Дуйто письмо лэ Тимафеёсти 2:1-26
2 Ни акэ, мэрно шаво, на́ параш тэ лэс зор кодэлэстар, кай о Христос о Исусо здиқэл пар мэндэ па пэско баро ковло ди.
2 Вся, со ту ашундян амэндар англа бут миро, пэрэдэ лэ манушэнди, савэнди исин патяимос и савэ смоӷут тэ сытярэн аврэн.
3 Сар лэ Христоско лэ Исусоско чачуно халавдо, ав ӷотово тэ пэрэандярэс о ԥаримос.
4 Ни ек халавдо на жала пэ бути, кай тэ затерэл ловэ, если камэл тэ уӷодий кодэлэсти, ко ля лэс андэ халавдия.
5 И кодэлэсти, ко борийпэ аврэнца, нисо лашо на дорэсэлапэ*, если во авэла тэ борийпэ най па правилоря.
6 О мануш, саво залэлпэ ла ԥувьяса, пристол бут зор и важ када трэбуй пэрво тэ хал кода, со вибарярдя.
7 Вся и время гиндосар пала мэрнэ алава, и о Баро Хулай дэла тути зор андэ вся тэ розлэспэ*.
8 На́ бистэр, кай о Исусо Христос жунделя и кай во сас анда лэ Давидоско колено, и када зжалпэ кодэлэса, кай мэ росԥэнав и лащи новость.
9 Важ кадэя новость мэ пэрэандярав о ԥаримос и бэшав андо баруно, сар чордэӷари. И всаек о алав лэ Дэвлэстар на заԥандавэса андэ цэпоря.
10 Кочай мэ вся састэс пэрэандярав важ и особени*, кай и вонэ тэ авэн спасымэ, если лэна тэ андярэн лэ Христостири лэ Исусостири время, и тэ авэн ашунглэ вся и вечность.
11 Чаче ԥэндо: если амэ вмести мулям, тоди вмести ласа и тэ жувас.
12 Если амэ ашаспэ састэ андэ ԥари время, тоди вмести ласа и тэ прависарас. Если отԥэндюваса лэстар, тоди и во отԥэндёла амэндар.
13 Если амэ най састэ андо алав, во вся и время приритярдёл пэстирэ алавэсти, важ кода кай нэ можэт тэ отԥэндёл корко пэстар.
14 Най еқвар ԥэн лэнди пала када и манг лэндар англа Дэл тэ на споринпэ важ и алава, важ кода кай кацавя думатар нинай нисаво толко и через латэ ашэл кати май вэрыто кодэлэнди, ко ла ашунэл.
15 Тер вся, со па тиро зор, кай тэ авэс уӷодно лэ Дэвлэсти, домардюв тэ ашэс мануш, саво терэл бут дила и савэсти най пала со тэ лажал, и старысав правильно тэ росԥэнэс о чачимос.
16 На́ ашун и евутни дума, сави лажаварэл лэ Дэвлэс, важ кода кай через латэ ашэл инке май бут найлашымос.
17 Кацави дума лэла тэ розжалпэ, сар тернимос пэ тила. Машкар кодэла, ко андярэл кадэя дума, о Гимене́ё и о Фили́то.
18 Вонэ оджылэ лэ чачимастар, кала ԥэнэн, кай и мануша ужэ жунделэ, и змарэн дэсавэн, кай вонэ парашэн тэ патян.
19 Но о Дэл стодя састо фундаменто, саво на ужала па ҭан, и пэр лэстэ, сар печать, пистромэ: «О Иегова ӷанэн кодэлэн, ко лэсти прижал» и «Мэк кажно, ко взвийпэ каринг о Иегова па алавэстэ, отԥэндёл ла найлащя дилатар».
20 Андо баро цэр исин посуда най кати анда сомнак и анда руп, но и кадяжэ анда каш и анда ӷлина, ек — важ и особо время, ай авэр — важ и цэрутни дила.
21 Если о мануш дурёл кодэлэндар, ко сар посуда важ и цэрутни дила, тоди во авэла сар посуда важ и особо время. Во ашэла свынто и анэна лашымос пэстирэ хуласти, ай кадяжэ авэла ӷотово каринг любо лащи дила.
22 Важ када старысав тэ унашэс кодэлэстар, каринг со цырдэлпэ оди андэ тэрнэ бэрша, и пристов о зор, кай тэ терэс вся правильно, тэ патяс, тэ любис и тэ жувэс мирно вмести кодэлэнца, ко вужэ одеса взвийпэ каринг о Баро Хулай.
23 Ай инке ритярдюв май дур кодэлэстар, кала евья споринпэ пала дилимос, важ кода кай ту ӷанэс, кай када анэн каринг о скандало.
24 Ай о мануш, саво андярэл лэ Барэ Хуластири время, трэбуй тэ ритярдёл май дур лэ скандалостар. Во трэбуй драго тэ обжалпэ аврэнца, правильно тэ сытярэл, тэ зритярэл пэс, кала лэса обжанпэ нэсправедливо,
25 ковлэс тэ сытярэл кодэлэн, ко на камэл тэ приашундёл. Можэт, о Дэл мэкэла лэнди тэ каинпэ* и точно тэ ӷанэн о чачимос.
26 И тоди вонэ, кала обгиндонапэ, полэна, кай лэн жундэнца астардя о Бэнг, кай вонэ тэ терэн кода, со лэсти уӷодно.
