Свынто тайна 4:1-11
4 Посли када мэ додиқлэм по нэбо ԥэрнади двэря и ашундэм о пэрво ӷласо, саво ашундёлас сар анда трубатэ. Кадэва ӷласо ԥэндя манди: «Ваздэпэ кардэ, и мэ сыкавава тути, со трэбуй тэ авэл».
2 Пэр мандэ зжыля о свынто зор, и мэ додиқлэм, кай по нэбо тердёл троно и пэр лэстэ варико бэшэл.
3 Кодэва, ко бэшэлас по троно, светияспэ сар о бар я́шма и сар о бар сердали́ко*, ай круӷом троно блестияс и радуӷа анда изумрудо.
4 Круӷом троно тердёнас инке 24 троноря, и пэр лэндэ бэшэнас 24 барэдэра андэ парни ӥда, и лэндэ пэ шэрэ сас сомнакунэ короны.
5 Лэ троностар марэнас молнии и ӷромо и ашундёнас ӷласоря, ай англа троно ярко ԥабонас 7 лампы, савэ сыкавэн 7 лэ Дэвлэстирэ зора.
6 Англа троно сас варисо кацаво, ԥэнэса стекляно моря, сави шоласпэ по хрусталё.
Андо машкар, котэ, кай сас о троно, и круӷом лэстэ находинаспэ штар зоралэ анӷелоря*, савэндэ англал и палал сас розбут яқа.
7 О пэрво зорало анӷело шоласпэ по лево, о дуйто — по гурув, кай о трито о муй сас лэ манушэско, ай о штарто шоласпэ по орло.
8 И кажнонэстэ анда кадэла зоралэ анӷелоря сас по шов ԥақа. (Лэндэ везде сас яқа, дажэ тала ԥақа.) Вся и время, о дес и рят, вонэ ԥэнэнас: «Свынто, свынто, свынто о Иегова, о Само Зорало Дэл, саво сас, исин и авэла».
9 И зоралэ анӷелоря прижанэнас, кай кодэва, ко бэшэл по троно и жувэл вечно, ашунгло и пативало, и блаӷодаринас лэс.
10 Ай и 24 барэдэра пэрэнас пэ чанга англа кодэва, ко бэшэл по троно, и тэлёнас кодэлэсти, ко жувэл вечно. Вонэ шонас пэстирэ короны каринг о троно и ԥэнэнас:
11 «Иегова, амаро Дэл, всаворэ трэбуй тэ прижанэн*, кай ту ашунгло, пативало и зорало, важ кода кай ту вся стердян и кадя, сар тути сас уӷодно, вся ашэля и появисайля».
Сноски
^ Или «кучутно лоло бар».
^ Ворта «херувиморя». Када анӷелоря, савэндэ исин баро зор.
^ Или «ту достойно тэ авэс».
