi ni akomanse ti tene atënë ti mvene na ndö ti mbi. Ala tene so mbi la mbi yeke nyon sämba mingi nga mbi yeke na ndeko. A découragé mbi nga a son mbi mingi. Kete na pekoni, mbi na Patricia e quitté eglize ni.

 Fani mingi, aTémoin ti Jéhovah ayeke ga ka ti fa tënë na e, me e yeke ke ka. Ye oko, na peko ti so e quitté eglize ti e, Patricia ayeda ti tene Thomas na Liccy, mbeni couple so ayeke Témoin ti Jéhovah, aga amanda Bible na lo. A étonné mbi ti bâ so ala hinga yanga ti awabuburu atâa so ala yeke awabuburu ape. Tongaso, mbi kue mbi tï nga na yâ ti mandango ye ni.

 Teti ambeni anze, a manda Bible na e na lege ti avidéo ti yanga ti awabuburu ti Amerika. Me na temps so ambeni kamarade ti e atene mvene na ndö ti aTémoin ti Jéhovah atene ala ayeke adisciple ti azo, e arrêté étude ni. Atâa so Thomas afa na mbi aye so afa so aTémoin ti Jéhovah ayeke adisciple ti mbeni zo na sese ape, mbi mä na bê na atënë ti lo ni ape.

 Ambeni nze na pekoni, mbeni kota vundu asara lani Patricia, tongaso lo sambela Nzapa ti tene aTémoin ti Jéhovah akiri aga na yanga-da ti lo. Aninga ape na pekoni, mbeni voizine ti e so ayeke Témoin ti Jéhovah aga abâ Patricia na lo tene na lo ti hunda na Liccy ti kiri ti sara vizite na lo. Sarango ye ti Liccy afa lani so lo yeke mbeni tâ kamarade. Yenga oko oko lo yeke ga ti bâ Patricia ti kpengba lo nga ti manda Bible na lo. Me atâa aye so kue, mbi ngbâ na kite na ndö ti aTémoin ti Jéhovah.

 Na ngu 2012, aTémoin ti Jéhovah asara mbeni kapa ti fango tënë so ayeke nde ti fa na azo vidéo ti tract Mo ye ti hinga tâ tënë? na yanga ti awabuburu ti Honduras. Liccy aga na e vidéo ni. Na temps so mbi bâ ni, li ti mbi akpe ti hinga so gbâ ti aye so mbi fa lani na azo ayeke na yâ ti Bible ape, na tapande tënë ti enfer nga na ti âme so akui ape.

 Na yenga so aga na pekoni, mbi gue na Da ti Royaume ti aTémoin ti Jéhovah ti bâ Thomas. Mbi tene na lo so mbi ye ti fa tâ tënë ti Bible na awabuburu, me pëpe tongana Témoin ti Jéhovah. Ye so ayeke na li ti mbi lani ayeke ti zi fini eglize ti mbi wani ndali ti awabuburu. Thomas agonda mbi ndali ti so mbi kiri mbi wara nzara ti sara kua ti Nzapa mingi, me lo fa na mbi aÉphésien 4:5, so afa so a lingbi atâ Chrétien aduti beoko na yâ ti congrégation.

 Thomas aga nga na mbi vidéo Les Témoins de Jéhovah—La foi en action, 1re partie: La sortie des ténèbres na yanga ti awabuburu ti Amerika. Vidéo ni so afa tongana nyen la mbeni groupe ti akoli agi lani nda ti Bible nzoni ti mä yâ ti akozo fango ye ti Bible. Na temps so mbi yeke bâ vidéo ni, mbi comprendre ye so akoli so asentir lani. Tongana ala, mbi kue mbi yeke gi lani tâ tënë. Vidéo so asara si mbi yeda so aTémoin ti Jéhovah ayeke fa tâ tënë ndali ti so ye so ayeke na gunda ti atënë ti mabe ti ala ayeke gï Bible. Tongaso, mbi kiri mbi komanse ti manda Bible, na mbi na Patricia e wara batême, e ga Témoin ti Jéhovah na ngu 2014.

 Mbi ye bungbi ti aTémoin ti Jéhovah mingi ndali ti so bungbi ni ayeke sioni ape, gï tongana ti so Nzapa ayeke na sioni oko ape. Azo ti yâ ni ayeke na sioni yanga ape nga ala yeke sara ye na lege ni na amba ti ala. Ala ye siriri nga ala yeke dë bê ti mba. A-Témoin ti Jéhovah ayeke beoko nga ala kue ayeke fa gï a-oko tâ tënë ti Bible atâ kodro wa la ala yeke dä wala yanga ti kodro wa la ala yeke tene.

 A nzere na mbi mingi ti hinga avrai ye so Bible afa. Na tapande, mbi manda so Jéhovah ayeke Nzapa so ngangu ti lo ahon angangu kue, Gbia ti dunia kue. Lo ye azo kue, atâ awabuburu wala azo so ayeke mä ndo. Mbi bâ ndoye ti Nzapa na mbage ti mbi tongana mbeni mosoro. Mbi manda nga so sese ayeke ga ande mbeni pendere paradis nga so e yeke wara lege ti duti na ndö ni na nzoni seni teti lakue lakue. Mbi yeke ku tâ kungo ti bâ tongana nyen la ye so ayeke ga ande tâ tënë!

 Mbi na Patricia e ye mingi ti fa tënë ti Bible na ambeni wabuburu. Ti fadeso, mbi yeke manda Bible na ambeni membre ti ngbene eglize ti e so lani so. Me mbi yeke encore na ahundango tënë ape na ndö ti ye so mbi yeke fa, tongana ti temps so mbi ngbâ lani pasteur. Grâce na mandango Bible so mbi na aTémoin ti Jéhovah e manda, mbi wara akiringo tënë na ahundango tënë ti mbi.