Pușimata catar amare cititori
Con si i ‘jiuvli’ anda savi del-pe duma ando Isaia 60:1 hai sar ‘vazdel-pe’ hai ‘del lumina’?
Ando Isaia 60:1 citisaras: „Vazde tut, jiuvlie, de lumina, anda codoia că avilea chi lumina! I gloria le Iehovaschi strălucil opral tute”. Anda so phenel-pe code hachiaras că „i jiuvli” si o Siono, sau o Ierusalimo, i capitala le regatoschi anda Iuda ande codo timpo. a (Is. 60:14; 62:1, 2) Cado foro reprezentil sea o poporo Israel. Tha le dumes cai phendea-len o Isaia vazden dui pușimata. O dintuno: Cana hai sar ‘vazdea-pe’ o Ierusalimo hai dea iech lumina spiritualo? Hai i duito: Pheren-pe le dumes cai phendea-len o Isaia vi mai but ande amare ghiesa?
Cana hai sar ‘vazdea-pe’ o Ierusalimo hai dea iech lumina spiritualo? O Ierusalimo hai o templo așile phagărde, ando timpo so le evrei sas-le îngărde ando Babilono efta-vardeș bărșa. Tha, pala so o Babilono pelea ando vast le manușengo cai sas-le mezi hai perși, le israeliți anda sea o Babilono daisarde te risaren-pe ande pengo them hai te anen parpale i închinarea uji. (Ezra 1:1-4) Anda o bărș 537 a.a.e., codola cai așile zurale ando pachiamos anda le 12 triburi le Israelosche risaile parpale. (Is. 60:4) Le israeliți astarde te anen jertfe le Iehovasche, te încăren le sărbători hai te vazden pale o templo. (Ezra 3:1-4, 7-11; 6:16-22) Cadea că, i pachiv le Iehovaschi astardea te strălucil pale opral o Ierusalimo, adică opral le manușa le Devlesche. Cadea, vi le israeliți astarde te aven iech lumina simbolico andal națiuni cai ci prinjianenas le Iehovas.
Tha, le profeții cai phendea-len o Isaia ci pherdile-pe cu sea ande codol ghiesa. Le mai but israeliți ci așunde mai dur le Iehovastar. (Neem. 13:27; Mal. 1:6-8; 2:13, 14; Mat. 15:7-9) Mai târzio, von ci camle te pachian nici ando Mesia, o Isus Cristos. (Mat. 27:1, 2) Ando bărș 70 a.e., o Ierusalimo hai o templo sas-le distrugime i duito var.
O Iehova phendea de mai anglal că va întâmplola-pe cado nasulimos. (Dan. 9:24-27) Si claro, că o scopo le Iehovasco ci sas ca sea le profeții anda o lașiarimos la închinareaco uji anda Isaia, o capitolo 60 te pheren-len o Israelo purano.
Pheren-pe le dumes cai phendea-len o Isaia vi ma but ande amare ghiesa? Da, tha anda aver jiuvli simbolico, „o Ierusalimo de opral”. O Apostolo Pavel scriisardea anda late: „Si amari dei”. (Gal. 4:26) O Ierusalimo de opral si i partea cerisco anda i organizația le Devleschi, cărdi anda jene spiritualo loialo. Lache șiave si o Isus hai le 144 000 creștini machle spiritosa, saven, cadea sar o Pavel, si-len speranța cerisco. Le creștini machle sile „iech națiunea sfânto”, „o Israelo le Devlesco”. (1 Pet. 2:9; Gal. 6:16)
Sar ‘vazdea-pe’ o Ierusalimo de opral hai astardea ‘te del lumina’? Voi cărdea cadaia prin lache șiave machle pa i phuv. Mai dur, va avela te dichas sar amean le buchia prin save nachle von hai i profeția cai phendea-la o Isaia ando capitolo 60.
Le creștini machle trebunas ‘te vazden-pe’ anda codoia că pala o merimos le apostolengo i apostazia astardea te bariol hai sas-le ando tunearico simbolico. (Mat. 13:37-43) Ande codo momento, von sas-le tela o zuralimos le Babilonosco o Baro, o imperio mondialo la religiaco neciaci. Von așile tela lesco zuralimos ji co „phandaimos le sistemosco”, iech timpo cai astardea ando bărș 1914. (Mat. 13:39, 40) Ando bărș 1919, sas-le dine drom hai sigo astarde te den sea penghi zor te den lumina spiritualo andi predicarea la vesteachi lași anda o Regato. b Andel bărșa cai nachle, le manușa anda sea le națiuni avile che cadai lumina, chiar vi codola cai așile anda o Israelo le Devlesco, ‘le regi’ anda save del-pe duma ando Isaia 60:3. (Rev. 5:9, 10)
Ando viitorii, prin le creștini machle va dichiola-pe vi mai but i lumina le Devleschi. Sar? Pala so va jiana co cerii va cherena partea anda „o Nevo Ierusalimo”, i bori le Cristososchi, cărdi anda 144 000 regi hai rașaia. (Rev. 14:1; 21:1, 2, 24; 22:3-5)
O nevo Ierusalimo va cherela iech buchi importanto caște pherel i profeția anda Isaia 60:1. (Dich vi Isaia 60:1, 3, 5, 11, 19, 20 hai Revelația 21:2, 9-11, 22-26.) Cadea sar o Ierusalimo purano sas o than ande savo savore jianas te anen închinarea, sa cadea o Nevo Ierusalimo hai o Cristos va cherena partea anda iech nevo raimos. Sar ‘va dela-pe tele anda o cerii catar o Del’ o Nevo Ierusalimo? Vo va ortosarela pesco dichimos caring i phuv. Le manușa cai daran le Devlestar anda sea le națiuni „va phirena prin leschi lumina”. Lendar va avela choslo chiar vi o păcato hai o merimos. (Rev. 21:3, 4, 24) Ji la urmă, va avena „neviarde sea le buchia”, cu sea, cadea sar phendea de mai anglal o Isaia hai aver profeți. (Fap. 3:21) Cado baro neviarimos astardea cana o Isus cărdilo Rege hai va phandavela-pe cana va terminila-pe lesco Raimos de Iech Mia Bărșa.
a Ando Isaia 60:1, Traducerea la lumeachi nevi folosil-pe i duma „jiuvli” ando than de „Sion”, sau „Ierusalim”, anda codoia că le verbe andi șib ebraico cai însemnon „te vazde-pe” hai „te del lumina”, sile co geno feminino, cadea sar si vi i persoana anda savi del duma „tut”. I duma „jiuvli” ajutil le rromen cai citin te hachiaren că code del-pe duma anda iech jiuvli simbolico.
b O lașiarimos spiritualo anda 1919 silo sicado vi ando Ezechiel 37:1-14 hai andi Revelația 11:7-12. O Ezechiel phendea de mai anglal că va avela o lașiarimos spiritualo savore creștinengo machle pala but timpo de cana sas-le sar phandade. I profeția anda Revelația phenel că năștil-pe încă iech data spiritualo iech țâno grupo creștinengo machle cai sas-le angla i organizația, pala so ci mai daisarde te slujin libero le Iehovasche anda codoia că sas-le îngărde ando phandaimos pe neciacimaste. Ando bărș 1919, cadal creștini sas-le alosarde te slujin sar ‘o sclavo fidelo hai prevăzătorii’. (Mat. 24:45; dich vi o lil I Închinarea uji co Iehova– andini parpale!, p. 118)
