• Lweyi a hlawuliwiki hi Xikwembu Nkulukumba. ‘Kasi mine ndzri simeki hosi yanga . . . Ndzri ta ku nyika matiko ma va pfindla dzraku, ni vugamu bya misava byi va byaku.’​—Amapsalma 2:6, 8.

• Madapfindla wa Hosi Davhida. ‘Hi belekeliwe n’wana, hi nyikiwile n’wana wa ndzrisanyana . . . A ku kulisiwa ka vufumi byakwe ni ka ku zrula ku nga ve na vugamu, a xiluvelweni xa Davhida ni le mfun’wini wakwe, ku wu tiyisa.’​—Ezaya 9:6, 7.

• Lweyi a belekiwiki a Betlehema. ‘Wene Bethlehema . . . , ku wene ku ta huma ku mine lwa taka va mufumi . . . A ta va nkulu a ku ya gama vugan’wini bya misava.’​—Mika 5:2, 4.

• Lweyi a dzreliwiki hi vhanu a va a dlayiwa. ‘A ve lwe wa ku soliwa, kutani a hi hlayanga ntxhumu ha yene. . . . Yene, a ku tlhaviwa hi kolahu ka swidoho swezru, a tsrhoviwile hi kolahu ka ku sombolaka kwezru.’​—Ezaya 53:3, 5.

• Lweyi a pfuxiwiki ku feni a tlhela a phatimisiwa. ‘U nga wu nyikete moya wanga Xeyole [kumbe xizra], nakone u nga pfumele leswaku muzrandzriwa waku a vona xizra. . . . [Ku] ni ku nyonxa vokweni dzraku ledzra xinene hi la ku nga helikiki.’​—Amapsalma 16:10, 11.

A matin’wini hinkwawu ya vhanu, o va mhunu mun’we ntsena lweyi a nga ni timfanelo hinkwatu ta Mufumi lweyi a fanelekaka, nakone mhunu yelweyo i Yesu Kriste. Handle ka swoswo, ntsrumi yin’wana a yi byele Mariya mamana wa Yesu leswaku: ‘Xikwembu Nkulukumba a ta mu nyika xitsrhamu xa vuhosi xa Davhida tatana wakwe, . . . a vuhosi byakwe byi nga vi na vugamu.’​—Luka 1:31-33.

Yesu a nga zanga a va mufumi lani misaveni. A matsrhan’wini ya leswo, yene a ta fuma vhanu ku sukela a matilweni swanga Hosi ya Mfumu wa Xikwembu Nkulukumba. I yini leswi mu yentxaka a va Hosi leyi fanelekaka? Vona leswi a swi yentxiki nkama lowu a a li la misaveni.

•   Yesu a a zron’weka hi vhanu. Yesu a a pfuna vhanu hinkwavu vavanuna ni vavasati, vampswha ni swiduhwati, swipfundzri nambi swisiwana nakone swi nge na mhaka leswaku i va kwini. (Mattheo 9:36; Marka 10:16) Siku dzrin’wana mhunu lweyi a a ni nhlokonho a kombele leswi ka Yesu: ‘Loko u swi zrandzra, wa swi kota ku ndzri basisa.’ Yesu a mu twele wusiwana kutani a mu hanyisa.​—Marka 1:40-42.

• Yesu a hi dondzrise ndlela ya ku nyonxisa Xikwembu Nkulukumba. Yesu a te: ‘A n’wi swi koti ku tizrela Xikwembu Nkulukumba na Mamona [wukosi, Tradução do Novo Mundo, NM].’ A hi kutxe ku khoma vambeni hi ndlela leyi hi zrandzraka ku khomiwa ha yone​—nsinya lowu wu tiviwaka swanga Nawu wa Mahanyela. Nangweso, Yesu a hi kombe leswaku Xikwembu Nkulukumba a nga zron’weki ntsena hi leswi hi swi yentxaka, kambe ni hi ndlela leyi hi pimisaka ni ku titwa ha yone. Xileswo, akuva hi nyonxisa Xikwembu Nkulukumba ku djuleka hi zrindzra miyanakanyu yezru. (Mattheo 5:28; 6:24; 7:12) Yesu a khanyise leswaku, akuva hi va lava nyonxeke, hi fanele ku tiva leswi Xikwembu Nkulukumba a swi yimeleke ka hine hi va hi swi yentxa.​—Luka 11:28.

• Yesu a dondzrise leswi ku zrandzra vhanu swi tlhamuxelaka swone. Mazritu ni mintizro ya Yesu a swi ni ntamu swi tlhela swi khumba timbilu ta lava a va mu yingiseta. ‘A switsrhungu swi hlamala hi dondzriso dzrakwe, hikuva afa a va dondzrisa swanga hi lwe wa ntamu.’ (Mattheo 7:28) Yesu a te: ‘Zrandzrani valala venu.’ Nambi nkama lowu a a li kusuhi ni ku fa a mhandzrini ya nxaniso, yene a khongote a ku: ‘Tatana! va dzrivalele; hikusa a va swi tivi leswi va swi yentxaka.’​—Mattheo 5:44; Luka 23:34.

Yesu hi yene mhunu lweyi a fanelekaka ngopfu ku fuma misava hinkwayu hikusa hi lwenene nakone awa zron’weka hi vhanu. Kambe xana yene a ta sungula dzrini ku fuma?