Chiar cana cheres sea so daștis te avel-tu iech familia hai iech căsnicia fericime, buchia cai ci ajucăres-tu lende daștin te întâmplon-pe hai cheren te avel tuche pharo te încăres chi bucuria (Eclesiasto 9:11). O Del, pherdo iubirea del ame ajutorii cana nachas pa-l pharimata. Dacă tu hai chi familia va cherena so phenel-pe andel principii biblico cai aven, va daștina te nachen părdal vi le mai phare situații.

SO PHENEL I BIBLIA: „Șiuden sea tumare îngrijorări pe leste, pentru că vo interesil-pe tumendar.” (1 Petru 5:7) An tuche amintea sea o timpo că na o Del si doșalo anda le zumaimata prin save naches (Iacov 1:13). Ando timpo so va avela te pașios le Devlestar, vo va dela-tu o mai lașio ajutorii (Isaia 41:10). ‘Șior chio ilo angla leste!’ (Psalmo 62:8)

Mai but, va aracheia mângâierea cana va avela te citis ande fiesavo ghies i Biblia hai cana studiis-la. Cadea, va avela te simțosares că o Iehova „mângâil-ame ande sea amare necazuri” (2 Corinteni 1:3, 4; Romani 15:4). Vo promitil tuche că va dela-tu „i pacea le Devleschi, cai nachel orisavi gândirea” (Filipeni 4:6, 7, 13).

SO DAȘTIS TE CHERES:

• Mang o ajutorii le Iehovasco andi rugăciunea caște așes calmo hai te gândisares claro.

• Dich sea le opțiuni cai situ hai alosar i mai lași anda lende.

SO PHENEL I BIBLIA: „O ilo codolesco cai hachiarel primil prinjianimos hai o can codolengo cai sile înțelepți rodel te arachel prinjianimos.” (Proverbe 18:15) Chide le informații cai trebun-tu. Aflisar save si le necesități fiesavesche anda chi familia. De duma lența. Ascultisar so phenen (Proverbe 20:5).

Tha cana merel tuche varecon drago? Te na avel tuche lajiav te roves. An tuche amintea că vi le Isusosche „dea lesche asva” (Ioan 11:35; Eclesiasto 3:4). Mai but, si importanto te odihnis-tu hai te soves chichi trebul (Eclesiasto 4:6). Cadea, va daștia te naches mai ușoro pa iech situația cai duchavel-tu.

SO DAȘTIS TE CHERES:

• Cher tuche o obiceio te des duma chia familiaia. Cadea, cana va avela iech problema sau iech situația phari, von va simțona-pe liberi te den duma tuia.

• De duma manușența cai nachle prin situații sar chire.

SO PHENEL I BIBLIA: „Iech ciacio amal iubil sea o timpo hai si iech phral cărdo anda o ghies le necazosco.” (Proverbe 17:17) Che amala camen te ajutin-tu, tha daștil-pe că ci jianen so te cheren. Na dara te phenes lenghe so situ ciaces nevoia (Proverbe 12:25). Sa cadea, de duma codolența cai prinjianen mișto i Biblia caște aflis sar aplinchin-pe le principii anda late. I îndrumarea cai den-la tuche anda o Cuvânto le Devlesco va ajutila-tu (Iacov 5:14).

Va aracheia o ajutorii cai situ nevoia cana san ando mașcar le manușengo cai sile ciaces pachiaimos ando Del hai pachian-pe ande lesche promisiuni. Mai but, cana ajutis varecas cai siles nevoia te avel zuriardo, va avela-tu mai but mângâierea. De duma avrenghe anda chio pachiamos ando Iehova hai anda lesche promisiuni. Cadea că, ajutisar avren hai na duriar-tu codolendar cai iubin-tu hai duchal len tutar (Proverbe 18:1; 1 Corinteni 15:58).

SO DAȘTIS TE CHERES:

• De duma ieche amaleia cai si tuche pașe hai mech-les te ajutil-tu.

• Av sincero hai phen lesche exacto ce buchiandar situ nevoia.