Лэ Иаковоско письмо 3:1-18
3 Ԥрала, на трэбуй бутэнди андар тумэндэ тэ ашэн учителёря, важ кода кай ӷанас: амэн лэна тэ сындон май строӷо.
2 Амэ всаворэ часто шылисавас*. Если варико на шылийпэ андо алав, тоди во идиально мануш, саво можэт тэ опсытярэл* и вся пэстири тила.
3 Кала амэ стас и вудилы лэ грастэсти андо муй, кай во тэ кандэл амэн, амэ хулаисарас и всаворэ грастэса.
4 Кадяжэ погиндон пала караблё: хоть во баро и лэс ԥиравэн и барэ балваля, о капитано цынёне рулёса бандярэл лэс андэ кодэя риг, андэ сави камэл.
5 Кода жэ можно тэ ԥэнас и пала шыб. Кадя вой найбари, ай вихвалийпэ росфартэ. Погиндон, сар дэ набут трэбуй яг, кай тэ заԥабол баро вэш.
6 И шыб шолпэ пэ яг. Андэ тила имено ла шыбатар жал со май бут найлашымос, важ кода кай вой маӷрий вся и тила и римой* лэ манушэстири жызня. Ай и шыб дэлпэ яг анда гиена.
7 Лэ зверёнэн, лэ птицэн, кодэлэн, ко ползыий па ԥув и ко жувэл андэ моря, можно тэ заставин тэ кандэн, и кай и мануша када вижал.
8 Но нико анда мануша нэ можэт тэ заставий пэстири шыб тэ кандэл. Ла на уритярэса, вой опасно, андэр латэ ԥэрдо ядо.
9 Ла шыбаса амэ хвалисарас лэ Иеговас, лэ Дадэс, и ласа жэ дас амрая лэ манушэн, савэн о Дэл создал пар пэстэ.
10 Еқа шыбатар жал и о лашо алав, и о бибахтало.
Ԥрала, кадя нащи тэ авэл.
11 Хэба дорэсэн анда ек хаинг и о пресно, и о кирко паи?
12 Хэба по инжыро барён и алифки или по виноӷрадо — о инжыро? И хэба можно анда хаинг, андэ сави стидэлпэ лондо паи, тэ дорэсэн пресно паи?
13 Ко машкар тумэндэ мудро и годявэрно? Мэк кацаво мануш андярэл пэс достойно и кадя сыкавэл, кай во вся терэл ковлэ одеса, саво ашэл кацаво через и мудрость.
14 Но если тумаро ди завидуий и цырдэл тумэн каринг о скандало*, тоди на́ абурон андэ пэстири мудрость, важ кода кай тоди када авелоп тумаро хохаимос.
15 Када най кодэя мудрость, сави жал па нэбо лэ Дэвлэстар. Вой жал кадэлэ миростар, кодэлэндар, ко жувэл, сар камэл и ӷрешно тила, и лэ бэнгэндар.
16 Важ кода кай котэ, кай завидуин и любин тэ споринпэ*, нинай порядко и бут найлашымос.
17 Но о мануш, савэстэ исин мудрость лэ Дэвлэстар, спэрва андярэл пэс вужэс, посли када во старыийпэ, кай тэ авэл мирно, во андярэл пэс годявэрнэс*, ӷотово тэ кандэл, анда ди жалуий аврэн, терэл бут лашымос, обжалпэ всаворэнца еқэндар, на притерэлпэ.
18 Если лэ Дэвлэско законо ритярэн котэ, кай вся мирно, тоди када анэн бах кодэлэнди, ко старыийпэ тэ ладий аврэнца*.
Сноски
^ Или «спотыкнисавас; даспэдап; пэрас».
^ Или «тэ зритярэл».
^ Или «дэл яг».
^ Или, можэт, «цырдэл тумэн тэ путён; тэ ашэн ашунглэ».
^ Или, можэт, «тэ путён; тэ ашэн ашунглэ».
^ Дословно «ӷотово тэ уступий».
^ Или, можэт, «Кодэла, ко старыинпэ тэ ладин, ритярэн лэ Дэвлэско законо котэ, кай вся мирно».
