Le marturia le Jehovaske chidenpe duvar ando kurko ande penge Riga. So keren kotse? Ande soste azhutil tu te chides tu lentsa?

•  So kerelpe kai chidenpe le marturia le Jehovaske?

•  Sostar si mishto tuke te chides tu lentsa?

•  So phenen aver terne

 Ande kacha rig chidas amen te mai sikiuas pa e Biblia. Kotse si te azhutin tu te zhanes pa kakala prame:

•   Te sikios o chachimos pa o Del.

•   Te aliares sostar nakhen le prame kai si agies.

•   Te aves mai lasho manush.

•    Te arakhes chache amiguria.

 So motholpe kotse shai azhutil tu. Suako chachimos la Bibliako kai estudilpe kana chidenpe le marturia le Jehovaske si te azhutil tu te les o jaraimos kai avel katar o Del (Proverbios 4:5). Godo kamel te phenel ke e Biblia azhutil tu te alosares mishto so te keres ande kiro traio ai vi shai arakhes suaturia kal bare prame kai pushes tu:

•   Soske trais?

•   Si o Del kon kerel amenge te kinuis?

•   So si kana meras?

 Kakala si uni divanuria kai denpe iek data ando kurko kana chidas amen:

•   Sostar trobus te las amen pala e Biblia?

•   Kaste trobus te zhas kana aliaras amen nekezhime?

•   So kerel pala amende e Amperetsia le Devleski?

 “Iek raklorho kai zhalas mantsa ande escuela, avilo kai chidas amen, beshlo ai chitosardias amentsa. Polme phendias mange ke plachaias les so mothonas le zhene kal suaturia kai pushenaspe. Vi phendias ke ande peski khangeri nai len prame te estudin sar si amende” (Brenda).

 Zhanesas kako? Te aves kai chidenpe le marturia le Jehovaske si ivia.

 Le manush kai prinzharesa kotse shai den tu zor. E Biblia phenel ke le kristianuria vi chidenpe te den zor ai te azhutinpe iek avres (Zhiduvuria 10:24, 25). Ande kacha lumia kai le manush gindinpe numa ande pende zuriarel amen te avas manushentsa kai si lenge mai but pala o Del ai pala aver manush.

 “De riate univar aliarau man tristo ai chii, numa godola kai zhan kai chidenpe le marturia le Jehovaske, keren te aliarau man mai mishto. Kana amboldau khere, polme te getol o chidimos aliarau man mai barikani ai si man e zor te ushtiau o kolaver gies” (Elisa).

 Zhanesas kako? Pe sa e lumia si mai but de 60.000 riga kai kidenpe 120.000 grupuria katar le marturia le Jehovaske. Sar mai zhene chidenpe amentsa, suako borsh vazdenpe 1.500 Riga te chidas amen. a