LOKO ka malembenyana ntsrhaku u ke u yendzrela xihlala lexitsrongo xa Sangir Besar, a Indonésia, swi nga yentxeka u ke u vona vamakwezru vazrazru va xisati na va tizra a praya. Va tiviwa ngopfu hi ku zrezra ni ku pfuna vhanu kuva va twisisa Bibele. Kambe ka khambi ledzri va yentxa ntizro lowu hamabaniki ni lowo.

Xa ku sungula, va nghena matini va tlakula mazribye ya makulu va huma na wone handle, man’we ya mazribye wolawo ma dzringana ni bola hi ku kula. Kutani va tsrhama ka xibankwana na va ni tihamela va sungula ku pandzrelela mazribye wolawo kuva ma va swizribyana swa switsrongo. Ntsrhaku ka leswo, va teka mazribye wolawo va ma txhela ka swibakitana swa plaxtiko va va va ma tlakula va muka na wone kaya. Ntsrhaku, ku buya kamiyawu akuva dzri ta ta ma pakela leswaku va ma tizrisa ka ku hamba switaratu.

Mun’we wa vamakwezru lava i Hulda. Swiyimu swake a swi mu pfumelela ku va a tizra nkama lowu yengetelekiki ku tlula lavan’wana. Hakanyingi a a ta tizrisa mali leyi a a yi kuma hi ku bandzra mazribye akuva a wundla ndangu wake. Kambe swoswi a a ni kungu dzrimbeni miyanakanywini. A a djula ku xava tablet akuva a kota ku nghena ka JW Library^®. Hulda a a swi tiva leswaku a mavhidiyu ni switizro swin’wana leswi kumekaka ka aplikativhu dzra JW a swi ta mu pfuna ku yampswisa ndlela leyi a zrezraka ha yone ni ku mu pfuna ku dzri twisisa ha hombe Bibele.

Hulda a a tizra mawora mabidzri mixo wun’wana ni wun’wana, ku dzringana hweti ni hamfu, akuva a kota ku tata xikamiyawana hi mazribye. Hi wugamu a dzri tlhaselile kungu dzra kuva a xava tablet.

Hulda a li: “Nambileswi ku pandzrelela mazribye a swi ni siya na ni kazrale ngopfu, swivavu hinkwaswu leswo ni sungule ku swi dzrivala loko ni sungule ku tizrisa tablet ledzri a dzri ni pfuna a nsin’wini ni le mintlhanganwini.” A tlhela a hlaya leswaku a tablet ledzri dzri mu pfune ngopfu a ku sunguleni ka ntungu wa Covid-19, hikusa a mintizro hinkwayu ya bandla a yi hambiwa hi ku tizrisa Zoom. Hi nyonxa na Hulda hi leswi a kotiki ku tlhaselela kungu dzrake.