1 Xana Hi Nga Nyika Nandzru Xikwembu Nkulukumba Hi Ku Xaniseka Kwezru?
Ha Yini Swi Li Swa Lisima Ku Tiva Nhlamulo?
Loko Xikwembu Nkulukumba a ni nandzru hi ku xaniseka kwezru, swa twisiseka loko vhanu va nga djuli ku twa ntxhumu ha yene.
Yanakanyisisa Hi Leswi
Hi ndlela yin’we kumbe yimbeni, vazrangeli vanyingi va wukhongoti va dondzrisa leswaku Xikwembu Nkulukumba a ni nandzru loko hi hlupheka. Hi xikombiso, van’we va li:
-
Timhangu ta ntumbuluko i xikhatiso xa Xikwembu Nkulukumba.
-
Vatsrongwana va fa hi leswi Xikwembu Nkulukumba a djulaka tintsrumi tilweni.
-
Xikwembu Nkulukumba a seketela tiyimpi leti vangaka ku xaniseka lokukulu.
Xana leswi vazrangeli va wukhongoti va swi dondzrisaka mayelanu na Xikwembu Nkulukumba i ntiyiso? Xana hi nga dumba leswi va swi hlayaka?
AKUVA U TIVA SWIN’WANA
Vona vídeo ledzri liki Ha Yini U Fanela Ku Dondzra Bibele?, ka jw.org.
Leswi Bibele Dzri Swi Hlayaka
Xikwembu Nkulukumba a hi yene a vangaka ku xaniseka kwezru.
Leswi Xikwembu Nkulukumba a nga ni wumhunu lebyinene, a nge txhuki a vanga ku xaniseka kwezru. Hi xikombiso, Bibele dzri hi byela leswi mayelanu na Xikwembu Nkulukumba:
‘Tindlela takwe hinkwatu i ku lulama . . . A lulamile, a dumbekile.’—DEUTERONOMA 32:4.
‘A swi ve kule ni Xikwembu Nkulukumba ku yentxa swa ku biha; ni kule ni Lwe Wa Ntamu Hinkwawu ku yentxa wusomboloki.’—YOB 34:10.
‘Lwe Wa Ntamu Hinkwawu a nga ka a nga sombolokisi a ku lulama.’—YOB 34:12.
Xikwembu Nkulukumba a nga byi seketeli wukhongoti lebyi dondzrisaka madzrimi mayelanu na yene.
Leswo swi patsra wukhongoti lebyi dondzrisaka leswaku Xikwembu Nkulukumba a vanga ku xaniseka kwezru ni wukhongoti lebyi seketelaka tiyimpi.
‘Yehovha a hanga ku ku mine: A vaprofeta va profeta madzrimi hi vito dzranga; a ndzri va zrumanga; a ndzri va leletanga; a ndzri vulavulanga na vone; va n’wi profetela swivoniso swa madzrimi, . . . ni ku tsika ka timbilu tavu.’—YEREMIYA 14:14.
Yesu a sole wukhongoti bya madzrimi.
‘A hi hinkwavu lava ndzri hlayaka: Hosi, hosi! va taka nhingena a mfun’wini wa matilu: a ku va lweyi a yentxaka ku zrandzra ka Tatana lweyi a nga matilweni. Lava ku tala va ta ku ku mine hi siku dzrodzro: Hosi, hosi, xana a ha dondzrisanga hi vito dzraku na? hi va hi hlongola ni mademona hi vito dzraku, hi hamba mahlolana laya ku tala hi vito dzraku xana? Laho, ni ta va byelisisa, ndzri ku ku vone: A ndzri tsrhami ndzri n’wi tiva; sukani ku mine, n’wi vatizri va swidoho!’—MATTHEO 7:21-23.
