«Кала мэ аша́вас май взросло, мэ лэм тэ шав сама, кай ман цырдэл каринг и мурша. Кадэлэса сас фартэ ԥарэс тэ борисавас. Мэ гиндосаравас, кай через и время кадэла чуства ужана, но вонэ идоси на дэн манди покоё» (Дэйвидо, 23 года).

 О Дэйвидо — христианино, саво камэл тэ уӷодий лэ Дэвлэсти. Но возможно ли када, если лэс цырдэл каринг и мурша? Сар о Дэл диқэл пэ кода, кала лэ муршэс цырдэл каринг о мурш или ла жувля каринг и жувли?

•  Со пала када пистромэ андэ Библия?

•  Сыкавэл када, кай...

•  Но со, если...

 Кода, сар о мануш диқэл пэ кода, кала лэ муршэс цырдэл каринг о мурш или ла жувля каринг и жувли, зависит кодэлэстар, сави лэстэ культура или андэ сави время во жувэл. Но важ и христианоря важно най кода, со гиндон май бут мануша. Лэн на зындярэн и разни учении (Эфесянам 4:14). Пэ кода, кала лэ муршэс цырдэл каринг о мурш или ла жувля каринг и жувли, сар и пэ любо авэр поведения, вонэ диқэн кадя, сар трэбуй па библейски нормы.

 Драго дицол, со андэ Библия пистромэ пала кода, кала лэ муршэс цырдэл каринг о мурш или ла жувля каринг и жувли. Андэ лэ Дэвлэско Алав ԥэнэнпэ:

•  «На пэр тэ совэс лэ муршэса кадя, сар пэрэс ла жувляса. Када гряцимос» (Левит 18:22).

•  «Важ када о Дэл, кай кадя камэлас лэнго ди, отдя лэн, кай лэнца тэ хулаий о мэлалимос... Отдя лэн лэ билажавардимасти, саво вонэ фартэ камэнас. Лэндирэ жувля парудэ кода, со о Дэл дя, кай тэ авэл кати машкар хулай и хулаи пэ кода, со нэправильно» (Римлянам 1:24, 26).

•  «На хохавэн екжэнэ пэс. Ни о роспутно мануш, ни кодэва, ко тэлёл хохавнэ дэвлэнди, ни кодэва, ко измений пэстиря хулаяти или хуласти, ни мурш, саво терэл билажавардимос аврэ муршэса, ни чордэӷари, ни жадно, ни матимари, ни кодэва, ко вэрыто дэл дума пэ авэр, ни кодэва, ко дилярэл пэ ловэ, на попэрэла андэ лэ Дэвлэско Царство» (1 Коринфянам 6:9, 10).

 Па чачимастэ лэ Дэвлэстирэ нормы стодэ важ всаворэ мануша, и нэ важно, цырдэл лэ муршэс каринг о мурш, ай ла жувля каринг и жувли, или цырдэл лэ муршэс каринг и жувли, ай ла жувля каринг о мурш. Вижал, кажнонэ манушэсти трэбуй тэ зритярэл пэс и тэ бирой пэстири жылания тэ терэл кода, со най уӷодно лэ Дэвлэсти (Колоссянам 3:5).

 Сыкавэл када, кай андэ Библия ԥэнэнпэ, кай и мануша тэ вэрыцын лэ муршэн, савэн цырдэл каринг и мурша, или лэ жувлян, савэн цырдэл каринг и жувля?

 Най. Андэ Библия нисо на пистромэ пала кода, кай трэбуй тэ вэрыцын кацавэ манушэн или аврэн (Евреям 12:14). Важ када, тэ нападают пэр лэндэ, тэ терэн против лэндэ варисави приступления или варисар па аврятэ тэ сыкавэн пэстири холи каринг лэндэ, када нэправильно.

 Сыкавэл када, кай и христианоря трэбуй тэ жан против законоря, савэ домэкэн, кай тэ авэл брако машкар кацавэ мануша?

 Андэ Библия пистромэ, кай о Дэл загиндосардя, кай о брако тэ авэл машкар ек мурш и ек жувли (Матфея 19:4—6). Но и дума пала кода, савэ законоря и мануша прилэн важ кацавэ бракоря, ужал андэ политика, ай най андэ вопросоря, со драго, ай со най. Ай андэ Библия пистромэ, кай и христианоря на трэбуй тэ залэн никастири риг андэ политика (Иоанна 18:36). Важ када вонэ ни за, ни против кодэла законоря, савэ стол о правительство важ кацавэ бракоря и важ кацавэ мануша.

 Но со, если о мануш кацаво? Можэт во тэ парудёлпэ?

 Да. Када вижыля кай дэсавэ мануша, савэ жувэнас андо пэрво вико! Посли алава, кай кодэла, ко андярэл кацави жызня, на авэна андэ лэ Дэвлэско Царство, андэ Библия пистромэ: «Кацавэ слинэ дэсавэ андар тумэндэ» (1 Коринфянам 6:11).

 Сыкавэл када, кай кодэлэндэ, ко отԥэнделя кацавя жызнятар, будэр на сас нисави жылания тэ ринпэ каринг кацави жызня? Най. Андэ Библия ԥэнэнпэ: «Утидэнпэ андэ нэви личность, сави блаӷодаря кодэлэсти, ко ла создал, ашэл май нэви через и точно знания» (Колоссянам 3:10). Трэбуй вся и время тэ парудювас.

 Но со, если варико старыийпэ тэ жувэл па лэ Дэвлэстирэ нормы, но лэс всаек цырдэл каринг кацави жызня?

 Лэ манушэстар зависит, тэ зритярэл пэстирэ жылании или жэ тэ терэл кадя, сар камэл. Акэ со пистромэ андэ Библия: «Жувэн кадя, сар сытярэл о духо, и тумэ на лэна тэ терэн кадя, сар камэл и ӷрешно тила» (Галатам 5:16).

 Шув сама, катэ на ԥэнэнпэ, кай лэ манушэстэ на авэна нисавэ найлашэ жылании. Но через и лащи дила важ о Дэл, сар изучения Библии и молитва, лэстэ или латэ авэла зор тэ улэн кацавэ жылании.

 О Дэйвидо, пала саво ԥэнэнаспэ май англал, диқля када пэ пэстири жызня. Лэсти фартэ поможысардя кода, кай во росԥэндя лэ родителёнэнди, кай во борийпэ кадэлэса. Во ԥэнэн: «Мандэ, ԥэнэса, бар пэля па ди. Наверно, мэрнэ подросткови бэрша авелоп май бахталэ, если бы мэ май англал доверял бы лэ родителёнэнди».

 И чаче, кала амэ жувас па лэ Иеговастирэ нормы, амэ ашас пэ бутэстэ май бахталэ. Амэ ӷанас, кай вонэ «справедливи и радуин оди» и кай «кодэлэнди, ко жувэл пар лэндэ, авэла бут лашимос» (Псалом 19:8, 11).