Imaginisar tuche i situația cai avel: O Alex ci jianel so te pachial. Sea o timpo pachialas ando Del hai andi creația. Tha aghies, leschi profesoara de biologie phendea lenghe că i evoluția si ciaci, bazome pe studii științifico demno pachiamasco. O Alex ci camel ca le coaver te asan lestar. „Ji la urmă, dacă le manușa de știință sicade că so phenel-pe anda i evoluția si ciaces, con som me te na pachiav ande soste phenen von?”, phenel pesche vo.

Dacă aveias ande lesco than, pachiaias că so phenel-pe anda i evoluția si ciaces numai anda codoia că le lila phenen cadea?

Le manușa anda le dui riga camen te phenen sigo so pachian bi te jianen ciaces sostar pachian cadaia.

• Unii pachian andi creația pentru că cadea sas-le sicade te pachian ca i changheri.

• Unii pachian ande so phenel-pe andai evoluția pentru că cadea sas-le sicade te pachian ca școala.

I Biblia phenel: „Orisavo chăr silo cărdo varecastar, tha codo cai cărdea sea-l buchia si o Del”. (Evrei 3:4) Si mișto te pachias cadai buchi?

SO PHENEL-PE: Sea so si ando universo cărdilea anda iech explozia necontrolime po anav big bang.

SO PHENEL-PE: Le manușa avile anda le animale.

SO PHENEL-PE: I evoluția si iech fapto sicado.

„Dacă, ando timpo cana phires ande iech veș diches iech șucar chăr, gândisares-tu: «Ce șucar! Le cașta șiute-pe corcore cadea te cheren cado chăr.»? Nici! Na avelas logico. Cadea că, sostar te pachias că sea so si ando universo cărdile corcore?”. (Julia)

„Imaginisar tuche că varecon phenel tuche că sas iech explozia ca iech tipografia hai șiordea-pe i cerneala po pereți hai pi phuv. Anda cadai cerneala cărdilea-pe iech sasto dicționaro. Pachiaias tu cadaia?”. (Gwen)

I Biblia phenel tuche te folosis „o zuralimos la goghiaco”. (Romani 12:1) Anda codoia, o pachiaimos ando Del ci trebul te bazol-pe numai pe

• SO SIMȚOSARES (Simțosarav că trebul te avel iech zuralimos mai baro)

• SO PHENEN AVER MANUȘA (Traisarav mașcar manușa cai pachian ando Del)

• SO CHEREN-TU AVER TE PACHIAS (Le dada sicade-ma te pachiav ando Del, ci sas-ma so te cherav)

Mai mișto, trebul te avel-tu motivea zurale anda chio pachiamos.

„Cana som andi clasa hai ascultisarav mânre profesoros sar explichil manghe sar si amaro corpo, som siguro că o Del existil. Fiesavi partea anda corpo, sila iech funcția. Cadal funcții, chiar vi le mai țâne, cheren penghi buchi ande amaro corpo bi te das amari seama. Ciaces, o corpo le manușesco silo foarte șucar!”. (Teresa)

„Cana dichav iech chăr foarte baro, iech vaporo sau iech mașina pușav-ma: «Con cărdea-le?». Si nevoia manușendar goghiaver caște cheren iech mașina pentru că, la sila but țâne piese cai trebun te cheren buchi ande iech than ca i mașina te jial. Dacă le mașini trebul te aven cărde varecastar, sa cadea si vi amența, le manușența”. (Richard)

„Cana sichilem mai but andai știința, arăslem te na mai pachiav andi evoluția cadea de but. . . . Anda mande si nevoia de mai but «pachiamos» caște pachiav andi evoluția sar te pachiav ande iech Creatorii”. (Anthony)

Chiar cana le manușa de știință roden de but bărșa dovezi anda evoluția, von ci arachle iech explicația cai te avel acceptime fiesavestar anda lende. Dacă le manușa de știință, cai sile experți, ci daștin te aven de acord iech avereia andai evoluția, avelas greșime ca tu te na pachias ande late?