2 Kodi Ife Tiri Na Mulando Thangwi Ya Nyatwa Zathu?
Thangwi Yanji Mphyakufunika Kudziwa Ntawiro
Khala ndi tenepo, thangwi yanji nee tisakwanisa kumalisa nyatwa.
Nyerezerani Ipi
Mpaka papi anthu ali na mulando thangwi ya nyatwa zinaoneka?
-
Kubvuya Anango.
Organização Mundial da Saúde (OMS) yalonga kuti munthu m’bodzi mwa anthu anai athabuka thangwi yakubvuyiwa mu uwana wawo, pontho nkazi m’bodzi mwa akazi atatu asamenywa peno kukakamizwa toera kupita m’mabonde mu umaso wawo.
-
Kufa.
“Mwakubverana na mphangwa za Organização Mundial da Saúde za 2018, anthu cifupi 477.000 aphiwa mu caka 2016 pa dziko yonsene yapantsi.” Kusiyapo pyenepi anthu cifupi 180.000 afa thangwi ya nkhondo na uviyaviya udacitika caka ceneci.
-
Nyatwa za Ungumi.
Mu nsolo ubodzi wa revista National Geographic, nyakulemba Fran Smith alonga: “Anthu akupiringana bhilyau ibodzi asafumali, pontho fodya usacitisa kuti anthu afe thangwi ya utenda wa ntima, derrame, mabefu, utenda wa mapapu na câncer.”
-
Kusiyana Kwa Makhaliro a Anthu.
Nyakupfundza wa pya manyerezero Jay Watts, alonga kuti: “utcerengi, kusankhulana, kusiyana kwa mitundu ya anthu, kusankhulana kwa amuna na akazi, kufuluka na kuidana kwa madzindza, pisathimizira nyatwa za manyerezero.”
DZIWANI PIZINJI
Onani vidhyu yakuti Porque é Que Deus Criou a Terra? mu saiti jw.org.
Bhibhlya Isalonganji
Nyatwa zizinji zinaoneka lero pa dziko zisacitiswa na anthu.
Zizinji mwa nyatwa zenezi zisabwereswa na mautongi akuipa akuti asacitisa umaso wa anthu kukhala wakunentsa kakamwe.
‘Munthu asaponderera munthu ndzace mpaka kunfudza.’—KOELETE 8:9.
Pinakwanisika kupungula nyatwa.
Uphungu wa m’Bhibhlya unatiphedza toera tikhale na ungumi wadidi na kukhala muntendere unango na ndzace.
‘Ntima wakukhurudzika usapasa ungumi manungo, Mbwenye ntcanje ndi ninga utenda unabvundisa magogodo.’—MISANGANI 14:30.
“Bulusani muna imwe ntundu onsene wakukoya kuipirwa muntima, kuipirwa, ukali, kupwekerana, mafala akudzidzida pabodzi na ntundu onsene wa uipi.”—AEFESI 4:31.
