Le Martori phiravenas-pe șucar na numai le manușența, tha vi mânre duie jucălența. Ande iech ghies, i Elaine, i phei cai beșelas pașa o vurdonorro, dea le jucălorren chichiva biscuiți. Pala codoia, ori chichivar arăsleam pașa o vurdonorro, le jucăla țârdenas-ma caring le Martori caște avel lenghe dine biscuiți.

Nachle chichiva șiona, timpo ande savo le jucălorre hanas penghe biscuiți, hai me demas duma harnes le Martorența. Tha me ci camlem te dav duma prea but lența. Sas-ma mai but sar 70 bărșa hai ci jianglemas ande soste pachian von. Anda codoia că ci arachlem so ajucărdemas-ma ca le religii protestanto, pachiaiem că sas mai mișto te studiisarav i Biblia corcoro.

Ande cado timpo, dichlem vi avere Martoren cai beșenas pașa le vurdonorre ande mai but thana anda o foro. Vi von phiravenas-pe șucar. De fiesavi data cana șiutem lenghe pușimata, von camle te den-ma o răspunso andai Biblia hai cadaia cărdea-ma te pachiav-ma mai but ande lende.

Ande iech ghies, i Elaine pușlea-ma: «Pachias că le animalea sile iech daro le Devlestar?». «Sar te na!», phendem lache parpale. Pala codoia, citisardea manghe le versetea anda Isaia 11:6-9. Cadai buchi arăslea ande mânro ilo hai camlem te prinjianav mai but buchia andai Biblia, tha ci camlem te lav publicații.

Andel ghiesa cai avile, i Elaine hai laco rrom, o Brent dine duma manța harnes, tha anda buchia zurales interesanto. Von phende manghe te citisarav andai Biblia catar o Matei ji co Fapte caște hachiarav so însemnol te aves iech ciacio creștino. Hai cadea cărdem. Pala țâra timpo, astardem te studiisarav i Biblia cadale phralența, o Brent hai i Elaine. Sas o milai le bărșesco 2016.

Ande fiesavo curco, abia ajucărdemas te studiisarav i Biblia hai te jiav ca le întruniri catar i sala le Regatoschi. Mânro ilo bariolas că daisardem te hachiarav so phenel ciaces i Biblia. Nachlea iech bărș hai chichiva șiona ji cana boldem-ma. Acana si man 79 bărșa hai pachiav anda sea o ilo că alosardem o lașio drom. Mânro ilo silo pherdo bucuria anda codoia că o Iehova andea-ma ande peschi familia.”