DACĂ găleanas acana chichiva bărșența pi țâni insula Sangir Besar, anda Indonezia, daștil-pe că dichleanas tumen trine pheianța. Von sile prinjiande andi insula anda codoia că ajutin le manușen te hachiaren i Biblia. Tha, pi plaja cherenas vareso diferime.

Mai anglal, von rodenas ando pai bare bara, cai pala codoia îngărenas-le pi plaja. Chichiva anda codol bara sas cadea de bare sar iech mingea de fotbal. Pala codoia, beșenas pe scamina anda cașt hai iecha ciocanoia phagherenas bara andel țâne cotora sar iech anro chainiaco. Șionas-le andel găleți de plastic, vazdenas-pe opre pe iech scara hai jianas caring chăre. Code, șionas-le ande niște bare plase, cai daștinas te aven îngărde andel camioane hai folosime sar materiale de construcție andal droma.

Iech anda cadal pheia sas i Hulda. Le love cai cherelas-le anda cadai buchi ajutilas-la te les sama pe peschi familia. Tha, anda codoia că voi daisardea te cherel mai but buchi sar le coaver, șiutea pesche andi goghi te cherel vareso: te chinel pesche iech tableta caște daștil te jial andre pi aplicția JW Library^®. I Hulda jianelas că le materialea video hai le publicații anda i aplicația daștinas te ajutin-la te hachiarel mai mișto i Biblia hai te ajutil vi mai but le manușen andi predicarea.

Ande fiesavi teharin voi jialas mai sigo caște mai cherel buchi încă dui ceasuria. Ande cado timpo, voi phagărdea cadea de but bara că pherdea iech țâno camiono, hai le lovența cai lea-le, daisardea te chinel i tableta.

I Hulda phenel: „Chiar cana somas chini hai duchanas-ma zurales mânre vasta, cana astardem te phirav pi tableta, bâstărdem orisavi duch. Somas voime că cadaia avelas te ajutil-ma te avav mai lași andi predicarea hai te pregătiv-ma mai ușoro andal întruniri”. I tableta sas iech baro ajutoro anda late vi cana astardea i pandemia, anda codoia că sea le întruniri hai vi i predicarea încărenas-pe online. Sam voime că i phei Hulda daisardea te cherel so șiutea pesche andi goghi.