Дуйто письмо андо Каринфо 8:1-24
8 Ԥрала, амэ камас, кай тумэ тэ ӷанэн, сар о Дэл па пэско баро ковло ди здиқля пэ амарэ ԥрала и ԥэя* андэ Македо́ния.
2 Кала лэндэ сас фартэ ԥари время, вонэ лошавэнас и инке май бут делинаспэ аврэнца, хоть екжэнэ жувэнас фартэ чорорэс.
3 Мэ моӷу тэ доԥэнав тумэнди, кай вонэ динэ вся, со моӷли тэ дэн, и стердэ дажэ май бут.
4 Вонэ екжэнэ мангэнас амэндар тэ мэкас лэн тэ поделинпэ, кай вмести аврэнца тэ поможын лэ свынтонэнди.
5 И вонэ стердэ дажэ май бут, чем амэ аштярасас. Важ кода кай вонэ, сар сас уӷодно лэ Дэвлэсти, всаворэ одеса терэнас лэ Барэ Хуластири дила, ай кадяжэ поможынас амэнди.
6 Кочай амэ манглям лэ Титос тэ достерэл и дила, сави во заля тумэндэ тэ терэл, — тэ стидэл кода, соса тумэ поделисайлэ.
7 Тумэндэ бут со вижал: тумэ састэс патян, драго андярэн и дума, бут со ӷанэн, хваткаса терэн дила и любин кадя жэ, сар амэ любисарас тумэн. Важ када авэн ӷотови тэ делинпэ аврэнца.
8 Кадэлэ алавэнца мэ на старысавав тэ уԥэнав тумэнди. Мэ кати камав тэ росԥэнав тумэнди, сар авэр анда ди терэн дила, и тэ диқав, пэскати анда вся ди тумэ любин.
9 Тумэ ӷанэн, саво дэ баро ди кай амаро Баро Хулай кай о Исусо Христос: хоть во сас барвало, во ашэля чороро важ тумэндэ, кай через кода, кай во ашэля чороро, тумэ тэ барвадён.
10 И акэ со мэ пала када гиндосарав: када важ тумэндэ авэла фэдэр, если тумэ достерэна кадэя дила, важ кода кай тумэ линэпэ пала латэ инке бэрш палпалэ, тай инке анда вся ди.
11 Ни акэ, достерэн и дила, пала сави линэпэ. И тоди, если тумэ отдэн скати, скати па тумаро зор, тумэ сыкавэна, кай терэн када всаворэ одеса.
12 Если варико дэл анда ди, када чалёл лэ Дэвлэсти, важ кода кай во аштярэл лэ манушэстар кода, со во можэт тэ дэл, ай най со нэ можэт.
13 Мэ на камав, кай аврэнди тэ авэл вушэро, ай тумэнди ԥарэс.
14 Но акана тумэндэ исин возможность бут тэ дэн, кай через тумэндэ лэндэ вся тэ хутилэл. Если тумэ кадя терэн, тоди, кала лэндэ исин возможность бут тэ дэн, через када тумэндэ вся хутилэла. Кадя, и лэндэ, и тумэндэ вся лэла тэ хутилэл.
15 Пала када сас пистромэ: «Кастэ сас бут, мэк на́ авэл лэстэ фартэ бут, ай кастэ сас набут, мэк на́ авэл лэстэ совсем набут».
16 Амэ блаӷодарни лэ Дэвлэсти, кай о Ти́то заботийпэ пала тумэндэ кадя жэ всаворэ́ одеса, сар и амэ.
17 Ай во най просто сас ӷотово тэ стерэл кадя, сар амэ манглям. Во екжэно закамля тэ авэл каринг тумэндэ, важ кода кай лэстэ ԥабол оди тэ поможый тумэнди.
18 Амэ бишалас лэса еқэ ԥралэс, пала саво драго дэн дума андэ всаворэ лэ Дэвлэстирэ ӷурторя важ и вся, со во терэл, кала росԥэнэн и лащи новость.
19 Тай инке, и ԥрала ԥэндэ лэсти тэ проандярэл амэн и тэ поможый амэнди тэ росшас па всаворэ кода, со сас стидо. Кадя амэ тераса, кай тэ авэл ашунгло о Баро Хулай, и сыкаваса, кай камас тэ поможысарас аврэнди.
20 И тоди нико дажэ алав амэнди на ԥэнэна, сар амэ роздас кода, со сас дино анда вся ди.
21 Важ кода кай амэ «старысавас ни андэр со тэ на хохавас най кати англа Иегова, но и англа миро».
22 Амэ кадяжэ бишалас лэнца аврэ амарэ ԥралэс. Амэ най еқвар диқлям лэс андэ дила и полям, кай во пристол бут зор андэ вся, со терэл. Ай андэ кадэя дила во стола инке май бут зор, важ кода кай всаворэ́ одеса патял тумэнди.
23 Если варико пушэла пала Ти́то, ԥэнэн, кай во мэрно приятелё и амал, саво, сар и мэ, поможый тумэнди. И инке, если варико пушэла пала кадэла ԥрала, ԥэнэн, кай лэн бишалдэ лэ Дэвлэстирэ ӷурторя, и через лэндэ ашэл ашунгло о Христос.
24 Важ када сыкавэн кадэлэ ԥралэнди, кай любин лэн, и мэк андэ лэ Дэвлэстирэ ӷурторя диқэн, васо амэ драго дям дума пала тумэндэ.
Сноски
^ Или «пэ ӷурторя».
