Ina, Bibele dzri kombisa wumboni lebyi kholwisaka bya leswaku Xikwembu xi kone. Bibele dzri hi kutxa ku tiyisa lipfumelo ka Xikwembu, ku nga li ku kombisa lipfumelo ka leswi wukhongoti byi swi hlayaka kambe hi ku tizrisa “ntamu wa ku yanakanya” ni ku ‘yingelisisa’. (Ba-le-Roma 12:1, Tradução do Novo Mundo; 1 Yohan 5:​20) Vona tinhla leti landzrelaka leti seketeliwiki a Bibeleni:

• Ndlela leyi mintxhumu leyi nga matilweni ni misaveni yi hlelekiki ha yone, yi kombisa leswaku ku ni Muvumbi. Bibele Dzri li: ‘Hikusa yindlu yini ni yini yi ni muyaki wa yone; kambe muyaki wa hinkwaswu hi ye Xikwembu Nkulukumba.’ (Ba- Heberu 3:4) Nambi leswi mhaka leyi yi twisisekaka, vanyingi lava dondzriki swa va bindzrela ku swi twisisa. *

• Swanga vhanu, hi navela ku twisisa ntlhamuxelo ni nkongometo wa wutomi nakone leswo swi tsrhama timbilwini tezru nkama ni nkama. Bibele dzri hlaya leswaku ku navela koloko i ‘xivileleko xezru xa moya’, ku nga ku navela ku tiva ni ku gandzrela Xikwembu. (Mattheo 5:3; Apfuletelo 4:​11) Xivileleko lexo xa moya, a xi nyikeli wumboni bya leswaku Xikwembu xi kone ntsena kambe xi tlhela xi kombisa leswaku i Muvumbi lweyi a nga ni lizrandzru lweyi a djulaka leswaku hi gandzrela yene ntsena.​—Mattheo 4:4.

• Wuprofeta byinyingi bya Bibele byi tsraliwe na ka ha sale madzana ya malembe nakone byi hetiseke hi lani byi profetiwiki ha kone. Leswi byi swi hlayaka ni ku twanana ka byone, swi tiyisekisa leswaku byi huma ka mhunu lwa nga ni ntamu swinene.​—2 Petros 1:​21.

• Vatsrali va Bibele a va ni wutivi bya siyensa lebyi a byi nga twisisiwi nkameni wolowo. Hi xikombiso, khale vhanu a va kholwa leswaku misava a yi tsrhame henhla ka xihazri xa kukazri xa ku fana ni ndlopfu, nguluve ya nhova kumbe homu. Ku hambana ni leswo, Bibele dzri hlaya leswaku Xikwembu xe yi ‘hayeka la ku ngeke na ntxhumu’. (Yob 26:7) Hi ku fanana, Bibele dzri vulavula hi xivumbeko xa misava swanga “xizrendzruvutana,” kumbe yi fana ni “bola”. (Ezaya 40:22,Tradução do Novo Mundo) Vanyingi namunhla va dumba leswaku dzrungula ledzri vatsrali va Bibele va dzri tsraliki, dzri pfa hi ka Xikwembu.

• Bibele dzri hlamula swivutiso swinyingi swa ku kazrata, leswi loko vhanu va nga kumi tinhlamulo leti dzringanaka, va hlayaka leswaku a ku na Xikwembu. Hi xikombiso: Loko a li leswaku Xikwembu xi ni lizrandzru nakone xi ni ntamu hinkwawu, ha yini ku va ni ku xaniseka ni wubihi a misaveni? Ha yini wukhongoti byi hlohlotela wubihi a matsrhan’wini ya ku hlohlotela wululami?​—Tito 1:​16.